11 تصريحا ل طارق صبري عن «خيرت السبكي» في «الاختيار»: الناس دعت عليا

حل الفنان طارق صبري، الذي أدى دور الإرهابي والضابط السابق خيرت السبكي في الجزء الثاني من مسلسل «الاختيار»، ضيفًا على الإعلامية ريهام إبراهيم في برنامج «من مصر» المذاع عبر فضائية «cbc».
وتحدث صبري خلال اللقاء عن دوره في المسلسل، وتمثلت أبرز تصريحاته فيما يلي:
1- دي أول مرة أشتغل مع كريم عبدالعزيز، وباعتبر نفسي محظوط إني اشتغلت مع كريم في مسلسل «الاختيار»، لأني بحبه جدًا على المستوى الفني.
2- اتفاجئت من ردود الأفعال على دور خيرت السبكي، وبعد الجزء الأول السنة اللي فاتت قولت بيني وبين نفسي لو العمل ده له جزء تاني نفسي اشتغل فيه، لأن ده واجب علينا كممثلين أن يبقى له دور في التوثيق ده، ولما عرفت إن فيه جزء تاني كنت باتمنى إني أكون في الجزء التاني.
3- كان نفسي أعمل دور ظابط في «الاختيار» لأني عملته قبل كده كتير، ولكن متخيلتش إني أعمل دور ظابط خاين ومنشق، واتفاجئت بالشخصية.
4- لما كلموني وروحت قعدت معاهم حسيت بمسؤولية كبيرة قوي، وقولت هابين الشخصية للناس إزاي، وهل هابين إنه إرهابي وخلاص وأخليّ الناس تكرهه، ولا أخلي الناس تركز في تفاصيله.
5- «الاختيار 2» خلىّ ما بعد «الاختيار1» صعب، لأن الناس هتبقى مستنية تشوف طارق في إيه، وإيه اللي جاي، وإيه الرسالة اللي هتوصلها حتى لو اشتغلت كوميدي.
6- عندي تردد في الشغل، وبقعد أفكر وأشوف ده هيبقى مفيد للناس، وعندي النقطة دي موجودة، وعشان كده مبشتغلش كتير، و«الاختيار» زود النقطة دي.
7- الناس بتتعامل معايا على إني الإرهابي خيرت السبكي، مش على إني طارق صبري، وبأدي شخصية، ورد الفعل اللي حصل بعد الدور خلاني أفكر إني صح، وإني اختار اللي مهم الناس تعرفه وتوصل حاجة للناس.
8- متعاملتش مع «الاختيار» على إنه مسلسل، لكن بشوفه حاجة وطنية، كأن المنتخب بتاعنا بيلعب ولموا النخبة وكل من عنده إحساس بان عنده، واجب تجاه البلد دي.
9- مسلسل «الاختيار» كان عمل وطني، وأي واحد اشتغل فيه كان من الدافع ده وأكيد مش أي دافع تاني.
10- الناس كانت بتدعي عليا في صيام رمضان، وأنا اتخضيت في الأول وأخدت الموضوع عادي بعد كده.
11- لما كنت بكتب «بوست» كانت الناس بتخش تهاجمني هجوم شديد جدًا من غير ما تحط اسم الشخصية، واتخضيت في الأول لكن عدت.