عبد اللطيف المناوي: بعد 69 عاما من الابداع غيب الموت في الاسبوع الماضي الكاتب والسيناريست اسامة انورعكاشة ، حصل على ليسانس الاداب قسم الدراسات النفسية والاجتماعية بجامعة عين شمس عام 62 وعمل بعد تخرجه اخصائيا اجتماعيا في مؤسسة لرعاية الاحداث ثم مدرسا في مدرسة بمحافظة اسيوط قبل ان ينتقل للعمل في ديوان محافظة كفر الشيخ ثم اخصائيا اجتماعيا في جامعة الازهرحتى عام 1982عندما قدم استقالته ليتفرغ للكتابة والتاليف ، اصبح اسامة انورعكاشة عميدا للدراما العربية ورائدا في الادب التليفزيوني باعمال حفرت في وجدان ملايين المشاهدين في العالم العربي اصبحوا يربطون الدراما باسمه يلتفون حول شاشات التليفزيون ليتابعوا همومهم التي يصيغها في مسلسلات درامية باحثا عن الحقيقة الشئ الذي ميز اسامة انورعكاشة انه مصري حتى النخاع حتى في القضايا التي ناقشها فبكتاباته والقضايا التي قدمها والتي كان لا يتبنى فيها الا مايرى انه يصب في صالح الوطن والمواطن والهوية المصرية والذي كان يجبرك حتى في اختلافه على احترامه ، اسامة انور عكاشة ظل خلا حياته ومن خلال كتاباته التليفزيونية اوالصحافة اومن خلال حواراته التليفزيونية على موقفه لم يغيرما اعتقد انه صحيح من افكاره التي امن بها وهي محركه الاصيل وهي محدد كتاباته لم يبدد فكره اوقلمه مرة لم تكن كتاباته موظفة من اجل شخص ايا من كان او لاي اصحاب توجه قادرون على ان جعله يتبنى هذا الفكر او تحت اثرياء المنطقة لم يفعل هذا يوما ولم يتنازل عما اعتقد فيه دائما احد اهم القضايا التي ظل على موقفه فيها هو ذلك الموقف عن الاعلان على الدراما التليفزيونية حيث كانت رؤيته دائما ان سبب الازمة الحقيقية للدراما العبية هي انها باتت تنساق وراء اموال الاعلانات واصبح من بيده القرارهو المعلن وليس المبدع هذه السيطرة دفعت بالعديد من المبدعين ان يتسابقوا وراء من بيده القيادة ووظفوا ابداعهم بشكل او باخرلسطوة اموال الاعلانات ولكن ظل اسامة انورعكاشة عصيا على هذه السطوة مستمرا في طريقه الذي امن به وظل كما هو رحم الله اسامة انورعكاشة فاصل عبد اللطيف المناوي: السيدات والسادة اهلا بكم من جديد عندما نتحدث عن الدراما العربية فنحن بالاساس نتحدث عن الدراما المصرية وذلك لاسباب كثيرة ليس فقط منها التاريخ ولكن ايضا حجم الاسهام والحضور في الثقافة العربية طوال نصف قرن قد تكون الدراما المصرية في هذه المرحلة تمر بمرحلة مهمة في حياتها في تطورها قد يكون هناك تطورات اخرى مختلفة على الساحة الداخلية والساحة الخارجية قد يكون هناك اطراف اخرى اصوات اخرى اضافات اخرى وهي ايجابية بكل تاكيد ولكن تظل الدراما المصرية هي العمود الفقري للدراما العربية يسعدني ان يكون معي اليوم عندما نتحدث عن الدراما المصرية لم يكون هناك افضل من ان يكون معنا الاستاذ اسامة انور عكاشة اهلا بيك يافندم اسامة انورعكاشة: اهلا وسهلا استاذ عبد اللطيف عبد اللطيف المناوي: كل سنة وانت طيب ..و زي ما حضرتك سمعت في التعليقات بتاعة الناس و زي ما حضرتك متابع بالتاكيد هناك تساؤلات كثيرة عن وضع الدراما المصرية في هذه المرحلة اطلب منك في البداية ان تضع تشخيصا كيف ترى انت الدراما المصرية في هذه المرحلة بشكل عام في البداية وندخل تفصيلا فيها هل بتعتقد انها بتمر في هذه المرحلة بحالة صحة ام حالة ....... اسامة انورعكاشة: مرض..باختصار انا كنت محتاج لتاصيل لمدة دقائق للدراما المصرية..الدراما المصرية دراما من ابداع المصري قد يقال ان هناك مسلسلات امريكية او اوروبية او غيرها سبقت تاريخا الدراما المصرية ولكن الدراما المصرية بقواعد المشاهدة وقواعد الاحساس بالناس وقواعد الحكي التي اعتاد عليها المصريين والعرب كلهم من ايام الف ليلة وليلة اللي هو القصاص ييجي لغاية نقطة معينة والديك يدن يقولك خليك لبكرة هو نفسSystem المسلسل كما اقرته قوى الابداع المصرية منذ بداية الستينيات من اول ما بدا الرائد الاول الاستاذ نور الدمرداش يعمل مسلسلات الضحية والرحيل والنصيب وبعدين كان المسلسل بيتذاع كل اسبوع وكان المفضل دايما يبقوا 13 حلقة عشان نظام الدورة اللي كان موجود.. بالتدريج بدات بالذات بعد ما لون التليفزيون ، بدا الاقبال اكتر على انتاج الدراما وبقت الشاشة محتاجة للدراما التليفزيونية عشان تثري برامجها ، بدات المسائل على استحياء ثم تسارعت الخطى وتسارعت وتسارعت حتى وصلنا بعد ما كنا بنفخر ان احنا بنقدم على قناتي التليفزيون الارضي - مكانش فيه بث فضائي كان فيه قنوات ارضية - كنت تقدم مسلسلين اجتماعيين هنا ومسلسلين اجتماعيين هنا وحالا يبقى فيه مسلسل ديني ومسلسل تاريخي وكانت الامور متزنة الى حد كبير يعني احد الاخوة من الجمهور اللي استفتيته رايه قالك فين رافت الهجان فين ليالي الحلمية .. انا اذكران الاثنين كانوا بيتواقتوا مع بعض كانت قناة بتذيع ليالي الحلمية وقناة بتذيع رافت الهجان والناس عندها قدرة على استيعاب عملين وتلاتة انما بقى جه الطوفان او جه الفيضان امتى..؟ مع بدايات التسعينات او من منتصف التسعينات جت هجمة الاعلان ..الاعلان غير قواعد اللعبة تماما او الانبطاح امام الاعلان دا اللي انا اقصده ، الاول كان اتحاد الاذاعة والتليفزيون كان بينتج الدراما بتاعته وكان بينفق عليها بدون احتياج لاي طرف اخر وكانوا بيجروا اصحاب المحطات في الوطن العربي كله يجروا على التليفزيون المصري قرب رمضان عشان يتوسلوا بكل الوسائل عشان ياخدوا الانتاج المصري كانوا بيتخانقوا عليها المهم جه الاعلان الاول تسلل ببطء ان هو ييجي اعلانين قبل التتر وبعدين بعد التتروبعد شوية بدا يقطع جوه عشان ينزل اعلان وانا فاكر في احد مسلسلاتي التي كانت بتذاع ان انا ثرت ثورة عارمة واشتكيت للوزير وقلت له قطع المسلسل اواحداث الدراما عشان نعلن عن السمنة او الشاي دا عيب ودا اهانة للناس اللي بيكتبوا والناس اللي بيتفرجوا ولم يدر بخلدي على الاطلاق ان تصل الى ما وصلنا اليه اليوم .. ايه بقى اللي حصل..؟ ان الدراما نزلت السوق المفتوح يعني ايه..؟ اللي هو بيتصارع فيه الجميع على كعكة الاعلان بما فيهم الشركات التابعة لاتحاد الاذاعة والتليفزيون كله نزل يتاجر وكله نزل يبيع ويشتري ويكسب عبد اللطيف المناوي: طب هنا خليني اقف في النقطة دي تحديدا هل ما بتعتقدش حضرتك ان دا تغير طبيعي في الاليات احنا المجتمع كله اصبح بتحكمه بشكل رئيسي اليات السوق وجزء رئيسي منه اصبح راس المال له دور رئيسي وجزء من اقتصاديات المسالة او المسالة الدخل الخاص.. طب هل ما بتعتقدش ان دا تطور طبيعي للتعامل مع الدراما زي ما هو حاصل في العالم كله؟ اسامة انور عكاشة: العالم كله بيعتمد اسلوب الاعلان في المسلسلات الاجنبية الفيدات اللي بتبقى موجودة وبيكتبوا عليها Commercial عشان يعرفوا ان دي مساحة مخصصة بس بيعملوها ازاي ..؟ اولا بالكم الرهيب دا مش ممكن هات لي اي تليفزيون او اي قناة في اي بلد فضائية او ارضية بتعمل اللي احنا بنعمله دا انه يقعدك لمدة ربع ساعة واخد بالك والاعلانات نازلة ومفيش دراما وبعدين تكون نسيت كل حاجة او حولت على قناة تانية المهم ايه كمان ان هما بييجوا هناك ييجي المنتج ال Producer ييجي للكاتب او السيناريست والمخرج يقولهم ادوني في كل حلقة تلاتة Spot للاعلان فتتعمل بمعرفة قبل المسالة اقطع انا ككاتب استغلها حتى لصالح الدراما خدت بالك ويقدر المخرج يحدد لها المكان اللي يمشي مع احداث الدراما بتاعته عبد اللطيف المناوي: يعني انت لست معترض على وجود الاعلان داخل الدراما او داخل الاعمال الدرامية ولكن انت معترض على الاسلوب ؟ اسامة انور عكاشة: حاولنا يا عزيزي وما افلحش مفيش فايدة محدش وافق ان هو يكتفي في الحلقة بتلات اعلانات لان الطوفان جاي وجايب معاه فلوس وجايب معاه هبر كتير قوي قوي مين اللي هيفكر ياعم اتكل على الله خلينا نكسب دا ما ينطبقش ع الفن الا اذا الفن امتهن ونزل السوق عشان ينداس عليه بالرجلين بالله عليك لما يكون فيه مترقبين او متنمرين نجومك بالدقايق اللي بيجيبوها في الاعلان ويترتبوا على هذا خدت بالك طاردا الكيف لحساب الكم احنا عايزين فلان وفلانة وفلانة وفلان يروح المنتج جري عليهم اشتغلوا معايا في رمضان ، تدفع كام بدات من هنا الهوسة بتاعة الاجور او الارتفاع الفلكي للاجور وبتحصل ازاي تحميلا على ميزانية العمل الحقيقية يعني ميزانية العمل بقى تلتينها بياخدوه النجم والباقي يتصرف ويطلع المستوى هزيل بالاضافة الى انه بدا عشان يلحقوا الموسم السنوي اللي انت حضرتك سميته عن حق المولد "مولد سيدي الدراما" واخد بالك يعملوا ايه عايزين يلحقوا النجم عايز يلحق عشان الهبرة والمنتج عشان الهبرة كله عشان يلحقوا عبد اللطيف المناوي: هنا لا نستطيع ان نلوم من يرغب في ان يحقق ربح وفي نفس الوقت ينبغي ان نضع في اعتبارنا كيف يمكن الحفاظ على دا مع القيمة الدرامية هل هناك وسيلة مع ان فيه تناقض بين الاتنين هل ممكن احداث شكل من اشكال المزاوجة بين الاتنين التوافق بين الاتنين اسامة انور عكاشة: يا سيدي العزيز انت تعلم اكثر مني انه في السوق ان العملة الرديئة تطرد العملة الجيدة خدت بال حضرتك فاحنا هنا نزلنا بالدراما سوق بقى منطق السوق هو اللي حاكم بقى الاعلان هو اللي بيقرر مصير اي دراما تتعمل يعني حتى اختيار العرض ال prim time للمسلسلات اللي عليها اعلانات اكتر النجم فيها بيجيب اعلانات اكتر فيه السنادي مثلا انتج مسلسل شديد الرقي اسمه " ظل المحارب " انت سمعت عنه..؟ حد من السادة المشاهدين لمحه ؟ مع انه مفروض يعرض على قناة الدراما وقناة تانية مش فاكر اسمها ومع ذلك لم يشاهده احد كما لو كان جريمة بيخفوها وهو من ارقى النصوص الدرامية اللي كانت موجودة عبد اللطيف المناوي: اللي يتحكم به هنا سوق الاعلان هو اللي يحدد انه ينزل هنا اوينزل هنا ؟ اسامة انور عكاشة: هشام سليم بيجيب اعلانات قد ايه ؟ دا كان السؤال عبد اللطيف المناوي: طب هنا السؤال هنا برضه مرة تانية المنطق يقول طالما ان احنا في مجتمع ارتضى ان يكون اليات السوق هي التي تحكم الاقتصاد وكله اسامة انور عكاشة: لا دا مش قضاء وقدر عبد اللطيف المناوي: طب ازاي يمكن حل المشكلة حل الاشكالية ازاي ؟ اسامة انور عكاشة: حل الاشكالية ازاي ..انا مجتهد قدمت رايي في الحل امبارح في مقال اسبوعي بكتبه في جريدة الوفد قلت فيه الحل الحاسم ولا بديل له هوابعاد الدراما عن رمضان ، فك الاشتباك وفك الاحتقان بين الدراما وبين شهر رمضان ..رمضان بقى موسم للاعلان بقت اللي بيتقدم اعلانات متعاصة دراما يا استاذ عبد اللطيف واخد بالك تقعد تتفرج على مشهدين بالظبط ويجيلك 10 دقايق اعلان تكون ايه بردت نسيت تقول على ما تخلص الاعلانات شوف بقى السادة المعلنين والغباء الاعلاني ان هو يكره المشاهد في السلعة اللي بيعلن عنها لانه بيقل مزاجه بيعمل له عملية Interruption فيروح يدور على قناة تانية مفيهاش اعلانات يتفرج شوية وبعدين لما تيجي الاعلانات عليها يقوم راجع وهكذا محدش ركز محدش شاف حاجة دراما ماشفهاش حد خدت بال حضرتك يعني الماساة وصلت ان فيه بننتج 40 مسلسل عبد اللطيف المناوي: 44،45 ؟ اسامة انور عكاشة: 44 مسلسل والناس مش قادرة تحدد اتسم عشر مسلسلات عبد اللطيف المناوي: طب هل العدد الكبير من المسلسلات ، العدد الكبير من الانتاج ؟ اسامة انور عكاشة: الكم عبد اللطيف المناوي: الكم الكبير دا هل هو دلالة صحة ام دلالة خلل ؟ اسامة انور عكاشة: دا دلالة خلل اكيد عبد اللطيف المناوي: طب اذا كان هناك من يحتاج يعني اذا مكانش فيه رغبة في الاستهلاك ما كانش فيه رغبة بالتعامل اسامة انور عكاشة: الناس على فكرة المسالة متعلقة بسياسة الاعلان ، انا باكد الاعلان بالنون خدت بال حضرتك هي دي اللي ادت الى انهيار البنيان الشامخ اللي حققته الدراما المصرية في سنوات سابقة عبد اللطيف المناوي: طب هل هو دا السبب ولا انتشار العدد الكبير من الفضائيات اللي بيحتاج الى عدد كبير من الساعات لملء هذه الساعات من الانتاج؟ اسامة انورعكاشة: طب وتكون النتيجة ايه اللي جه السنادي قالك ماحناش واخدين دراما مصرية بعد ما هبط المستوى نتيجة لسيادة منطق الربح والاعلان فقالك لا احنا ناخد من سوريا ومناخدش من مصر عبد اللطيف المناوي: طب انا هدخل لموضوع المقارنة بين المستويات في الدراما وكذا ولكن بعد ما اسال في فترة من الفترات كان فترة السبعينات النصف التاني من السبعينات والثمانينات من القرن الماضي كان انتشرما اطلق عليه سينما المقاولات افلام المقاولات نتيجة لوجود رغبة هل هناك شكل من اشكال التشابه بين المرحلة دي في السينما ومرحلة الدراما اسامة انورعكاشة: يا عزيزي الخطا يولد من جديد واخد بال حضرتك واذا كانوا بيقولوا التاريخ بلا ذاكرة لا..التاريخ بيعيد نفسه هنا كمان المسالة بتتعاد بتتكرر نفس الاخطاء او الخطايا اللي كادت تهدم السينما المصرية خدت بالك بتحصل في هذه السنوات في الدراما التليفزيونية وعلى فكرة لا اخص مصر بالتحديد بل كل مراكز الانتاج في الوطن العربي لان بقى فيه نوع زي انتاج الشركات المتعددة الجنسية يعني اذا بصيت لمسلسل وهو مسلسل محترم جدا " اسمهان" هتلاقي مشتركة فيه جهود مصريين واردنيين وتوانسة وسوريين خدت بال حضرتك وقدمه تحفة ودا في نظري النموذج الامثل للتعاون العربي ان احنا نحسبها بالزائد ما نحسبهاش بالناقص يعني اي نجاح لاي عمل فني في وطن عربي هو نجاح للفن العربي عموما ما نحسبهاش نقول لا دا فلان احسن من فلان دا سوريا سحبت البساط دا مصر الريادة دا مش عارف الكلام داى كله كلام "شوفيني " واقليمي بيزود الطين بله والمشرحة مش ناقصة قتلا عبد اللطيف المناوي: طب هل الخلل الحادث في الدراما المصرية اوالضعف اللي بيعتري الدراما المصرية في هذه المرحلة هل هو ضعف اصيل وللا ضعف عرضي ضعف مرحلة وللا ضعف في الكيان نفسه؟ اسامة انورعكاشة: ضعف مرحلي ولذلك من السهل القضاء عليه واعادة القوة الى جسد هذا الفن الذي اعتبره فن مصري اصيل ، الدراما هي فن مصري اولا وعنه اخذ الاخوة وتعلموا وقد يكونوا في بعض النماذج تفوقوا انما زي ما بيقولك ايه حكاية الاستاذ والتلميذ ان ممكن التلميذ يفوق استاذه احيانا ولكنه لا يمكن ان يعمل الا بما تعلمه من هذا الاستاذ دي قضية مفروغ منها ، لا شك ان دا ظرف عارض فرضته قوانين السوق وارتباط الدراما بالاعلان ودي مسالة سهلة عبد اللطيف المناوي: طيب هنا برضه مرة تانية هارجع معاك لفكرة الدراما والاعلان الدراما والاموال الدراما كعملية اقتصادية الدراما في جانبها الاقتصادي ..الدراما في جانبها الاقتصادي ينبغي ان يكون هناك من يدفع عشان تظهر المسلسلات عشان تظهر الدراما ومحدش هيقدر يدخل يبادر بالانتاج الا اذا كان هناك عائد يمكن ان يحصل عليه طيب كيف يمكن حل الاشكالية بين ان تكون هي صناعة بتعني انه بيدخل فيها مدخلات مادية وتحقق ارباح وتقدم دراما جيدة ازاي تحقق المعادلة دي؟ اسامة انور عكاشة: يعني ما يجبش نصعب المسالة عبد اللطيف المناوي: سهلها لي اسامة انور عكاشة: ونعمل تناقض بين الفن والربح ، الفن الجيد بيجيب ربح وعايز تسال حضرتك الهجان وليالي الحلمية وهو وهي واخد بالك و"اديب" و"زينب والعرش" كل الاعمال العظيمة والبديعة التي انتجها القطاع العام كانت بتخسر..؟ مكانتش بتخسر ..هو بس فيه فترة اقتصادية مرت بيها مصر كانت محتاجة للسيولة قوي خدت بالك فاضطر التليفزيون انه يطاطي البصلة وياخد الاعلانات بحجة ايه ما هي اتقالت لي مرة في احد الاجتماعات ما احنا بناخد الاعلانلات دي عشان انتو تكتبوا عشان نصرف عليكوا كما لو كنا بنستعطى عبد اللطيف المناوي: هل بتعتقد ان مثل هذه الاعمال اذا ما تم انتاجها الان يمكن ان تحقق العائد الاعلاني ؟ اسامة انور عكاشة: بكل هذا الكم عبد اللطيف المناوي: اه اسامة انور عكاشة: طب وليه ايه حاجتنا للكم دا هو اساسه وهو بيتعمل عشان يخدم الاعلان عبد اللطيف المناوي: هل الكم من الدراما اللي بيتم انتاجه هو تعبيرعن احتياج من المتلقي ، الناس المشاهدين للتليفزيون اسامة انور عكاشة: لا لا لا ..هو احتياج من التاجر سواء كان معلن ام منتج خدت بال حضرتك انما المواطن ما ناس لسه بتقولك كفاية علينا نتفرج على "الهجان" في قناة و"الحلمية" في قناة و"هو وهي" في قناة و"الشهد والدموع" في قناة وييجي المسلسل اللي اخرجه المرحوم الاستاذ طنطاوي "محمد رسول الله واللذين معه" اللي قعد على مدى كذا رمضان وبعد كده قدم الاستاذ احمد توفيق "هارون الرشيد" و"عمر بن عبد العزيز" بمناسبة الاعمال التاريخية يعني و جه حسام الدين مصطفى عمل مسلسلين من اهم المسلسلات التاريخية في تاريخ التليفزيون وغيرها وغيرها وغيرها و"على هامش السيرة" لما اتعمل في التليفزيون المصري و"الوعد الحق" اتعمل في التليفزيون المصري بانتاج قطاع عام مفيش حد من بره دفع مليم وجت الايرادات وغطت بالربح عبد اللطيف المناوي: طب حضرتك تقريبا للمرة التالتة بتكررفكرة القطاع العام وقيامه بدورالانتاج هل بتعتقد ان حل مشكلة الدراما المصرية تكمن في ان يكون للقطاع العام دور؟ اسامة انورعكاشة: انا مش حدخل في مشكلة القطاع العام والقطاع الخاص لا لا لا ما انت قلت حضرتك ان احنا بقينا ماشيين على مبدا وعقيدة الاقتصاد الحر ..لا ..انا باضرب مثل ايام ما كان التليفزيون بلاش القطاع العام ايام ما كان اتحاد الاذاعة والتليفزيون هو اللي بينتج مكانش بيخسرعشان ما ندخلش الربح والخسارة في الموضوع ونقول هو هيقعد يخسر لامتى ..لا..دا يمكن استدان بعد كده بعد ما بدات سيطرة ال Star system ونجومية الممثل وانزاحت جانبا نجومية النص ونجومية الاخراج ما هوانت يا اما تحافظ على الكيف يا اما تبيعه لصالح الكم هي مالهاش حل تالت لا يمكن التوفيق بين الكيف والكم دا اللي يقدريعمله التليفزيون او الدولة انما عايزتتاجر مع اللي بيتاجروا خلاص طلع الدراما اللي انت بتطلعها بال 140 مسلسل عبد اللطيف المناوي: طيب هنا برجع مرة تانية فيما يتعلق بفكرة الانتاج وهل تعتقد ان هناك من المنتجين العاملين في القطاع الخاص يمكن ان هو يتبنى مثل هذا التوجه اللي بيتكلم عن دراما جادة دراما حقيقية هل هناك.....؟ اسامة انورعكاشة: انا اتعمل لي مسلسل هنصور جزئه التاني بعد العيد اسمه "المصراوية " ومسلسل مكلف وجاد جدا وما فيهوش هزار دراما ما بتهزرش يعني وحضرتك تقدر ترجع لاراء النقاد فيه ، عملته شركة مصرية قطاع خاص عبد اللطيف المناوي: هتعمل ايه مع الاعلان يا استاذ اسامة ؟ اسامة انورعكاشة: ما انا طلبت قلت لك الاعلان هيكون هيتوزع السنة كلها يعني بدل ما تبقى اللكشة كلها في رمضان عبد اللطيف المناوي: خلينا في نموذج يعني انت النهاردة بعد ما بينتج المسلسل دا ويتم اخراجه..... اسامة انور عكاشة: بيتفرض عليا الاعلان عبد اللطيف المناوي: بيتفرض عليك الاعلان؟ اسامة انور عكاشة: اه.. عبد اللطيف المناوي: هيقطعوا وقت ما هم يقرروا يقطعوا؟ اسامة انور عكاشة: بالظبط كده عبد اللطيف المناوي: ويدخلوا وقت ما هم يقرروا يدخلوا ؟ اسامة انور عكاشة: بالظبط..دا يسد نفس اي واحد على انه هو يواظب يواصل اللعبة يقولك لا مفيش فايدة اللي مطلوب دلوقت" الهفا " اللي مطلوب دلوقت حدوتة قبل النوم واتجوزوا وجابوا صبيان وبنات وعاشوا في تبات ونبات والحاجات دي كلها دي الحواديت اللي بتتعمل اللي بتخلينا نقول يا عالم دا كل دا مكرر يا عالم دا اتعمل قبل كده دا كله نسخة من بعضه ليه ..؟" سلق " الرغبة في الربح تعمل ايه ؟ صربعة ..اسلق ..هات النجم المبشر بالاعلانات هاتله مالفاتي يقعد تحت ايده يدوقه مشهد بمشهد ونعمل المسلسل في 3 اشهر كتابة وتصوير واخراج عبد اللطيف المناوي: طب خلينا تعبيرالمالفاتي اللي حضرتك اتكلمت عنه دا هل من الملاحظ حسب فهمنا بتاع زمان ان كان بيتم كتابة المسلسل ثم بعد ذلك يتعمل Casting او يتعمل تسكين للادوارعلى طبيعة المسلسل ..الان الامور بقت مختلفة ان النهاردة بيقعد السيناريست او المؤلف او الكاتب ويطلب منه ان يكتب مسلسل لفلان او فلان او فلانة؟ اسامة انورعكاشة: محدش يقدر من محفوظ عبد الرحمن طلب زي دا ولا من وحيد حامد ولا من العبد لله الكتاب اللي كانوا بيحترموا القاعدة اللي انت بتتكلم عنها سيادتك زمان عمرهم ما هيفرطوا في عقيدتهم اطلاقا محدش يقدؤر يطلب مني النهاردة ان انا اقعد جنب حد اكتب له ، راجت فكرة ان الدراما بتجيب فلوس واللي يالفوا دول بيهبروا المال فكله اتجه عديمي الموهبة وانصاف الموهوبين اي حد بيعرف يقسم الصفحة يمين وشمال خدت بالك ويفك الخط ما اسهل عليه انه يكتب اي كلام دا احنا قدامنا ناس كتبت لبعض الفنانين او الفنانات ما بيعرفوش يفكوا الخط وصلت المهزلة لهذه الدرجة ما بقاش فيه قيمة للورق يا استاذ عبد اللطيف باختصار شديد اتهانت الدراما المصرية يوم ما اصبح الورق مهمل او النص الورق دي كلمة شايعة في الوسط انما هاقولها لك التعبير العلمي عنها النص مافيهوش دراما ..نص خالي من الدراما يتعمل باي تلفيق انا ما رضيتش اقولك الملفقاتي فقلت المالفاتي وييجي ع المقاس قص من هنا حتة طب اقطم الحتة دي طب هات بنسة هنا بالمازورة عشان تيجي على مقاس البطل او البطلة المطلوب صنع الدراما له عبد اللطيف المناوي: ماذا انتم فاعلون انتم خلينا نقول انتم ارباب هذه المهنة سادة هذه المهنة الاستاذ وحيد الاستاذ محفوظ اسامة انورعكاشة: لم نعد نحن ارباب احنا تاريخيا ارباب هذه المهنة انما دلوقت قوانين السوق فرضت نفسها على ام امهات رؤوسنا خدت بال حضرتك طب انا عايز النهاردة ايه مسلسلي ما يتذاعش في رمضان وصلت الى هذا الحد ان انا بقيت ارحب ان مسلسلي يبقى برة رمضان سعيا للنقطة اللي انا بقولها لك افك الاشتباك بين الدراما ورمضان عبد اللطيف المناوي: طيب خليني ارجع للاقتراح اللي حضرتك ذكرته وهو يبدو له منطق ولكن في نفس الوقت يبدو وكانه غير قابل للتطبيق في ظل اللي حادث النهاردة هل بتعتقد ان فكرة فض الاشتباك تخليص رمضان من الدراما لو قرر اتحاد الاذاعة والتليفزيون لو قادة التليفزيون المصري وحده لفض هذا الاشتباك هل بتعتقد ان الحالة الدرامية العامة يمكن ان في ظل .....؟ اسامة انورعكاشة: مصر دايما leader يعني هاقولك حاجة دا هيؤدي بالضرورة للاقتراح دا لارتفاع مستوى النص هنرجع تاني لسيادة النص الاختيار على اساس الافكار الجيدة والنصوص الجيدة سنة او اتنين هتلاقيهم بيجروا ورانا تاني هتقولي هما هيعملوا على كيفهم هيعملوا بمين اذا كانت الكوادر الاساسية للعملية موجودة في مصر ينتجوا محدش هيمنعهم من الانتاج ينتجوا السوريين ينتجوا عبد اللطيف المناوي: طب خليني اسالك هنا فيما يتعلق بمسالة الاعلان والدراما هل مسالة علاقة الاعلان والدراما وما اسميته الانبطاح امام الاعلان هو حالة بتنفرد بيها الدراما المصرية ام انها حالة بتسقط امامها الدراما العربية واتحدث عن الدراما السورية ، الدراما الخليجية اسامة انورعكاشة: الثقل الجماهيري فين ..؟ عبد اللطيف المناوي: اكيد في مصر اسامة انور عكاشة: طيب.. دا كافي للردعلى سؤال حضرتك ما يهمنيش هناك نجح OK طب ما المسلسلات الخليجية ناجحة عندهم جدا وبتاخد المرتبة الاولى انما لو جيت عرضتها في مصر محدش هيتذوقها عبد اللطيف المناوي: عندهم طاش ما طاش ، كلنا عيال .......... اسامة انور عكاشة: حاجات من دي خدت بالك احنا بنحاول نتفرج عليها نفسنا نتجاوب مقدرناش انما نتفرج ع الدراما السورية لان اللهجة قريبة الطباع قريبة كان فيه وقت من الاوقات بنقول ان التاريخ واحد عبد اللطيف المناوي: فيه قدر عالي من التشابه. اسامة انور عكاشة: بالظبط دي المسالة انا شخصيا بافرح لما بشوف مسلسل سوري دا اضافة ليا مش انتقاص ليه بقى نخش في حتة اسحب البساط ولم السجادة والكلام دا كله عبد اللطيف المناوي: وهو فكرة الحقيقة هذه القضية الاخرى المطروحة هي فكرة التعامل مع الموضوع باعتباره شكل من اشكال الصراعات ما بين اشكال من الدراما وما بين جنسيات الدراما ان صح التعبير جنسيات دراما مختلفة وفكرة هل من يسحب السجادة مِن من ، من يؤثر في من ، من صاحب الحضور الاكبر هذا هو ما سوف نناقشه بعد هذا الفاصل القصير؟ فاصل عبد اللطيف المناوي: السيدات والسادة اهلا بكم من جديد استاذ اسامة انور عكاشة تحدثنا او اشرنا قبل الفاصل عن الدراما المصرية والسورية ولكن فقط عندما فكرنا في الفيديو اللي قدمناه منذ قليل في هذا الفاصل القصير قصدنا بان نذكر بتاريخ الدراما المصرية هذه هي اضافات الدراما المصرية في وجداننا وفي عقولنا وفي تاريخنا العربي ولكن قبل الفاصل كنا بنتكلم عن الدراما المصرية والدراما السورية والحديث عن تنافس انا مش عارف الحقيقة هل هو تنافس مزعوم و للا تنافس حقيقي هل هو محاولات لسحب السجادة من طرف مقابل طرف انت رايك في الحالة دي ايه ؟ اسامة انورعكاشة: هو التنافس مبدئيا شيء محمود يخلق حالات التفوق انا لما بشوف عمل زميل من زملائي عمل جميل حلو بابقى نفسيا بقول ايه الله ياريتني انا اللي كتبته خدت بال حضرتك فدا نفس الوضع يعني فيه اعمال سورية وخصوصا في مجال التاريخيات لفتت النظر والناس كلها اعجبوا بيها احنا ماحسدناش صقفنا خصوصا ان انتاج التاريخيات عندنا انسحب بسبب نفس القضية اللي اتكلمنا فيها مين هيعمل اعلانات على المسلسلات الدينية والتاريخية انما لما تخش المسالة بقى في مين الافضل استخدام افعل التفضيل هنا بقى هو المشكلة واحنا زي ما قلت لك الوحدة الوحيدة اللي افلحنا في تحقيقها هي الوحدة الفنية والثقافية احنا معرفناش نعمل وحدة سياسية ولا وحدة اقتصادية ولا وحدة عسكرية ولا اي وحدة من اي نوع انما فنيا وثقافيا فيه وحدة عربية فعلا قايمة على اساس الكتاب والراديو والغناء والسينما واخيرا دراما التليفزيون دي الاسس الاعمدة اللي قايم عليها الوحدة الفنية العربية فلما نيجي نقول لا دا احنا احسن منكم انتوا خيبتوا يعني يحضرني موقف غريب كان في احدى القنوات الخاصة استحضروا فيه استقدموا واحد سوري في مقابل صحفي مصري خدت بال حضرتك وكان شيئ حقيقي مؤلم لان اللهجة الشوفينية المغرقة التي تحدث بها الاخ السوري تدل على انه بيتكلم عن اعداء مش اخوة عبد اللطيف المناوي: بالظبط فيها تجني وفيها قسوة اسامة انور عكاشة: وساعده وللاسف الشديد مقدم البرنامج اللي كان بيقدمه فيعني شيء انا خجلت لحظتها من اي حد يقول انا عربي ..اخوة ايه..!! الله هو انا عملت عمل كويس طب ما انت تعمل احسن وانا اعمل الاحسن الاحسن دي المفروض المنافسة الشريفة عبد اللطيف المناوي: في هذا الحوار استحضر ما ذكرته انت بشكل مختلف اللي هو مسلسل اسمهان الاخير باعتباره شكل من اشكال التكامل بين اطراف مختلفة تونسيين مع سوريين مع مصريين مع لبنانيين هو استخدمه باعتباره عدم قدرة للدراما المصرية على انتاج عمل مثل عمل اسمهان وبالتالي استعانوا فيه بمخرجين سوريين . اسامة انور عكاشة: المخرج كان تونسي "شوقي الماجري" وبعدين مين اللي انتج دي مدينة الانتاج شريك اساسي مدينة الانتاج اعتقد انها مصرية ولا ايه!! فهي مصرية وهي الشريك الاساسي في الانتاج ولو مش قادرين ينتجوا ايه .. !! الله المصريين ما هم اللي انتجوا برضه ظل المحارب الذي لا اعلم حتى الان سر اختفاؤه من ع الشاشة وهو عمل محترم جدا هنعد ايه وللا ايه يا استاذ عبد اللطيف ما حناش مضطرين اننا نعد عبد اللطيف المناوي: مين يسوق فكرة .....؟ اسامة انور عكاشة: الايدي التي تلعب في الظلام فيه احتياج مش هقدر احدده تخمينا او ظنا لازم يكون في ايدي دليل انما فيه احتياج لضرب ما بقي من علاقات عربية عربية خدت بالك واشغال العرب باي شيء يبعدهم ولا يقربهم زي ما بدات حكاية النزاع على حزب الله سوريا مع ومصر ضد ..زي ما حصل الخلاف على النوايا الايرانية عبد اللطيف المناوي: فانت بتخلق حالة فنية تحولها الى خلاف او حالة ثقافية يحدث حولها خلاف اسامة انور عكاشة: بالظبط اعتمادا على حالة الخلاف السياسي او الدبلوماسي اللي حصل عبد اللطيف المناوي: طب هل انت بيزعجك عندما ترى اعمال سورية درامية سواء في مجال التاريخ او المجال الاجتماعي وهي بتصل الى مرحلة اعلى من انتاج الدراما المصرية ؟ اسامة انور عكاشة: اولا انا بحب نماذج عديدة من الدراما السورية وعشقتها قبل ما نشوفها على شاشات المصرية حتى خدت بالك انما بقول في نفسي ايه يا خسارة الاحساس اللي بيجيلي عبد اللطيف المناوي: نفسك ان احنا نكون اللي عملنا دا اسامة انور عكاشة: ياريت نعمل دا زيه بلاش اقولك افضل منه عشان ما ندخلش افعل التفضيل تاني نعمل زي دا بالظبط ايه اللي مانعنا الكارثة الكبرى الوحش اللي دخل علشان يشضب ع الميدان عبد اللطيف المناوي: الجانب التاريخي تحديدا في المسلسل السوري والمسلسل المصري احنا قبل كده كنا بنعمل مسلسل تاريخي مكانش فيه حد غيرنا تقريبا موجود في الساحة بيعمل دا ولكن جودة العمل التاريخي اللي كانت بتتقدم حتى مقارنة بجودة العمل التاريخي اللي بيتم تقديمه في الدراما السورية النهاردة اظن هناك فرق واضح اسامة انور عكاشة: لا تصلح ولا تصح المقارنة عبد اللطيف المناوي: ازاي ؟ اسامة انور عكاشة: لسبب واضح ان فيه تحسينات تقنية حصلت بعد مصر ما توقفت عن الانتاج التاريخي ..تحسينات تقنية السوريين اشتغلوا عليها كويس واستخدموها كويس قوي قوي ال High definition الكاميرا ال High definition وكل الاليات في الماكيير يستوردوا ماكيير من بولندا يعني معندهمش نظرية ان مفيش جنسية للفن بس ما بيطبقهاش الاخوة اللي بيكتبوا في الجرايد المهم ايه كان ممكن نجيب الحاجات دي وكنا نفضل سابقين وعندنا تاريخنا مليان يا اخي بلاش التاريخ العربي احنا لو جبنا التاريخ الفرعوني فيه منجم لو تعرضنا النهاردة للقصص اللي ممكن استحيائها من العصر الفرعوني هنلاقي منجم لا نهاية له وكنا قادرين نعمل دا بس اللي حصل عبد اللطيف المناوي: ليه ما نجرؤش ليه ما بيجرؤش حد من المنتجين على دخول هذا المجال ؟ اسامة انورعكاشة: بص هاقولك حاجة المجال الاول عشان كانت المحطات بترفض الفراعنة عبد اللطيف المناوي: بس دلوقت حتى لو اتكلمنا عن كيكة الاعلانات معظمها كعكة مصرية اسامة انورعكاشة: اه واحنا لو نعمل دلوقت دا بس الاعلانات ما بتجيش على التاريخ ليه..؟؟ فيه اعتقاد لدى وكالات الاعلان ان محدش بيتفرج على المسلسل التاريخي فبالتالي مفيش اقبال عليه وبعدين حتى مين اللي يقبل يمثل تاريخي ..الممثلين اللي هما Semi نجوم مش نجوم عبد اللطيف المناوي: اشباه النجوم اسامة انورعكاشة: ود ا اللي خلى انتاجنا يتوقف من المسلسلات الدينية والتاريخية بسبب دخول الاعلان ما هو دا سبب برضه ان الاعلان هيعمل ليه على مسلسلات دينية وتاريخية عبد اللطيف المناوي: طيب هل بتعتقد ان احنا بنمتلك من الادوات احنا كدراما مصرية كانتاج مصري للدراما بنمتلك من الادوات وهي ادوات بتكلم عنها مجموعة الادوات المكونة للعمل الدرامي سواء من كتاب او من ممثلين او من مخرجين او من ادوات تقنية بتستخدم هل لدينا من الادوات ما يمكننا من ان نكون افضل كثيرا- افعل تفضيل هاستخدمه بشكل عرضي- افضل كثيرا من الوضع اللي احنا موجودين فيه؟ اسامة انورعكاشة: فيه طبعا ماعدا التقنيات محتاجين لسه يسود استخدام التقنيات الحديثة كلها في التصوير بتوصلها بتديك نفس ال quality بتاع السينما عبد اللطيف المناوي: هي ال qualityبتاعة السينما لما بنشوفها في بعض المسلسلات هي مرتبطة بكفاءة المعد اوالالة اللي بيتم استخدامها ولا مدرسة تصوير ؟ اسامة انورعكاشة: هي مدرسة تليفزيونية برضه مدرسة qualityالسينما التصوير بكاميرا واحدة دا بيستخدم في السينما انك تصور كل مشاهدك بكاميرا واحدة ..الفيديو التقليدي او الكلاسيكي عندنا انه لازم يصور ب3 كاميرات ودي حتى هما ما يقدروش يعملوها لان هما اصلا كوادرهم اتعلمت في مدرسة روسية مدرسة السينما الروسية احنا هنا اكتر اللي اتعلموا عندنا في اوروبا واميركا اللي اتعلموا في البدايات يعني وجم عملوا سينما هنا ، السينما الفرق بينها وبين التليفزيون ايه ..؟ ان وحدة الدراما في السينما هي ال Shot ووحدة الدراما في التليفزيون هي المشهد الكامل زي المسرح فالتليفزيون فنيا اقرب للمسرح منه للسينما خدت بالك ودي قاعدة اساسية واللي بيجعل حميمية لمسلسل التليفزيوني هو استمرارية الشعور وتداعي الاحساس نتيجة انه من مشهد كامل ما بيصورش شوتات زي السينما وتعمل الكونتر وتقطع وبعدين تاخد راكورات وتمنتج والكلام دا هو بيفقد احيانا في التليفزيون ويفقد حرارة المشاعر عبد اللطيف المناوي: فيه مسلسلات عربية ؟ اسامة انورعكاشة: تم تنفيذه باستخدام الكاميرا الواحدة عبد اللطيف المناوي: الكاميرا الواحدة ولكن مشهد متكامل ؟ اسامة انورعكاشة: اه هما بيقطعوا داخل المشهد واحنا عندنا اساتذة بيعملوا دا كويس قوي قوي ومن قبل السوريين ما يعملوه عندنا ناس في الفيديو صوروا بكاميرا واحدة المسالة ايه بقى ان احنا بننتج لايه ما هو لازم يبقى فيه سؤال عبد اللطيف المناوي: هدف الانتاج؟ اسامة انور عكاشة: انت بتنتج ليه بتنتج عشان تخدم الدراما مفيش لزوم لوجع القلب شغال عاملك 100 مسلسل في السنة واتوزع ولا عنه ما اتوزع ، الاعلان جت عليه وخلاص عايز تبقي على الدراما التليفزيونية المصرية كفن بدون ما تخسر حد بدون ما تخسر سوق ولا حاجة عليك بفصلها عن رمضان عبد اللطيف المناوي: او بمعنى اخر عن الاعلان ؟ اسامة انور عكاشة: عن الاعلان اه عبد اللطيف المناوي: هل دا في اعتقادك ممكن وهل هناك مقدمات لمثل هذا ؟ اسامة انور عكاشة: هو تنفيذه سهل جد ا عبد اللطيف المناوي: ازاي ؟ اسامة انور عكاشة: ببساطة شديدة جدا دا قرار .. دا قرار بيتخذ هيجي اتحاد الاذاعة والتليفزيون بمنتهى البساطة او السيد الوزير يقولك ايه مش هنذيع دراما في رمضان ..رمضان هنفسح فيه مجال اكبر للدينيات عبد اللطيف المناوي: لو قرر مش هنذيع دراما في رمضان دا معناه ان جزء لا باس به من الحصيلة الاعلانية اللي بيعتمد عليها الاتحاد بشكل او باخر في تدبير موارده هيضيع؟ اسامة انور عكاشة: لا مش حيضيع هيتوزع على السنة عبد اللطيف المناوي: ازاي؟ اسامة انور عكاشة: باقولك بدل ما ياخدها دفعة واحدة لكشة واحدة من شهر واحد عبد اللطيف المناوي: حتوزع الدراما على مستوى العام ؟ اسامة انور عكاشة: بالظبط عبد اللطيف المناوي: طيب احد الموضوعات المطروحة ايضا في الفترة الماضية ما اثير حول المسلسلات التركية ؟ اسامة انور عكاشة: اه مهند ونور عبد اللطيف المناوي: مهند ونوراللي اصبحوا حاضرين في كل البيوت العربية مش المصرية وقدر المسلسل دا اللي اظن ان حتى جزء كبير من الشعب التركي ما شافهوش اسامة انور عكاشة: هو ما يعجبوش لوشافوا عبد اللطيف المناوي: انت تفسيرك ايه للظاهرة دي وهل دا دراما متطورة ؟ اسامة انور عكاشة: دي دراما متخلفة جدا عبد اللطيف المناوي: ازاي؟ اسامة انور عكاشة: هو اولا نسخ للمسلسلات ال soap operasبتاعة امريكا الجرئ والجميلات فاكر حضرتك the bold and beautiful خدت بالك وnots land وfalcon crest والحاجات العظيمة دي كلها مسلسلا ت مسمينها الsoap operaلانها زي رغاوي الصابون خدت بال حضرتك ما تقولش حاجة فالدراما التركية اللي احنا شفناها بتاعة نور ومهند هو نسخ لحالة بتاعة السيد ريدج والسيدة بروك اللي قاعدين يحبوا في بعض على مدى 20 سنة دلوقت المسلسل بينتج لحد النهاردة ووصل عدد حلقاته ل 5050 او حاجة زي كده..اول ما عرض عندنا حصل ايه ؟ ضجة ، ضجة خطيرة جدا انا اشتبكت شخصيا في معركة صحفية مع الاستاذ الصديق مفيد فوزي بسبب الجرئ والجميلات عشان هاجمته وهو كان متيم بيه المهم فنور ومهند دا نسخ للنموذج الامريكي فيه حاجة علت اسهمه شوية كمان ان هو مدبلج بلهجة عربية اللي هي اللهجة السورية يعني عبد اللطيف المناوي: ولهجة عامية اسامة انور عكاشة: ولهجة عامية قريبة قوي من المصرية فبقى مفهوم للجميع تالت حاجة لعبوا على وتر الزوجات العربيات اللي بيقعدوا ياعيني يمارسوا النميمة عشان يسلوا نفسهم وكل زوجة تحلم بحد يتجوزها زي الاخ مهند اللي مالوش شغلانة ليل ونهار انه يحب فيها دا حلم فبيلعبوا على احلام الامراض العربية عبد اللطيف المناوي: بس ما ظنش دا كان معمول بقصد هي المسالة اللي عملوا المسلسل ونجح اسامة انور عكاشة: امال هو عاملة لمين ؟ عبد اللطيف المناوي: هل هو منتج خصيصا ؟ اسامة انور عكاشة: حضرتك قلت بلسانك ان نص الشعب التركي ما شافوش يبقى معمول لمين ..؟ زي الدراما ال Soap opera الامريكية دي اللي احنا بنتريق عليها هي من الدرجة التالتة في اميركا وما بيحبوهاش هما عندهم ال Best sellers العظيمة ، Rich man pore man ، الجذور عبد اللطيف المناوي: هل دا كان تعبير زي ما حضرتك قلت لعبوا على الامراض النفسية او الاجتماعية العربية ام انه كان تعبير اخر بشكل اخر عن حالة ضعف بتعاني منها الدراما العربية والمصرية على وجه التحديد اسامة انور عكاشة: لا في عز ما كان عندنا دراما مصرية متالقة جه الجرئ والجميلات وعمل نفس .... عبد اللطيف المناوي: اذن انت بتعتقد المسالة دي حالة وقتية وليست حالة مستمرة مش مرشحة للاستمرار ؟ اسامة انور عكاشة: فقاعة يصدق عليها تماما الاسم اللي اطلقه عليها الامريكان Soap opera عبد اللطيف المناوي: فيما يتعلق مرة اخرى بالدراما المصرية هناك من ينتقد بان الدراما المصرية لا تعبر عن الحالية خليني اسميها في الوقت دا لا تعبر عن الحالة المصرية الحقيقية هناك غياب للطبقة الوسطى في المجتمع المصري ..هناك غياب للقضايا الحقيقية الموجودة في المجتمع المصري فيه بنتكلم عن الSuper hero's الابطال الخارقين والقادرين على الفعل في اي مكان انت في تفسيرك في تقديرك دا ؟ اسامة انور عكاشة: قصر ديل ..احنا قلنا عبد اللطيف المناوي: قصر ديل من مين ؟ اسامة انور عكاشة: احنا قلنا المؤلفين والمنتجين ، او المؤلفين اللي بيالفوا للاعلان واخد بالك انا عايز الحق الموسم عايز الحق النجم اللي جايبني اكتب له الموسم اعمل ايه ممكن ابص مانشيت الاولاد ..اولاد الشوارع اهم انا وعشرة معايا يكتبوا عن اولاد الشوارع مش عارف ايه في واحد كتب انهيار الدويقة مذكور في احد المسلسلات دا مؤلف مكشوف عنه الحجاب خدت بال حضرتك يعني فهي السرعة والطلسقة احنا بنسميها ايه الطلسقة ان هو املا اي ورق وهيتصور وهيطلع في رمضان تتعمل له الاستفتاءات عشان يطلع انجح مسلسل ويقش والكل ياخد حقه عبد اللطيف المناوي: استاذ اسامة انت اشارت من شوية على فكرة الدورة كنت بتتكلم عن 13 حلقة كانت الدورة ولكن خليني اقول من الذين خرجوا خارج اطار هذه الدورة البرامجية او دورة الاذاعة ومن الذين تخصصوا وبدءوا او ليهم علامات مهمة في فكرة السلسلة او المسلسل متعدد الاجزاء كان طب هنا النهاردة نفس الحالة موجودة ناس بيتكلموا عن 30 حلقة ،35 حلقة في بعض الاحيان ويتكلم عن مسلسل جزء 1 وجزء 2 وجزء 3 اسامة انور عكاشة: شوف المسلسل اذا كان في مشروعه اصلا تغطية مساحة درامية عريضة وطويلة فدا بيحكم زي انا مشروع ليالي الحلمية زي ما هو موجود في اضابير التليفزيون هنا بيقول ان احنا بنعمل عملية رصد درامي للمجتمع المصري خلال 50 عاما من 39 ل89 عبد اللطيف المناوي: دي كانت الفكرة من البداية ؟ اسامة انور عكاشة: كانت الفكرة من الاول في 200 حلقة وطبعا ما فيش جهد انتاجي يخليك تقدر تعمل 200 حلقة في order واحد فتضطر للتجزئة خدت بالك وبعدين احنا قايلين 200 حلقة مشروع موافق عليه عملنا 115 بس يعني معناها مش مسالة جري ورا عدد حلقات وبعدين اللي يخليني اكتر حلقات عشان اخد فلوس طب ما انا اكتب مسلسل تاني وهاخد فلوس برضه اللي بقضيه في وقت الاضافات هنا ..لازم الموضوع هو اللي يفرض مش ينجح مسلسل اقول الله حلو اقوم اعمل جزء تاني وجزء تالت دا افلاس وبعدين المسالة كلها بقول لحضرتك راجعة لعقلية تنظيمية لابد منها انا الحقيقة متفائل ولا زلت بوجود المهندس اسامة الشيخ في قنوات الدراما الحقيقة يعني واعتقد ان هو لو راجعني في الكلام اللي انا بقوله هيؤيده تماما يعني لان المسالة انا حسبتها من جميع جوانبها واستطعت ان انا اصل الى هذا الحل هتشوف ممكن نرجع تاني لمسلسل اللي حجمه 15 حلقة عبد اللطيف المناوي:اللي تقدر تملا بيه الشهر السنة يبقى فيها 12 مسلسل على مدار ....... اسامة انورعكاشة: لا مش 12 مسلسل دا 24 مسلسل اذا حسبت على قناة واحدة عبد اللطيف المناوي: هنا برضه اسال في حاجة تانية هل ما بتعتقدش انه في اطار العلاقات العربية العربية ، يعني انت النهاردة لما قررت تعمل مسلسل اسمة المصراوية هل دا ما فيش فيه تاصيل لمفهوم الشوفينية اللي انت كنت بتحذر منها؟ اسامة انورعكاشة: لا ازاي دا انا في المصراوية عايز اقول كيف اصبحت الشخصية المصرية على ما هي علية اليوم ، ازاي اتكونت ملامحها بالتدريج وباين من الجزء الاولاني ان فية تاثيرات جاية من الشرق من الشام ، وفيه تاثيرات جاية من الغرب من مراكش وتونس وقلت دا في المسلسل ان كل الاولية تقريبا اللي في مصر اصلهم مغاربة ، الاولية اللي بنعملهم الاضرحة يعني من اول السيد البدوي ، سيدي ابراهيم الدسوقي ، سيدي الشاطبي ، ابو العباس المرسي كل دول اولية جايين من المغرب واستوطنوا مصر فدا عنصر اثر بشكل ما على ملامح الشخصية المصرية ، بجانب الجزء اللي جاي من السودان من جنوبالوادي ، بجانب اللي جم من الشام الشباب اللي جم وقعدوا في مصر وعملوا مطابع دا بياكد مسالة ان المصرية تضم وتشمل .... عبد اللطيف المناوي: هي بوتقة لكل الثقافات العربية ؟ اسامة انورعكاشة: بوتقة تمصر الوافد و لا تغترب معه دا كان قصدي من المصراوية عبد اللطيف المناوي: وانت بتعتقد ان الدراما المصرية هي دراما لا تغترب و لا تتصادم مع الاخر ؟ اسامة انورعكاشة: لا اطلاقا عبد اللطيف المناوي: هل تعتقد ان الدراما المصرية في المرحلةالقادمة قادرة على استعادت عافيتها مره تانية ؟ اسامة انورعكاشة: بشرط واحد عبد اللطيف المناوي: وهو؟ اسامة انورعكاشة: انا مش ضد الاعلان ومكنش عندي شركة اعلان وفلست ، هو الحكاية ببساطة ان انا شايف ان دا الداء من اول ما بدات سطوة الاعلان انحدرت الدراما عبد اللطيف المناوي: طيب سؤالي الاخير هو هل انت متفائل بمستقبل الدراما العربية بشكل عام ؟ اسامة انورعكاشة: نعم.. انا متفائل عبد اللطيف المناوي: ايه مقومات التفاؤل ؟ اسامة انورعكاشة: ان خلاص بدات تعمل كوادر ما هو بقاء اي فن مرتبط بتنمية الكوادر بتاعته بقى فيه مخرجين بقى فيه مؤلفين بقى فيه طبعا ممثلين كتير قوي يعني المسائل بتمشي لخطى قدام يعني خلافنا على مين اللي سبق دي انا باعتقد انه خناقة طفولية جدا لانه لا يصح في النهاية الا الصحيح والبلد اللي فيها اهم كوادر هذا الفن هي مصر بحكم اللي حاصل مش بحكم التباهي او اي حاجة عبد اللطيف المناوي: لو طلب منك منتج مسلسلك انه يعرضه في رمضان اللي جاي هتوافق على عرضه في رمضان ؟ اسامة انورعكاشة: ارجو انه ما يكونش القرار نايم لغاية رمضان الجاي يعني انا اتمنى ان الاقتراح بتاعي يدرس جيدا وبشكل عملي وانا اعتقد ان فيه حل جذري عموما ما برحبش بعرض مسلسلاتي في رمضان عبد اللطيف المناوي: السيدات والسادة يعني سوف استعير من الاستاذ اسامة انور عكاشة تعبيره الاخير عن مسلسله المصراوية فهذا البلد هو البوتقةالتي تجمع فيها العرب كل العرب ، الثقافة المصرية هي مزيج من هذا التفاعل الحقيقي بالثقافة المصرية الاصيلة بطبقاتها المختلفة تاريخيا وبعلاقاتها المختلفة بالاطراف الاخرى وتظل الدراما المصرية حتى لو كانت تمر بكبوة او تمر بازمة او بمشكلة تظل ام الدراما العربية وفي هذه البلد اعطت الكثير فنها وثقافتها ايضا قادرة على الاستمرار والعطاء, استاذ اسامة انور عكاشة بشكرك شكرا جزيلا السيدات والسادة شكرا لكم والى اللقاء في مرات قادمة باذن الله وكل عام وانتم بخير ....
