* * حسنين : واللهِ كتر خيرها الدول الكبيره . بتساعد الدول الفقيره . إشى قمح وإشى ذره وأدويه ومدارس وأتوبيسات . دا حتى الإنتخابات . بتعطى مساعدات علشان تراقبها . علشان تمنع التزوير . = = = محمدين : فاكر لما كنا فى دمياط وطلعنا من عند المحافظ . ورحت تجيب كيلو مشبك للعيال قبل ما نسافر . عمل إيه معاك البياع إللى فى محل البدرى بتاع الحلويات . * * حسنين : أول ما شافنى . قعد يقولى حمد لله على السلامه يابيه . نورت دمياط . وساب الزباين الواقفين قبلى . ولسه بأقوله عايز كيلو مشبك . لقيته بيقطع حتة هريسه وبيقدمها لىّ . وبيقولى ياريت تدُقها يابيه . = = = محمدين : ولما دقتها وقلته فعلا ممتازه . عمل إيه ؟ * * حسنين : راح قاطع حتة لديده وطلب منى أدوقها . طب ما هو عطاك إنت كمان حتة بسيمه علشان تدوقها . = = = محمدين : طب وإحنا خارجين من المحل . كان معانا إيه ؟ * * حسنين : بصراحه بدل ما كنت ها اشترى كيلو مشبك . إشتريت نص كيلو هريسه وكذا قرص حلويات : فوليه على سمسميه على حمصيه على لديده . = = = محمدين : يعنى البياع لما شافك لابس على سنجة عشره . ساب الزباين وقعد يرحب بيك . ويدوقك كذا صنف . رغم إنه دمياطى . علشان سواد عيونك ؟ * * حسنين : موش فاهم ! = = = محمدين : علشان يبيع أكتر ياحبيبى . وزى ما إنت قلت . بدل ما كنت ها تشترى كيلو مشبك . إشتريت كذا صنف تانيين . * * حسنين : بس دا إيه علاقته بموضوعنا .. أقولك كتر خيرها الدول الكبيره بتعطى مساعدات للدول الفقيره . تقولى بياع الحلويات بتاع دمياط . = = = محمدين : ما هى دى زى دى . * * حسنين : إزاى فهمنى . = = = محمدين : فرنسا من حوالى سنتين قدمت لمصر هديه حوالى 30 ألف طن قمح فرنسى . وقتها مصر ما كنتش بتستورد قمح من فرنسا . ومن حوالى أسبوع بتوع القمح الفرنساوي كانوا عاملين ندوه فى القاهره . قال فيها واحد منهم . إن أكثر من ثلث القمح اللى بتستوره مصر حاليا جاى من فرنسا . * * حسنين : يعنى القمح الفرنساوى الهديه كانوا بيدوقوه لينا علشان نشترى منهم . = = = محمدين : ساعات تسمع إن المعونه الأمريكيه واخده مهندسين من شركة مقاولات كبيره . فى رحلة لأمريكا لمدة أسابيع للتدريب هناك على حساب المعونه . * * حسنين : أظن دى بقى مفيش فيها منفعه للأمريكان . دى رحلة كلها زيارات مصانع . والمهندسين بتوعنا واكلين شاربين على حساب المعونه . = = = محمدين : إللى حصل إنه بعد كذا سنه . المعدات فى شركة المقاولات بتاعتنا كانت عايزه تتغير . جت عروض من شركات فرنسيه وإيطاليه وألمانيه وكوريه وأمريكيه . طبعا المهندسين إللى ها يخدوا قرار الشرا . لا شافوا قبل كدا لا المعدات الفرنسيه ولا الألمانيه . لكن شافوا إيه ؟ * * حسنين : شافوا المعدات الأمريكيه لما راحوا هناك واتدربوا عليها . = = = محمدين : علشان كدا فضلوا العرض الأمريكى على باقى العروض . * * حسنين : يعنى الرحله بتاع أمريكا برضه كانوا فيها بيدوقونا ؟ = = = محمدين : كلهم كدا ياحبيبى . تقوللى معونه فرنسيه ولا ألمانيه ولا كنديه ولا صينيه . كله عايز يزود مبيعاته فى السوق بتاعك . وما تنساش إن إحنا 80 مليون نفر . وعلشان تلاقى أكبر الدول اللى بتاخد معونات . دول كبيره فى السكان . تصور إن الهند تاخد معونات أكثر من 2 مليار دولار وغينيا الفقيره تاخد 319 مليون دولار . الصين عطوها معونات حوالى 5ر1 مليار دولار . اندونسيا مليار وربع . دا حتى نيجيريا اللى فيها بترول وغاز طبيعى خدت مليار وتلث دولار لأنها 151 مليون نفر . فيتنام خدت اثنين ونص مليار. بنجلاديش أكثر من 2 مليار دولار . لكن أفريقيا الوسطى الفقيره تاخد 256 مليون دولار بس . * * حسنين : معلهش حكايه كلهم بتوع مصالح . محتاجه نظر . يعنى اليابان لما عملت لينا الأوبرا كانت عايزه مننا حاجه ؟ = = = محمدين : ياسيدى فيه حاجه إسمها تحسين الصورة الذهنيه للبلد عند الناس . يعنى لما تبقى صورة اليابان فى ذهنك حلوه . وإنت فى معرض سلع منزليه رايح تشترى تلفزيون . وقدامك الكورى والأندونيسى والتركى واليابانى . ها تشترى أى جهاز . * * حسنين : اليابانى طبعا . = = = محمدين : يبقى هو نجح فى تحقيق هدفه . إنه يزود مبيعات شركات بلده . وطبعا دا يخلى العماله فى الشركات دى مستمره وأوضاعها مستقره . يعنى مستوى المعيشه هناك يفضل كويس . * * حسنين : يعنى لما بيعملوا مراكز ثقافية عندنا . ويقدموا عروض فنيه . كل دا مدروس ومتخطط ؟ = = = محمدين : يا سيدى المعونات دى اعتبرها مصروفات تسويق . تسويق تجارى للبضاعه بتاعتهم . تسويق لأفكارهم السياسيه والثقافيه والعسكريه . علشان كدا بيدخلوا حتى فى تغيير مناهج التعليم . * * حسنين : يعنى زى اللى عنده محل ولا شركة . وبيخصص ليها مصروفات دعايه . = = = محمدين : علشان كدا اتفقت الدول الكبيره من سنة .1970 إنها تخصص نسبة 7ر0 % من دخلها القومى لمساعدات الدول الفقيره . * * حسنين : دى نسبة ما كملتش حتى واحد فى الميه . = = = محمدين : ياريت بس يلتزموا بيها . السنه اللى فاتت النسبة اللى طلعتها أمريكا 2ر0 % . واليابان كات أقل منها . وفى ألمانيا كانت أقل من 4ر0 % وفى فرنسا أقل من 5ر0 % . * * حسنين : والنسبة بتاع أمريكا تطلع كام ؟ = = = محمدين : وصلت حوالى 29 مليار دولار . * * حسنين : يابوى .. 29 مليار دولار من 2ر0 % بس من الدخل القومى الأمريكى . أُمال باقى المساعدات على كدا وصلت كام . = = = محمدين : حوالى 120 مليار دولار معونات من كل الدول الكبيره . * * حسنين : ودى بيصرفوها فى إيه ؟ = = = محمدين : البيانات بتاع البنك الدولى بتاعة 2008 . بتقول إن 50 % منها بس هى اللى مشروعات تنميه . و23 % تعاون فنى زى الجماعة بتوع تدريب شركة المقاولات . و10 % قروض ميسره . و10 % مدفوعات للأغراض الانسانيه و6 % تكاليف إداريه . * * حسنين : يعنى القروض الميسره بيعتبروها مساعدات ؟ . وكمان بيخصموا مصاريف الموظفين بتوع المعونه ؟ = = = محمدين : ياحبيبى الناس دى ما بتلعبش . دول لو عطوك معونه غذائيه لازم البضاعه تكون من عندهم . حتى لو كان سعرها أغلى من البلاد التانيه . ولازم المراكب اللى تشيلها تكون من عندهم . والموظفين يكونوا منها برضه وطبعا مرتباتهم عاليه جدا لأنهم بيعتبروهم خُبرا . علشان كدا طلعت مقولة : إن كل دولار من المعونه الأمريكه . أمريكا بتسترد منه 50 سنت يعنى نصه . قبل وصوله . * * حسنين : وإحنا وصلنا كام من المعونات دى ؟ = = = محمدين : سنة 2008 كان نصيب مصر 1 مليار و348 مليون دولار . متوزعه بين الدول . يعنى 471 مليون دولار من أمريكا . و208 مليون من المفوضية الأوربيه . و 170 مليون من ألمانيا و142 مليون من فرنسا .. والباقى قليل . يعنى 20 مليون من هولندا و16 من أسبانيا و12 من اليابان و9 مليون من انجلترا . * * حسنين : المثل بيقول إللى ييجى منه أحسن منه . = = = محمدين : يعنى حوالى نص المعونات طاير قبل ما ييجى . والنص الباقى جزء كبير منه ضايع برضه . حتلاقى ناس عامله جمعيات للصناعات الصغيره . وجمعيات للبيئه . ولحقوق المرأه ولحقوق الإنسان . ياخدوا فلوس المعونه . وهات يا ندوات ورحلات ومطبوعات وحفلات . وإصرفى ياللى ما منتيش غرمانه . * * حسنين : موش إحنا إللى بنحدد الفلوس دى تصرف فين ؟ = = = محمدين : ليه هما عُبْط ولا إيه . أوجه الصرف متحدده أصلا . وفى حاجات ملهاش علاقه كبيره بمشاكلنا الحقيقيه . يعنى زى ما تلاقى واحده غلبانه موش لايقه تاكل . بدل ما تديها جنيه تجيب ساندوتش . تروح شارى ليها معجون أسنان . وتقول ليها ياريت تحافظى على أسنانك . وإنت عارف إن ما عندهاش فرشه أسنان أصلا . * * حسنين : علشان كدا بيهتموا بموضوع الختان . والعنف ضد المرأه وتحديد النسل والحاجات اللى زى كدا . = = = محمدين : كنا فى ندوة فى اسكندريه . سألت موظفه مصريه بالبرنامج الائنمائى للأمم المتحده . نسبة كام من الفلوس اللى جايه للفُقرا بتروح ليهم . قالت لى : صفر . لأنها بتتصرف على الندوات والمطبوعات والرحلات . وطبعا الندوات دى فى أحسن الفنادق . مره فى العين السخنه ومره فى أبو سلطان ومره فى إسكندريه . * * حسنين : أتارى إصحابنا الصحفيين اللى شغالين مع جمعيات المعونات حالهم إتشقلب . شياكه وشقق وعربيات جديده . . لكن على العموم آهو فيه ناس مصريين إستفادوا من الفلوس بتاعة المعونه . = = = محمدين : لكن المجتمع دفع الثمن . * * حسنين : إزاى . = = = محمدين : فى 2008 مصر صدرت لأمريكا ب 2 مليار و371 مليون دولار . واستوردت منها ب 6 مليار و31 مليون دولار . يعنى أمريكا كسبت من التجاره السلعيه مع مصر 3 مليار و660 مليون دولار . فى حين قيمة المعونه 471 مليون دولار . دا غير مكاسب أمريكا من التجاره فى الخدمات مع مصر . زى السياحه والنقل والخدمات الماليه وغيرها . يبقى المعونه حققت هدفها ولا لأ ؟ * * حسنين : صدق إللى قال .. الحدايه ما بتحدفش كتاكيت ! [email protected]
