القارىء عصام كرم الطوخي يكتب :هذيان والثورة وعدم النسيان.

قامت الثورة يوم 25 يناير ناس قالوا شوية عيال والحكومة هتربيهم وهتخليهم يفروا زى الفئران وناس تانيه لما شافوا الضرب قالوا حرام وناس راحت معاهم وقالوا رجاله وعملوها الصغار ، وناس دعت عليهم على وقف الحال والبلد أصبحت لا تسر عدو ولا حبيب .
وناس قالوا عندهم حق لو رجعوا لبيوتهم انفض المولد ورجعنا في خبر كان وهنبقى أسوء مما كان .
صبروا الشباب ومات اللي مات قالوا شهداء وفي الجنة مثواهم وناس قالوا فين الأمن والأمان وناس قالوا المساجين خرجوا بفعل فاعل والشرطة راحت فين وناس عملت لجان شعبية عشان تحمي البيوت وناس قالت شوية عيال واللي ملوش شغله عملها شغلته وناس قالت إسرائيل على الحدود وناس قالوا إسرائيل خايفه ومش بتنام .
وناس لما أتنحى الريس فرحت وزغردت وناس قالوا الريس رمز مصر وناس بكت عليه وناس قالت هرب للندن وناس قالت في شرم الشيخ وناس قالت لسه بيحكم وناس حبت عمر سليمان وزعلت من الراجل اللي واقف ورا عمر سليمان وناس قالت يمشي ونفس الشيء مع احمد شفيق ناس قالت راجل محترم وناس قالت يمشي هو كمان وكل النظام القديم ونختار حكومة تكنوقراطية .
وناس فرحت لما الجيش مسك زمام الأمور وشوية قالوا الجيش ضرب المتظاهرين ناس زعلت وناس قالوا الجيش أتأسف وناس قالوا كمان الجيش مدلع المتظاهرين كمان لازم يضرب شوية عشان الأمن والأمان ...................
أكمل الحكاية ..............................
من غير تخبط وقلق وهذيان وكلام كتير حافظ على حلمك حلم التغيير وافهم إن استمرارك في المطالبة بالحق استمرار للتغيير ، خليك رقيب لكن بالعقل والصبر والتدبير حافظ على مكاسبك ونظرة شمولية ليفك اللجام وتهرب الحرية .. والأمن والأمان .