حافظ على حلمك

قامت الثورة يوم 25 يناير، ناس قالوا شوية عيال والحكومة هتربيهم وهتخليهم يفروا زى الفئران، وناس تانية لما شافوا الضرب قالوا حرام وناس راحت معاهم، وقالوا رجالة وعملوها الصغار، وناس دعت عليهم على وقف الحال والبلد أصبحت لا تسر عدو ولا حبيب.
وناس قالوا عندهم حق لو رجعوا لبيوتهم انفض المولد، ورجعنا فى خبر كان، وهنبقى أسوء مما كان. صبروا الشباب ومات اللى مات، قالوا شهداء وفى الجنة مثواهم، وناس قالوا فين الأمن والأمان، وناس قالوا المساجين خرجوا بفعل فاعل والشرطة راحت فين، وناس عملت لجان شعبية عشان تحمى البيوت، وناس قالت شوية عيال واللى ملوش شغلة عملها شغلته، وناس قالت إسرائيل على الحدود، وناس قالوا إسرائيل خايفة ومش بتنام.
وناس لما تنحى الريس فرحت وزغردت، وناس قالوا الريس رمز مصر، وناس بكت عليه، وناس قالت هرب للندن، وناس قالت فى شرم الشيخ، وناس قالت لسة بيحكم، وناس حبت عمر سليمان وزعلت من الراجل اللى واقف ورا عمر سليمان، وناس قالت يمشى، ونفس الشىء مع أحمد شفيق، ناس قالت راجل محترم، وناس قالت يمشى هو كمان وكل النظام القديم ونختار حكومة تكنوقراطية.
وناس فرحت لما الجيش مسك زمام الأمور، وشوية قالوا الجيش ضرب المتظاهرين، ناس زعلت، وناس قالوا الجيش إتأسف وناس قالوا كمان الجيش مدلع المتظاهرين، كمان لازم يضرب شوية عشان الأمن والأمان ...................
أكمل الحكاية ..............................
من غير تخبط وقلق وهذيان وكلام كتير، حافظ على حلمك حلم التغيير، وافهم إن استمرارك فى المطالبة بالحق استمرار للتغيير، خليك رقيب لكن بالعقل والصبر والتدبير، حافظ على مكاسبك ونظرة شمولية ليفك اللجام وتهرب الحرية.. والأمن والأمان.