فجأة ظهر فيديو على اليوتيوب لشخصية اسمها "عبكويم" بتحكي عن تخلصها من الإدمان، وكان الفيديو ده زي الفيديوهات اللي بتظهر في برامج التوك شو، وبعد كده لقينا "عبكويم" ده موجود في سيت كوم "حرمت يا بابا" بجزئيه الأول والتاني، وكمان كان موجود في رمضان اللي فات، بس بشكل تاني في مسلسل "حكايات وبنعيشها" مع "ليلى علوي".. بس مين "عبكويم" ده وجه منين؟.. ده اللي هنعرفه مع الكلماوية و"علي قنديل" في السطور الجاية.. كلمنا عن الفترة اللي اشتغلت فيها في مهن ملهاش دعوة بالكتابة مرة اشتغلت في محل منظفات، وكنت بوصّل البضاعة للمحلات على تروسيكل، ومرتبي وقتها 2 جنيه، بعدها بعت لب في مصيف بلطيم، وبعدين مصوراتي على البحر، وفي نفس الوقت كنت بقطع تذاكر في الطفطف، وبنام في الجامع ساعة أو اتنين في نص اليوم، لحد ما سافرت القاهرة، واشتغلت تباع على ميكروباص خط بولاق فيصل. ومرة اشتغلت في مكتب استشارات قانونية ودفاع مدني، وكنت مسئول عن تأمين المصانع ضد الحرايق، لغاية ما في يوم مخلوف صاحبي -الرسام في المصري اليوم- قال لي أنا كل ما أدخل معاك فيلم سينما، ألاقيك بتقول كلام حلو عن الفيلم، ما تيجي تكتب الكلام ده في الدستور، فبدأت أكتب في السينما والمزيكا. احكي لنا عن الأسطى سيد سواق العربية النقل؟ الأسطى سيد السواق ده، راجل عامل دماغ أربعة وعشرين ساعة، لدرجة إنه مرة وقّف العربية وقعد يشاور لى على شجرة، ومصمم إنها شبه أمه! إيه اللي بيميزك عن غيرك في الاستاند اب كوميدي؟ كل واحد فينا عنده حاجة بتميزه، واللي أنا بشتغل عليه، إن مستوايا يعلى، وكل سيزون أفرق عن السيزون اللي قبله، فبذاكر كل حلقاتى، ودايما بجتهد أبقى أحسن. إنت في المركز الكام من بين المشاركين في موجة استاند اب كوميدي؟ ما أعرفش أقول لك ترتيبي الكام، وما ينفعش أصلا أرتب نفسي، لكن أنا على الأقل بجتهد، بحيث أبقى مختلف في كل سيزون، وساعات ممكن حد يتفرج لي على حلقة ويقول لى عجبنى فيها كذا وكذا، وأنا يبقى من جوايا عارف إن الحلقة كان فيها أربع "ديفوهات"، وعشان كده الفترة دى كلها، لو مفيش شغل، بفضل أذاكر وأحاول أطور من نفسي. حصلت قبل كده إن حد من الجمهور يرمي إفيه؟ آه طبعا، وبيبقى أحلى شغل، لأن المتفرج لما بيدخل معاك في الشو ويبتدى يرمى إفيهات، وترد عليه، بيتبسط، وبيحس إنه جزء من العمل. لو قلت إفيهات عالية والناس ماضحكتش، هتعمل إيه؟ أكيد بيبقى إحساس بايخ جدا لما تقول إفيه والناس ماتضحكش، وبتحس وقتها إنك أتعس إنسان في الدنيا, ولما كان ده بيحصل لي في البداية، كنت بتأثر قوي، لكن مع الوقت والخبرة، بقيت بعتذر عن الإفيه الوحش اللي أقوله، بارتجال إفيه تاني حتى لو كان عليا، لأني أستحق كده، ولازم أعاقب نفسي. فن الكوميديا بيعتمد على الإفيه ولا خفة دم الكوميديان أكتر؟ في الاستاند اب الفكرة هى البطل، وعشان كده في شغلي دايما بسعى إن الجمهور اللي حابب يضحك، لازم يطلع من الحفلة بفكرة مفيدة، وطبعا الإفيهات مهمة، أمال الجمهور هيضحك على إيه؟ مكتوب على الفيس بوك إنك اترفدت من موقع ماشي دوت كوم لأسباب مشبوهة؟ في الفترة دى كانت تصرفاتى غلط بالمعنى الحرفى للكلمة، يعني ماكنتش محترم الشغل خالص، مع إني أول ما بدأته كانت طاقتي عالية جدا، فمسكت قسم ورا التانى ورا التالت ورا الرابع، وكنت برد على المشاكل العاطفية بتاعة عيال عندها 13 سنة، لكن مع الوقت بقيت أروح متأخر وأدخن في الشغل، فقالوا لى مش هينفع الكلام ده، فقلت لهم: مش هينفع أشتغل من غير الكلام ده، فطردوني. إنت شايف نفسك ممثل ولا سيناريست في الأساس؟ يا عم أنا مش شايف نفسي (يضحك)...وحتى الآن ما أثبتش إني سيناريست كويس، لكن بصف عامة أنا ممثل وسيناريست. هل ممكن يجي وقت تبتعد فيه عن التمثيل في السيت كوم؟ ما أعتقدش، لسه بدرى قوي على الكلام ده، وأنا دلوقتي في مرحلة إثبات وجودي. لو بتمثل شخصية إنت اللي كاتبها، ولقيت المخرج ليه وجهة نظر تانية، هتعمل إيه؟ أنا مقتنع إن كل فرد فى العمل ليه منطقة، الكلمة فيها بتبقى كلمته، وأكبرهم المخرج، لأن هو المسئول في الآخر عن توصيل الصورة الكاملة للجمهور، وأنا كسيناريست، وجهة نظرى بتبقى في الدراما بس، لكن ما ينفعش أتكلم فى حاجة مش من اختصاصى، فلازم أبقى عارف كويس إيه هى منطقتى اللي مسموح لى أتكلم فيها. بيضايقك إن حد يتعامل معاك في الحقيقة على إن دمك خفيف ولازم تضحكه؟ مش بيضايقنى، لكن أنا عندى مشكله الناس ماتعرفهاش، إني بهزر كتير صحيح، لكن كل كلامى جد، حتى هزاري، بيبقى دايما فيه رسالة مهمة بحاول أوصلها، لكن لما حد بيشوفنى في الشارع ويسلم عليا، بيبقى متوقع إنى أفتح له حنفية إفيهات، وده مش بقدر أعمله في كل وقت طبعا. كلمنا عن مشروع الفيلم اللي بتحضّر له..وهل هتمثل فيه؟ لا مش همثل فيه، أنا بس بكتب له السيناريو، وإن شاء الله هيبقى مختلف، لأني مش ناوي أبقى شبه حد. لو طلب منك تأدية دور “عبكويم” في فيلم من بطولتك.. تقبل؟ الحقيقة مش عارف، لكني مش جاهز للبطولة دلوقتي، ودي سكة أنا ناوي آخدها واحدة واحدة. كلمنا عن فكرة 3سم؟ فيه شباب كتير موهوبين وطموحين جدا، ومستعدين يشتغلوا بأقل التكاليف، ويعملوا حاجة كويسة، زي “عبكويم” اللي ما اتكلفش 3 مليم، عشان كده هنبدأ مشروع طموح هيكون بمثابة سينما موازية، يعني في كل موسم للأفلام هننزل بأفلامنا بس على موقع إليكتروني، وفي موسم الصيف اللي جاي، هننزل بأفلام صغيرة، هتشتغل مبدئيا لمدة 10 ساعات، هنعرض فيها أفلام وإعلانات لمنتجات وهمية، الغرض منها مش الربح وإنما تقديم المواهب والأفكار للناس، وفكرة 3 سم إنك بدل ماتنزل وتروح لحد السينما، مش هتتعب غير انك تتحرك بالماوس 3 سم وتشوف الفيلم بتاعنا، بدل ما تنزل للسينما. إيه أكتر حاجة بتخوفك؟ بخاف لما بفكر إن دخلي كله معتمد على التمثيل، وإن ممكن تيجي فترة أتزنق فيها ويبقى معيش فلوس، فأضطر أقبل عمل أنا غير مقتنع بيه.