أحمد عبد الله محمود: «مش بحب دوري في مسلسل الأسطورة.. وكل الناس قالوا لي بلاش»

استضافت فانا إمام وندى فليفل في حلقة اليوم الخميس من «قبل ما تفطر بكتير» على «نجوم إف.إم» الفنان أحمد عبد الله محمود للحديث عن أحدث مشاركاته الفنية في رمضان 2024.
وتطرق أحمد عبد الله محمود إلى فكرة عدم اكتمال نص العمل بالكامل قبل بدء تصويره وتأثير هذا على أداء الممثل، وقال: «لما يكون عندي العمل بتاعي عمري ما هعمل كده لأنك مهما كنت مركز أكيد فيه حاجة هتعدي عليك، لأنك مش عارف بدايته والوسط ونهايته فمش هتعمل التصاعد والكريشندو الطبيعي للشخصية، ونص المسلسلات اللي عملتها مثلا ما كنتش أعرف إني هتقتل، بس يعني بتعمل حاجة من التمرين وإنك تبقى مستعد طول الوقت وذهنك حاضر».
وعن مشاركته في مسلسل «لحظة غضب» مع صبا مبارك ومحمد شاهين، قال: «كنت بتفرج على مسلسل حالة خاصة، والمخرج عبد العزيز النجار من الناس الشطار وعينهم جديدة ومتأثر بالمدرسة الغربية وبيهتم بكل تفصيلة في المسلسل وأنا بحب أشتغل مع الناس المركزة دي لأنهم بيحبوا الممثل أوي، فكنت عاوز أشتغل معاه، وفجأة لقيت جت لي مشاركة في مسلسل لحظة غضب معاه هي مش كبيرة لكن عوامل كتيرة خلتني عاوز أعمل كده».
كما أشار إلى الأدوار الفارقة في مسيرته الفنية، وقال: «من الأدوار اللي عملت معايا نقلة كان مسلسل الأسطورة 2015، وكان الناس كلها قبلها قالولي بلاش لأن كان فيه مشهد في الدور أنا مش بحبه لحد دلوقت لكن الدور كان مستفز ليا، وأنا حسبتها من كل الجوانب لأن محمد رمضان ممثل متشاف جدا وكنت عاوز أشتغل مع محمد سامي وهو كان مصمم إني أنا اللي هعمل ده».