في حواره مع «الوادي»..محمد أمين راضي : الكتابة عمل فردي ديكتاتوري للغاية

أسامة أنور عكاشة أعطي القيمة لكتاب السيناريو
أستعد لفيلم مع كريم السبكي عن قصة حياة ملاكم مغرور
أستعد لمسلسل جديد مع خالد مرعي
أحب الكتابة وأمارسها منذ كان عمري 11 عاما
فنان مختلف، ذلك هو الانطباع الأول الذي يلازمك أمام السيناريست محمد أمين راضى، أثار ضجة حوله منذ ظهور عمله الأول مسلسل «نيران صديقة»، خاض بعد المعارك مع من اتهموه باقتباس عمله وكسبها في النهاية وكسب معها احترام وثقة الجمهور . كان لنا هذا الحوار
- بماذا تصنف مسلسلك "نيران صديقة"؟
** مسلسل اجتماعي يدور في إطار من الميتافيزيقا
- محمد أمين أحد الموهوبين اللذين شقوا طريقهم رغم الصعوبات إلى أن وصلوا للشاشة وقدموا أعمالهم، و لكن هناك موهوبين أخرين يأسوا في منتصف الطريق واكتئبوا، ماهو الفارق بينك وبينهم؟
** الفرق اللي بيني وبينهم إني مش بكتئب ... لأني دايما مكتئب ... الفرق الحقيقي هو إني مش بسيب نفسي ايأس ... من وقت ما اخترت الشغلانة دي وأنا عارف قد ايه انها شغلانة صعبة، وهتفضل صعبة لأخر يوم في عمر الواحد، أو لحد ما يعتزل ... غير كده عمرها ما كانت سهلة و لا هتكون طول ما الواحد بيحاول يقدم فن جاد و جيد .. أتمنى إن الناس اللي بتيأس في وسط الطريق تقف مع نفسها واقفة طويلة وتفكر هما فعلا بيحبوا الشغلانة دي ليه؟ ... ويجاوبوا على نفسهم بصراحة ... لو لأي سبب تاني غير الفن ... فأنصحهم لا ارجعوا ... لأنها شغلانة قاسية جدا ... لكن لو الاجابة كانت علشان الفن ... فطبعا لازم يكملوا و يشدوا حيلهم ويسيبوهم من اليأس .
- محمد أمين ألغى عقده مع شركة انتاج اعتراضا على اختيار ممثلة بعينها رغم انه لم يكن قد قدم أعمالا مصورة بعد ، هل هذا موقف من الممثلة أم رفض لفكرة الفرض؟
** أولا انتي تاني مرة تكرري اسمي محمد أمين .. وانا الحقيقة اسمي محمد أمين راضي ... محمد أمين ده استاذ محمد أمين المخرج ... بالنسبة للسؤال ... أنا ما عنديش مشاكل مع أي حد .. ومعروف عني كويس قوي إني ممكن اكون متخانق مع حد و اشتغل معاه عادي جدا طالما ده لمصلحة العمل .. أنا مشاكلي كلها مع الاحتراف واللياقة ... الاعتراض وفسخ العقد ما كنش على اختيار شخص بعينه .. على قد ما هو على مفهوم الفرض الاجباري ... و طريقة الفرض كمان .. لكن في المطلق لا ما كنش علشان الممثلة بل بالعكس اللي ما حدش يعرفه .. إن الممثلة دي كانت تصلح للدور جدا .
- يتهمك البعض بالغرور والنرجسية، هل عندك تفسير ؟
** ككاتب أنا لا مغرور ولا نرجسي ... أنا مجرد شخص معتد بنفسه ... و بيحترم فنه بشدة وما بيحبش الفتي الكتير ... كبني أدم عادي بقى ... أنا مش شايف نفسي مغرور تماما ... بس آه انا نرجسي جدا، أنا عندي تقريبا 25 صورة لنفسي على حيطة الصالة .
- هل هناك سيناريست في الدراما العربية ممكن أن يصل لقامة لأسامة أنور عكاشة، وبماذا تصف تجربة كاتب في حجم عكاشة ؟
** يوم ما أديب يقدر يوصل لقامة نجيب محفوظ ... هيبقى هو نفس اليوم اللي سيناريست يقدر يوصل لنفس قامة عكاشة ... تجربة عكاشة هي تجربة صعب قوي الكلام عنها في سطرين ... بس كل اللي أقدر أقوله ... إن الراجل ده ادى قيمة لكلمة مؤلف درامي ( سيناريست )، قيمة كبيرة قوي ما اخدهاش أهم مؤلفين الدراما في امريكا مثلا ..
- السينما تقريبا تلفظ أنفاسها الأخيرة في مصر، كيف تراها، وماهو مشروعك فيها؟
** أنا شايف إن الظرف السينمائي بقى صعب قوي ... بس اعتقد برضه إنه آجلا أو عاجلا هيتحسن .. بالتحليل الاقتصادي ما فيش ولا موسم سينمائي بعد الثورة خسر ... الفرق بس ... إن بقى في تراجع و خوف من المنتجين من الانتاج، ومشاكل كبيرة فى التوزيع الخارجي فكل ده عامل ربكة ... لكن فى نفس الوقت السوق الداخلي مع كل موسم بيثبت إنه مازال سوق شغال و مربح .. مشروعي فيها إيه ... مشروعي فيها زي التلفزيون بالظبط ما فيش فرق .. أنا واحد مخلص للكتابة أيا كان نوعها، الفرق بس هو نوع الوسيط و حدود الفكرة اللي في دماغي هل هي محتاجة ساعتين ولا محتاجة 20 ساعة ... .. في النهاية عندي عدة أفلام لسه ما تنفذش منها حاجة ... وأرجو إن في حاجة منهم تتنفذ قريب في ظل الظرف الصعب اللي احنا فيه ده .
- ابن السويس، هل في مشروعه الفني عمل يتحدث عن تلك المدينة المنسية؟
** آه طبعا بس أنا شايف السويس بشكل تاني خالص غير ما الكل بيفكر فيها أو غير ما اللي اتكتب أو اتصور عنها .
- هناك حملة مقاطعة لك من بعض الصحفيين بسبب اقتباس أقوال من على صفحتك على فيسبوك وغضبك الشديد من هذا، هل من المنطقي أن تعادي الصحافة، هل تخاف من تلك من الحملة؟ ولماذا لم توضح رأيك بحملة مضادة مثلا؟
** هرد على السؤال ده جزء جزء، أولا رغم إني مصر إن صفحات الفيس بوك وخصوصا لو كان صاحبها أعلن مرارا و تكرارا إنها صفحة شخصية جدا ...يبقى شيء غير احترافي تماما انك تاخد منها رأي أوتصريح من غير الرجوع لصاحبه سواء على الانبوكس أو بالتليفون ... ده كمان في أنهي حالة ... في حالة الاقتباس الحقيقي ... ما بالك بقى إن ما حدث كان نوع من التحريف لكلام أنا ما قولتوش ... انا يمكن أكون قولت أقسى منه ... لكن الكلام ده أنا ما كتبتوش .. فاللي عايز ياخد من صفحتي كلام يا يرجعلي يا يخليه شجاع وينشر اللي انا كاتبه نصا ... لكن انه ياخد الكلام ويكتبه على مزاجه فأعتقد ان ده تحريف أي صحفي محترم وبيحترم مهنته استحالة يعمله ... ثانيا أنا لم أعادي الصحافة ولا الصحفيين إالا أنا ليه بعمل معاكي حوار ؟؟؟.. نفس المنطق هو هو بحذافيره ... اللي قام بتحريف كلامي في الأول ... قام بتحريف كوميكس بسخر فيه من الخبر المحرف ... الموضوع كله تحريف ورخص صحفي وعدم احترافية ... اعتقد انك انتي شخصيا وأي صحفي محترم ما يوافقش عليه .. ثالثا حملات المقاطعة في مصر وش الخير على أي حد بتتعمل ضده ... في نفس توقيت الحملة بيتعرض مسلسلي للمرة التانية و محقق نسبة مشاهدة يمكن تفوق مشاهدة رمضان نفسها، اللي أصلا الحمد لله كانت عالية ... أنا الحمد لله واثق إني مكنتش غلطان ... رابعا .. اخد موقف إيه وأرد على الحملة بحملة مضادة ايه ... هو انا بتخانق مع عادل حمودة ؟؟؟ ولا ابراهيم عيسى .. .تصدقي بالله ... أنا ما فاكر اسم الصحفيات اللي كانوا بيشتموني خالص دلوقتي... أنا كل اللي عملتوا انهم زي ما حرفوا كلام متاخد من عندي على الفيس بوك ... رديت برضه على الفيس بوك.
- طالما تكلمنا عن الحملات، ماهو رأيك في حملة تمرد السينمائية؟
** أرجو انهم يقدروا يدبروا تمويل لتحقيق اهدافهم ... أي أهداف بلا تمويل مادي ... للأسف جهد مهدور ...
- وطالما ذكرت تمرد يذكر آل السبكي..توصف مدرسة السبكية في الانتاج بإيه؟
** أنهي مدرسة فيهم أحمد ولا محمد .. ولو أحمد ... أنهي نوع ... أفلام الخلطة السبكية اللي بينزل فيها في العيد ولا الأفلام اللي بقاله كام سنة بيقدمها واللي حتى لو اختلافنا على مستواها الفني فهي مالهاش علاقة من قريب او من بعيد بأفلام الخلطة .. زي "الفرح" و "كباريه" و"ساعة ونص" ... أو زي مثلا "عزبة آدم" ... اللي هما حقيقي مالهمش أي علاقة بالشكل السبكي الانتاجي أو الفني ؟... رأيي في أحمد السبكي واضح وصريح ... راجل بيحب الشغلانة وقف جنبها في لحظة الكل اتخلى عنها علشان العملية الانتاجية تفضل مستمرة .. بدل ما السينمات تقفل واللي شغالين فيها يقعدوا في بيوتهم ... وبلاش والنبي حد يرد يقول ما فيش حاجة اسمها سينمات تقفل لأن أنت كده واضح انك ما تعرفشإان في سينمات قفلت فعلا .
- هذا يقودنا لسؤال عن العلاقة بينك وبين السبكى و كريم السبكى ؟ هل هناك فعلا مشاريع أفلام مع كريم السبكى و أحمد السبكى ؟
** العلاقة الحقيقية اللي بتربطني بيهم هي إن كريم السبكي واحد من أقرب الأصدقاء ليا في الدنيا ... وأنا من أوائل الناس اللي امنوا بموهبته كمخرج في فترة هو نفسه كان لسه حتى ما صرحش لأحمد السبكي بده ... وآه في فيلمين المفروض إنهم اخراج كريم .. أحب اتكلم عن واحد منهم حاليا وهو من "ضهر راجل" ... اللي المفروض هيكون بطولة اسر ياسين ان شاء الله ... عن قصة حياة ملاكم مغمور.
- ماهي مشاريعك في رمضان المقبل بعد نجاح "نيران صديقة"، وهل تخشى المقارنة؟
** ان شاء الله بحضر لمشروع أنا و خالد مرعي لسه مش متأكد هو لرمضان القادم ولا لا .. مفيش فنان سواء مخرج او مؤلف إلا و دايما الجمهور والنقاد بيحطوه في مقارنة مع أعماله ... لكن بالنسبة ليا دايما بعتبر إن العمل اللي شغال فيه هو العمل الاول ... بنسى اللي كتبته قبل كده و اللي عايز اكتبه بعد كده و بكون مع العمل ده فقط ... و أرجو من الله إنه يوفقنا فيه .
- هل انت مقتنع بفكرة الفن الهادف؟
** انا مقتنع بفكرة الفن الجيد
- كيف تقيم الأفلام، وهل أنت مع التصنيف العمري لها؟
** الأفلام تتقيم فنيا ... جيدة فنيا أم رديئة فنيا فقط ... ما فيش أي تقييم تاني أعرفه أو مؤمن بيه أو يعنيلي شيء غير التقييم ده .. وطبعا أنا مؤمن بالتصنيف العمري رقابيا جدا.
- ماهو رأيك في حملة الهجوم على المخرج أحمد عواض الرقيب بسبب فيلم أسرار عائلية ؟
** أحمد عواض لو كان مازال مخرج ... وشاف الفيلم موضوع الخلاف ... وطلع عمل مثلا حملة ضده .. أو طالب بتدخل النقابة لمنعه ... أو مثلا كتب مقال بيطالب فيها بمنع الفيلم لأنه فيلم مبتذل أو ضد القيم ...كان من حقنا نقفله بالمرصاد ... ونقوله لا فوق .. و اعرف انت بتكلم مين وافتكر تاريخك إلى أخره .... ولكن أحمد عواض الموقف اللي هو اخده .. اخده كرقيب ... فبالتالي أي موقف مضاد ناخده ضده .. ناخده منه كرقيب .. و كرقيب فقط ... نهاجم التاريخ السيء للرقابة ... نفهمه أن العصر اتغير ... نفهمه إن انت بتقول كلام عكس اللي قولته أول ما مسكت الرقابة ... نصعد الرأي العام الثقافي ضده ... كرقيب ... ساعتها بس هو ده القياس الصح ... لكن المعايرة بتاريخه الإخراجي ... شيء في منتهى الابتذال لا يقل عن أفلامه محل المعايرة ابتذالا.
- نرجع لبداياتك متى قررمحمد أمين راضي أن يكون سيناريست ؟
** انا بحب الكتابة و بكتب تقريبا من وأنا عندي 11 سنة وعمري ما كان عندي طموح روائي بالعكس دايما كان هدفي إني أكون مؤلف درامي ( سيناريست ) بس ما كنتش اعرف شكل الوسيط ... لذلك كنت بكتب الشكل اللي اعرفه وهو الرواية .. لكن أول ما عرفت شكل الوسيط اللي هو السيناريو كتبت على طول سيناريوهات ... وإن كان حاليا بقى عندي طموح اني في يوم من الأيام أاقوم بكتابة رواية مرة واحدة فقط كتجربة زيارة لوسيط أخر .
- ما هو رأيك في ورش السيناريو التي تكتب مسلسلات ؟
** مش ضدها كفكرة من المعروف إني بشرف على بعض الأعمال اللي بيقوم بكتابتها ورش ولكن بشكل شخصي أنا لا احب مشاركة الكتابة مع اخرين ... الكتابة بالنسبة ليا فعل فردي ديكتاتوري جدا ما بعرفش يشاركني فيه حد، لذلك أنا مش بحبذ النوع ده من الكتابة وما بعرفش أشارك فيه .