مدونة مختلفة : قالوا ايه

يا فجر جبناك بعد غياب سنين وسنين
كنا فاكرين الضلما قدر ونصيب هيصيب
قالوا لنا مفيش غير كده هو ده اللى ينفعكم
هو الوحيد اللى مالوش فى الخلايق زى
ولو ربنا بيحبنا يبارك لنا فى عمره الجاى
وابنه موجود وده فرع غالى من اصل عالى
قالوا ايه بطل الحرب الوحيد و بطل السلام اكيد
قالوا شريف وسط ناس فاسدين و انتوا مش فاهمين
اصل هو اخر سلاله الابطال العظام المحترمين
وهو حامى الحما يا سلام وامان لمصر والمصريين
ومن غيره مصر تبقى عراق تانيه بسبب المتربصين
الاعادى بره منه خايفين و المتطرفين مستنين فرصه
يعملوا حرب اهليه والفتنه الطائفيه غوله متخبيه
هو ضابط الميزان والبصله من غيره تتلخبط
ما تعرف يمين من شمال ونتوه وتغرق مركبنا
ده هو حبيب الملايين ونصير الفقرا والمظاليم
اسمع كلمهم اتعجب بقى 80 مليون كاملين
علما واطبا و فنانيين وبياعين شاطرين
ومدرسين وعمال و فلاحيين ومهندسين
فى كل مجال تلاقى كتير بره وجوه منورين
مفيش فيهم واحد ممكن يقود المصريين
قالوا متتعبوش نفسكم فى التفكير مفيش
الفكر ده مش لينا ده للناس التانين
لسه بدرى علينا لما نبقى ديمقراطين
واحنا عموما على الطريق ماشين
والريس هيوصل بينا حبه حبه
اصل احنا مش عارفين الضربه هتيجى منين
من الشمال هو احنا لينا عدا تانين
لا دول خلاص بقوا لينا مسالمين
شفتوا انكم مش فاهمين ولا حاسين
الخطر جاى منين الخطر جاى من بعيد
من عند الشيعه بلاد الفرس الصفويين
مالهم دول والشيعه يبقوا عدا ليه ولمين
قالوا داعمين سوريا وحماس وحزب الله
رفضين التطبيع و السلام و الموت البطيئ
و كمان واقفين للأمريكان ومش خايفين
وطيب و ماله هما احرار واحنا نعاديهم ليه
رافعين رايه الدين قدام العولمه والهيمنه
قدام السم المغموس فى عسل مغشوش
واحنا شايفين مش مغفلين زى ماهما فاكرين
عارفين مين اعداءنا الحقيقين بس خايفين
الدنيا كانت مقلوبه وشعوبنا مقهوره
محكومه بالنار وبقبضه من حديد متين
والصبر طال على الفقر والغلب والامراض
على لقمه ناشفه متغمسه بتراب
وشباب وبنات كما الزهور مفتحين
بس من ذل الحاجه و السؤال متلخبطين
على القهاوى قاعدين مستنين التعين
او فرصه يحسوا بيها انهم عايشين
وفخامته والمسؤلين محتارين يجيبوا منين
اصل احنا كل كام عام بنزيد ملايين
وقالوا سايبين الصحرا مكسلين يعمروا وقاعدين
والموارد ثابته هى هى لا ... بتنقص مش بتزيد
الناس بيجرفوا الارض الخضرا من الاف السنين
و اليومين دول بتطرح اسمنت وطوب وحديد
والمصانع بترمى مخلفاتها فى الميه وبتلوث النيل
بأختصار يعنى عاوزين يقولوا بالمتغطى
العيب مش فى الحكام العيب فى المحكومين
طيب لو اللى بيقولوا مجانين لازم يعقل المستمعين
ازاى ده احنا مصريين اول حضاره فى التاريخ
قالوا كانوا ايام الفراعين دلوقتى احفادهم خيبانين
ده احنا عندنا شموع فى كل فروع العلم منورين
قالوا لولا انهم سافروا كان زمنهم هنا مدفونين
العتمه سارحه على كل شق على كل شبر على كل بيت
والفجر محبوس وراء القضبان لا بيظهر ولا يبان
فى ناس مننا بعد حاجه وعشرين سنه قالوا كفايه
لو كان استلمنا مواليد دلوقتى خلاص بقينا راشدين
الليل ده لازم يكون له اخر فى العتمه نورت شمعه
بس الهوا جامد وبيحاول يطفيها وعن عيونا يخفيها
شمس الحقيقه ما فى حد يقدر على الدوام يخبيها
على فين من سنين وسنين الزعيم واخد خطاوينا
و احنا ماشين ولاواقفين ولا فى قاع النيل غرقانين
ليه يورثنا زعيم سنين حتى تدركنا رحمه رب العالمين
ليه ما عندناش حكام متغيرين زى شعوب العالم المتحضرين
قالوا لنا اكتموا و اخرسوا هما على الحريه متربين
دول ناس راقين لكن احنا يدوب للحضاره ناقلين
وعلى دربهم الزعيم بيشدنا واحنا برضه متعثرين
شايل حمول تهد جبال يعينه ربه واحنا لجميله ناكرين
بس متخافوش لو حصل له حاجه ولاده موجودين
دول من صغرهم متدربين ولسياسه بلدنا راضعين
هما فاكرنها تكيه ولا هى ملكيه واحنا مش حاسين
احنا للحريه عاشقين صبرنا والصبر طال سنين
هزم خيط النهار ليل القهر و الفجر هديه للصابرين