تعالوا نشتغل مع بعض

أنا كنت رايح
قالوا لي رايح فين
تعال أقعد _ واحنا معاك قاعدين
بس أنا رايح منوف
قالوا مش هتفرق كتير منوف من شبين
زي بعض الاتنين
الاتنين بايظين
لا كده مش هينفع _ متبقوش سلبيين
ضحكوا وبصوا لي وقالو سلبيين
طب والنبي اسكت وخلينا ساكتين
يا جماعة اتغيورا بقى _ زي بقية الناس التانيين
ضحكوا تاني وقالوا دول مجانين
ميعرفوش حاجة ومش فاهمين
بقى تبقى فتنة
والنار ولعة في بيتنا
وهما فرحانين
قال ايه النظام ده مش كويس
طب اهه _ اتغير الريس
وبقى في 80 مليون ريس
وكله بقى يفتي ويهيس
كدا بقى كويس !!!!!
قولتلهم يعني هما مش كويسين ؟
يابني اسمع الكلام _ دول مجانين
مفيش ميزانية _ وهما عارفين
عملوا مظاهرات وقالوا عاوزين
طب _ بالعقل كده_ نجيب منين
طب والثورة والتغيير ؟؟؟
يابني فكك بلاش كلام كبير
يعني انتوا مش هتعملوا حاجة و هتفضلوا ساكتين ؟
أيوة احنا هنفضل كده ساكتين
ولو عاوز تقعد معانا _ تعال احنا على طول قاعدين
احترت ومبقتش عارف اصدق مين ولا مين ؟
قعدت معاهم _ بصراحة كلامهم كان مريح
جه واحد عدى علينا وعمل فيها الديك الفصيح
وقعد يزعق ويصيح
أنتوا ضد الثورة وشكلكوا كده مش مريح !!
ضحكوا وقالوا وانت تطلع ايه ؟
رد وقال وانتوا بتسألوا ليه ؟
أنا لست مثلكم _ أنا أريد التغيير
أنا ذاهب لأعتصم في ميدان التحرير
ضحكوا وقالوا بلاش كلام كبير
وانا سكت شوية وبعد تفكير
قلتلهم أنا عندي اقتراح
نشتغل مع بعض
انتوا تبطلوا كسل
وانت تبطل صياح
والعمل هو طريق النجاح
وكده يبقى كله يعيش مرتاح
والتغيير يبقى أمر متاح !!!!!!!!