إللى هيزعل منى يبقى كلامى عليه

شوفوا يا محترمين طول عمرنا ساكتين شايفين وإنتوا معانا برضه كمان شايفين , قالوا مبارك فاسد وإللى معاه فاسدين , قالوا كمان جوعنا , قالوا فلوسنا ومالنا كانوا ليها سارقين , قالوا وم الحريه كانوا لينا حارمين , قالوا وقالوا وقالوا وكترت السكاكين , قالوا لازم يتحاكم ويكون م المساجين , لكن فيه ناس تانيه وياه مشتركين , ناس كده منا ومنكم عاملين فيها مظاليم , الأستاذ فى الفصل بيريح مسكين , فين الشرح يامستر ؟ ليه الشرح حبايبى للسنتر جاين , وإحنا ياعينى علينا من دمنا ماصين , دكتور فى المستشفى وتمرجيه كتير بيحولوا لعيادته علشان يكشف صح , غيره بيسرق كليه ويملا أكياس بالدم , أما بقى الأدويه للأجزخنات بايعين , حتى معيد الجامعه مش عاتق كورسات والمجموعه الواحده دى بتعمل ألوفات , وآدى وحده محليه تقول شبيك لبيك , تتحقق أحلامك وتكون ملك إيديك , إبنى وعَلى براحتك وهناخد كام ألف , دكتور صحه وشغله يمنع إللى يضر لكن كله بيمشى براتب آخر الشهر , الشارع بقى سوق البياع له فرشه وللبلديه إيجار , روح رخص عربيه وألا إعمل تجديد شوف بعيونك إنت تطلع لك كام إيد , وآدى سواق عربيه وطريق قسمه إتنين والأجره إللى بندفع بقوا يخدوها إتنين , ومدير بنك يغمض على قرض بيديه أول حاجه نصيبه ياخده قوام فى إيديه , كل موظف قاعد يتحكم فى الخلق بيكلكع ويعقد كده فى أمور الخلق , والدرج المفتوح بيفك المربوط والمتعقد عندك فى ثوانى بيتحل , وآدى موظف بيئه عن منطقه مسئول دخان مالى الدنيا جاى من شوى كباب , حتى زيت الطعميه خارج منه هباب , وللإتنين يا إخوانا إحنا آدينا بنشم , وورش ماليه الدنيا خبط ورقع ورزع , ليه ( لأ ) كله بيمشى والعداد بيعد , ومهندس بيراقب على أسمنت ورمل وحديد للتسليح ومواصفات للشغل , لكن غمض عينك تاكل بعديها لوز وكل حاجه بتمشى وكل شىء بيجوز , والبياع بيبيعلك بميزان مش مظبوط وصلاحيه وخلصت ومحدش بيموت , والميكانيكى تروح له بيكروت فى الشغل مهو لو عمله بذمه يبقى لنفسه يضر , جنبه محل كاوتش إلحم يابنى الفرده علشان فيها الخرم كده وبقدره قادر يتحول كام خرم , حتى الصحفى وقلمه بيحوله لسلاح يرفع بيه ويذل , مشى أمورك تكبر نشفها تيجى الأرض , أما بقى العمولات كله يقول هات هات , آدى صنايعى ياخدها من بياع لخامات , وفى ناس تانيه تاخدها لمكن ومعدات , غير إللى بتتاخد لرسو العطائات , وآدى وآدى وآدى مش هاخلص م العد , كله بيسرق كله , كله بينهب كله , قالوا لوحد بيسرق ( قطع الإيد الحد ) شوفوا لو دا بقى هيحصل هتطير فيه كام يد , أما عن الحريه حالنا أهو شايفينه , هبله ومسكت طبله وودانا هتتسد , فيه بلطجه بالكلمه فى الرد على كلام بالشتم وبالسب , ألفاظ بيئه ووسخه بتدل على صاحبها و فى الإعلام بتصب , أما بقى الحوارات فيها هنضرب بعض مش بس الندوات حتى الناس فى الشارع كارهين لكلام بعض , وخلاص بعد الثوره فيه تحرير م الذل وجهاز أمن الدوله أهو شايفينه الكل , لكن إيه بقى حالنا شايف للى بيحصل وإنتوا معايا شايفين لكنايس بتولع وبلخبطه بالدين , وهرج ومرج يحصل دا إللى إنتم عايزين ؟ لازم كرباك يلسع ترجعوا تانى للذل , حاولوا تكونوا يا إخوانا لروحكم محترمين , أما بقى لمبارك إنتوا تقولوا دا كان وإللى إنتم عايزينه سجن وفيه سجان يومها هتبقوا إرتحتم مش هوا دا كلامكم , يومها لو دا هيحصل غيره ملايين صبيان , صبيان منا ومنكم , كله بيسرق كله , كله بيظلم كله , كله بيمرض كله , بصوا لوشوش بعض وإنتوا تشوفوا حقيقتكم , وإللى هترضوه لروحكم يتنفذ عاالكل , مش برضه دا العدل , ويوم ياإخوانا مايحصل هاأقف أنا وسط الكل وهقول وبصوت عالى يحيا يحيا العدل , كده خلصت كلامى وهاأرجع أقول من تانى للى زعل منى إن كلامى عليه .