شيكابالا: الأهلي بياخد البطولات عشان الفلوس.. وإمام عاشور زملكاوي مجنون

تحدث محمود عبدالرازق شيكابالا، قائد الزمالك، على ضرورة العامل المادي للتتويج بالألقاب، واستشهد بذلك بالغريم التقليدي الأهلي.
وقال شيكابالا في تصريحات تليفزيونية: «الفلوس مهمة، ليه الأهلي بياخد كل البطولات دي؟ عشان الفلوس».
وأضاف: «ميفعش الأهلي يكون فوق ومن بعده الزمالك، وتحت الإسماعيلي وباقي الأندية، احنا كان عندنا فريق جامد قبل نهائي القرن راحوا فين دلوقتي بسبب الفلوس؟».
وبشأن تفاصيل الحديث الذي دار بينه وبين إمام عاشور، خلال مواجهة الأهلي والزمالك في كأس مصر الأخير، قال شيكابالا: «مقدرش أقول إيه اللي حصل، هو يقول».
وأكمل: «نهاية الكلام إنه كان عايز التيشيرت بتاعي، أنا ماكنتش متوقع رحيله للأهلي، لو كنت تشوفه عندنا إمام عاشور زملكاوي مجنون، دا اللي كنا شايفينه».
وفي نفس السياق تابع: «الأهلي طبيعي ياخد بطولات بسبب الاستقرار الدائم، لكن إننا نحارب عشان ناخد منهم بطولات، ده إنجاز».