سيد عبدالحفيظ عن أزمة التحكيم: «فلوس بتهدر وحقوق بتضيع» (فيديو)

أعلن سيد عبدالحفيظ، مدير الكرة السابق في النادي الأهلي، عن رأيه في الأخطاء التحكيمية في بطولة الدوري المصري بعد مرور جولتين فقط من المسابقة، وأختص بالذكر الحالة التي أثارت الجدل في مباراة الزمالك والبنك الأهلي في الجولة الأولى من الدوري.
وقال عبدالحفيظ في تصريحات تليفزيونية عبر شاشة «إم بي سي مصر»: «مينفعش موضوع التحكيم ده يبقى في تعاطف، دي فلوس بتهدر وحقوق بتضيع، الدوري لما بيتحسم لأي فرقة بدري، بيتم الدفع بحكام غير معروفين وبعدها مش بنشوفهم تاني في الموسم اللي بعده وده بيقول أن الموضوع ماشي مجاملة».
وأضاف: «محمد عادل ومحمود البنا سبق وهاجمتهم كتير جدًا ولكن هما من أحسن الناس اللي موجودين في الفترة الحالية، وبيتعرضوا لسوء توفيق وتقدير وقرارات».
وأكمل: «أنا مش عارف محمد عادل زعلان من مين، هو مقدر الموقف غلط، أنت كان مفروض تروح بيتك اللي هو اتحاد الكرة، يعني مفروض تفهم الموضوع من الاتحاد».
وأردف: «بردو اللي مش مفهوم بالنسبالي أية المشكلة لما يتم عرض حالة في الفار، الموضوع اللي يزعل أنك أقريت بحاجة مع الحكام في الفار، واحتسبت عكسها».
وزاد: «لما تيجي تتخانق أو تفتعل مشكلة لازم تحدد الدائرة اللي تزعل منها، مش الإعلام السبب الإعلام شاف شغله كويس جدًا على أكمل وجه».