الريس بيقول لازم نبقي أيد واحده عشان نبني مصر ، وبيقول أننا ما نكلش عشان مصر تبقي كدا وبيشاور بأيده علامة علي القوة ، وبيقول أننا كمصريين لازم نبني مصر ، وبيقول أتبرعوا لمصر بجنيه ، وبيقول نستحمل مع بعض ، وبيقول نشد علي بطننا لحد ما تخرج مصر من عنق الزجاجه وتبقي أد الدنيا ، وبيقول إن تذكرة المترو تكلفتها أكتر من عشرة جنيه ، وبيقول أنه بيدينا الكهربا والمياه بأقل من أسعارها بكتير ، وبيقول أنه بيدينا العيش بسعر رمزي جدا ، وبيقول أننا بنشوف اللي بياخده مننا كتير واللي بيديه لنا قليل ، وبيقول إن الخدمات اللي بناخدها لازم ندفع تمنها ، وبيقول كمان إن القرارات الصعبه إللي كانت لازم تتاخد من سنة 77 هياخدها هو عشان البلد تتحسن ، بس إحنا كمان يا ريس عاوزين نفهم هو الكلام ده موجه لمين بالضبط للمصريين كلهم ، وزرا ومحافظين ومستشارين وبرلمانيين وضباط وقضاه وأغنيا وفقرا ولا هو الكلام للغلابه وبس ، الناس اللي مش غلابه لا حسوا بغلاء الأسعار ولا بزيادة الكهربا ولا المياه ، وحتي العلاج الناس الكبار اللي في الحكومة إما بيتعالجوا علي حساب الدولة– يعني علي حسابنا إحنا يا ريس - أو مش حاسين أصلا أن الدوا بقت الناس مش لاقيه تشتريه ، الغلابه وبس هما اللي بيركبوا المترو أبو جنيه وهما اللي مش لاقيين يأكلوا أولادهم بشكل حقيقي ، ومش قادرين يصرفوا علي التعليم والعلاج ، لو فيه قرارات يا ريس لازم تتاخد ما تبقاش علي حساب الناس الغلابه من أول الموظفين لحد العاطلين، مش معقول يا ريس أن الغلابه اللي مش لاقيين ياكلوا ولا يتعالجوا تاخد منهم فلوس لدعم صندوق القضا اللي هما أفضل طبقه في مصر يعني انت كدا بتاخد من الغلابه تدي للأغنيا مش العكس ، ومش معقول يا ريس تفكر في زيادة سعر المترو بتاع الغلابه ومصر فيها ملايين العربيات اللي بتمون من البنزين المدعوم للغلابه ، انت كدا يا ريس بتاخد من الغلبان تدي للغني ،ومش معقول يا ريس إن أسعار الكهربا تتضاعف ويطلع الراجل بتاع الوزارة يطمنا ويقول ما تخفوش اللي ما عندوش تلاجه مش هيحس بالفرق ، ومش معقول يا ريس أن القرارات الصعبه اللي عاوز تاخدها تكون علي الغلابه وبس ، بتقول إن استجابة الحكومات لزيادة المرتبات من 2011 كانت حمل وعبء علي الميزانيه ، قارن يا ريس بين زيادة رواتب الموظفين الغلابه وزيادة رواتب ومعاشات الجيش والقضا، من شهر يا ريس البرلمان وافق علي زيادة للجيش واحنا في عز الأزمة اللي بتقول فيها نستحمل عشان مصر، لو المحليات مثلا طلبت الزيادة دي كان ممكن تديها لهم ؟؟ أكيد لا وكنت هتقول البلد مش مستحمله ولازم نتحمل ، مرتبات الغلابه اللي زادت ما وصلتش للحد الأدني اللي الحكومه قالت عليه ، لحد النهارده يا ريس محدش قادر يطبق الحد الأقصي للأجور، وده أكبر دليل يا ريس علي إن الغلابه المطحونين هما اللي لازم يدفعوا دم قلبهم وللأسف يا ريس دم قلبنا اللي بندفعوا مش بيروح لمصر ده بيروح رواتب للناس الكبار اللي محدش مستجري يهوب ناحيتهم و يعملهم حد أقصي لأجورهم ، دم قلبنا يا ريس بيروح علي حنفية الفساد اللي مفتوحه علي أخرها ، راجل معرفه غلبان يا ريس قابلني في المواصلات العامة وكان متعشم جامد جدا إن ظروفه تتحسن ، ساعه ما قابلني بكي وقالي كنت بشتري شوال بطاطس أرميه تحت السرير نجر منه نسلق ونقلي ونأكل العيال ، أنا دلوقتي مش لاقي أجيب كيلو بكيلو مش لاقي حتي أجيب العلاج ، أقل حاجه إذا الريس ما أدنيش ما ياخدش مني ولا يحطش عليا !!!
