السيرك الانتخابي والبرلماني..

اتفرج يا سلام ..سيرك ده ولا سوق
كراتين وأكل وفلوس..ويفط وشوادر
دي طرق الدعاية المتبعة للانتخابات
وناس بتحاول تتنطط على الساحة السياسية علشان تقول احنا أهو
وتلاقي اليفط والاعلانات مغرقة الميادين والجرائد
والمعيار الأساسي للترشح انه يكون معاك فلوس
ده غير المجاملات العائلية
لانه حضرتك هتدفع ألف جنيه تأمين
وتصرف ألوف على الدعاية علشان الناس تعرف صورتك واسمك..وتقول لهم انك خير من يمثلهم ويوصل صوتهم
واستفدنا ايه في النهاية؟؟؟؟؟؟؟؟
فين المرشحين اللي بيفهموا في القوانين علشان يصيغوها؟
وفين الناس اللي عندها فكر وجرأة لتقديمه والدفاع عن حقوق الناس؟؟
اذا كان عندنا نسبة اجباري عمال وفلاحين..مناسب الشخص أو غير مانسب طالما انه كان مؤهل متوسط أو معاه حيازة زراعية يبقى تمام
وتلاقي لواءات متقاعدين وعمرك ما تلاقي فلاح أجير أو عامل يمثل العمال او موظف يمثل الموظفين..أو تلاقي تمثيل حقيقي للنقابات المهنية المختلفة
وتسمع جلسات البرلمان تجيب الملل..ومتفهمش ايه علاقة المواضيع ببعضها..ومتعرفش النائب اللي رشحته أفاد منطقتك بايه..المهم كله بيجري علشان يطلب منه واسطة يشغل ولاده
المشكلة في مين؟؟
الدستور علشان نسبة العمال والفلاحين؟؟
ولا الشعب اللي ثقافته انه المرشح بفلوسه مش بشخصيته وفكره؟؟
ولا الناس اللي بتجري ورا مصلحة صغيرة وتبيع أمانة صوتها الليهياثر في مستقبل البلد كلها؟؟
ولا في ضعف البدائل على الساحة؟؟
ولا أسباب تانية؟؟
المهم في النهاية ده وضع ينتج عنه برلمان يمثلنا ويصلح انه يتخذ قرارات مصيرية تخصنا كلنا؟؟
سؤال يحتاج الى اجابة
والموضوع له بقية بإذن الله
رشا شكري
13-6-3-2011