شباب التغيير

قلنا شباب مصر متدلَع فرافير..
فاجئونا وقت المحنة وطلعوا أرجل من ناس كتير!
سهرانين أدام البيوت يحمونا إيد واحدة ضد كل هجَام ومسجل خطير!
ما هوربنا كرَمها في كتابه ورسوله قال: "خير أجناد الأرض"... صحيح مصر لسة بخير!
يا مبارك صغَرتنا ومكنش ليك كبير بس "الله أكبر" كبير!
سنين فقر وفساد وموت لاولاد الفقير!
أمراض كتير اتفشت حتى إنفلوانزا الخنازير!
2011 والعيش لسة بالطوابير!
مصر كانت زراعة رز وقمح وقطن طويل على مستوى العالم شهير!
دة غير الصناعة وبئينا مستهلكين حتى القمح استوردناه .. والله دة لطاقاتنا أكبر تهدير!
الغلبان مش قادر حتى يجيب السكر لماَ الحلو بقى مرير!
حرف يديوية وراجل صنايعي إيده تتلف ف حرير!
أجانب قدَروها ومن بلادهم جولها بالمشاوير!
اتقلبت مكن أجنبي واعَدتو كفاءات في بيوتها عشان جهلا مش مواكبين التطوير!
30 سنة رخاص والسمعة حرامية وشحاتين .. يا شيخ ربنا عليك قدير!
هياخدلنا حقنا منك ومن حاشيتك ومن كل واحد خاين حقير!
كلمة بخط الإيد كتبها عجوز بس مفيش في مصر وطني في السن كبير!
شفتها ع التليفزيون ساعة المظاهرة قال لك: "إرحل يا خنزير"!
المظاهرة مصرية ابتدت سلميَة مفرَقتش بين ابن غفير ولا سفير!
سلميَة "بجد" بس للأسف دسَوا اللي عمل حرق وتدمير!
رفضنا وقلنا لا المصريين ضد الإرهاب والتكسير!
"جمعة الغضب" مصري مسيحي قال لاخوه صلَلي وانا وراك ظهير!
ركعوا وسجدوا اتفاجئوا بخراطيم المية اتفتحت تفرَقهم بس ثبتوا بإيمانهم ودي كانت "حركة تكفير"!
كتير نزلوا وقالوا ظاهروا وسيروا دة حقنا مش مهم شوي...ة تعاوير!
دي شرف لينا وكفاية المحاولة على صدرنا وسام تقدير!
خفت ليه؟ مطالبنا مشروعة عيشة شريفة من غير دين ولا جمعيات ليوم 30!
طلعنا من غلبنا ملناش غير صوتنا ابتدت بألف وصلت ملايين ومكنش الغرض ببلدنا التشهير!
فقدنا الثقة فيك ومش راجعين لبيوتنا إلا لما ترحل كفاية بقى فينا تخدير!
نفسنا ف حد منا صادق حكيم يكلمنا ويقنعنا بحقيقة الاستجابة والتغيير!
مش حد انت زاقه بؤ متلقن وعقل من غير تفكير!
أقسمت "بانتخابات نزيهة" .. ننزل يمشَونا ويقول لك: "اللجنة اتقفلت" وتوقيعاتنا اتكتبت بالتزوير!
مصر شعب أبيَ كريم عمره ما يتذل وشبابه "ورد" قادر ع التغيير!
زي ما رجعنا "ناصر" هنمشيك ودة وعد من شباب "التحرير"!
بعد اختفاء أيام طلعت تقول: "إديتكو "حرية رأي" لولاها ما كنتو عملتو مظاهرة".. لسة بتستفزنا؟ طب اسمع بقى "حرية التعبير"!
"حرية رأي" إيه؟ وأوَل ما نطقنا قطَعت عنا نت ومحمول وخدمات تانية كتير!
خللينا نتكلم وع الحقيقة نقول ما كفاية سنين متلجمين زي البعير!
دلوأتي بتقول نتحاور؟ مش قبل ما ترحل واحنا مرابطين في "التحرير"!
مش مستنيينك تعين لنا "نائب" أصل وظيفته ليك "غفير"!
عاوز تهدَي ولاَ تثبَت؟ ما كفاية خلاص قلعنا الطراطير!
قلنهالك كرهنا قرفنا طهقنا ..إرحل بقى كفاية تكفير
الألف مع الغلا بئت "جنيه" بس شكله كبير!
كان "الجنيه الجبس" فيه بركة قبل ما تتقل قيمته وتنزلوا فيه تكسير!
شبابنا طلع برة يغسل صحون عشان يا عيني الدولار وصل 6 والجنيه قصاده 20 من الدنانير!
أحلامنا بسيطة حرية وتكافل.. كل آمالنا نزلت فيها تبخير!
خي...رنا لغيرنا ونيجي نشتغل يفاصلونا وفجأة واحد من برة آل إيه "راجل خبير"!
ياخد ألوفات الدولارات والنعمة حرام هو يعني كان اتولد خبير!
ندَيله من جهدنا وعمرنا وهو يا دوبك من خبرته يدينا بالتقطير!
طب ماحنا أولى شباب مصري متعلم ومستعد لكل جديد وبكرة يبقى أحسن من أجدعها خبير!
ولاَ هو بس إحباط عشان "عقدة الخواجة" وف مآديفنا نازلين تكسير!
الغلبان ملوش تأمين والعلاج مولع دي ياعيني شكوى الفقير!
دة الظلم حرام ودعوة المظلوم في السما بتطير!
واللي لسة عامل ريَس "خربها وآعد على تلَها" زي ما رسموا ف صحف أوروبية كتير!
آعد على قمة الهرم و قاعتده بتتحل هي دي بقت مصر في الكاريكاتير!
أهالينا اللي برة قلبهم بيتقطع وعوزين ينزلوا يحضروا التغيير!
قلنالك ارحل خلليها تعمر ولاَ مش هاين عليك يحصل من بعدك تعمير!
صوتنا طلع ورسالتنا هتوصل ومش هنسكت تاني دة احنا شعب بجد كبير!
كفَرت سيئاتنا بظلم وفقر ألعن م الكفر بكتير!
رسولنا استعاذ منه ..خاف بقى يا ريس سؤال منكر ونكير!
حرام عليك ذنب شعبك ودم غلابة حسابك عنهم عسير!
دلوأتي الشعب افتكر قيمة الريسا "نجيب وناصر والسادات" وصورة ناصر رفعوها وقالوا عاوزينه تاني زعيم الأمة الشهير!
أبويا الله يرحمه كان بيحب يسمع للشيخ "كشك" قبضوا عليه فاكرينه للإخوان نصير!
قلنا: "قانون طوارئ" ظالم .. قلت: هلغيه.. ولدلوأتي زوَار الفجر يهجموا ع البيوت من غير تفكير!
دقن ولا نقاب يبقى إرهابي خطير!
ظلم لا في حرمة لست ولااحترام للشيخ الكبير!
يا...ما غنَولك "اخترناك وبايعناك" وانت خدته مسلَم بيه ومصير!
"لأ" مبئتش مصيرنا وهنغيَرك وربنا هيعيننا ع التطهير!
الشعب قال كلمته والجيش كان لينا خير نصير!
محدش عوزك لا انت ولا نجلك سموه "جمال الأمير"!
افتكرتوها مملكة هتورثوها لأولادكو وحفيدك الأخير!
حاشى لله إن مصر تكون ميراث غير لراجل أمين مش مرتزق مغير!
أمانة مكنتش أدَها وعيَنت خونة قلت لهم اشبعوا وطيروا وانا أطير!
نهبتونا وقسمتوا وسطنا بتل ضرايب كبير!
غلا ما رحمش معدم بيقول العين بصيرة والدَراع ع اللي جاري متكتف قصير!
هتتحاسب وأعوانك على كل مصري عاش فيها عاطل مريض ملازم السرير!
اتداين وقروض بنوك ويسدد بفوايد بالقناطير!
فوايد تسد ديون مصر يا عملا لكل دخيل معاه ورقة خضرا ولا 100 من الدنانير!
مصر من أغنى الدول فقرتو شعبها وبقى مغلوب على أمره غلبان كسير!
اللي عرف يسافر جري بولاده وقالك يا خويا حصَلني سيبها وطير!
مصر للأسف بعتها وكنا بنقول: "دي أرضنا دي مصر عش لكل طير"!
بسببك وقفنا قصاد بعض "مواطن وشرطي" وكله كان واحد المصير!
مصيرنا واحد والرب واحد والعمرواحد واللي هيصير بقى يصير!
ضربنا بعض واحنا اخوان وانت فين؟؟؟ نايم ومدَيها شخير!
6 بالليل بئت 4 و3 قالوا كل واحد لبيته يسير!
يا عيني يستنى ل 8 الصبح يجري على رزقه ولكتاكيته يلحق يطير!
الشرطة اختفت م الشوارع بأمرك و...الناس بالجيش بتستجير!
أوامرك كانت افتحوا السجون وهرَبوا المجرمين لماَ دخلوا علينا بالأسلحة والسواطير!
"إخلعوا الميري وسيبوها نهيبة لكل هجَام من غير ضمير"!
هتتحاكم يا "حبيب" وكنت فاكر انك حصانة عشان وزير!
محدش مسلَح ومفيش إلا مقشَات ومسامير!
سبتونا للنهب وهتك العرض من كل مجرم ضرَيب كان أو سكَير!
فهمنا المؤامرة ورسالتكو نتعلم الأدب قال لك: "ماهي يا فوضى ... يا مبارك الراجل الأمير"!
بسببك اتحبسنا لا شغلة ولا مشغلة قالوا "حظر تجول" مسمعنهاش من سنين كتير!
عاجبك وضع مصر؟ ربنا قادر مايحوجنا لعدو يقطع عنا ذخيرة ولاَ معونة يعايرنا بيها أدَام كل متشفَي شرير!
ولا لإسرائيل يبيعنا وزي ما دعا نوح بنقول "رب مغلوبين فانتصر" بجد الوضع خطير!
قدرنا ع الاحتلال وجلينا الأعداء وعزلنا ملوك وأمراء بقى عليك مش هنقدر؟ لا دة عشمك بس بإذن الله مش عشم خير!
الشكل مصري والقلب "عميل" مش سامعنا وانت ف برج عالي حرس ونفير!
عامل أطرش وعمرك ما سمعت لصوت الجماهير!
ولا عمرك حسَيت بعيشة عريان نايم ع الأرض بولاده ف شارع كبير!
برد ولاَ حر تلج ولاَ مطر .. المهم انك متدفَي بمهير وكشمير!
دة الرسول كنا فاكرينه فقير أتاريه كان أغنى من أغنى مليونير!
بس الغنايم مكنتش تبات في بيته واللي يفضل حبوب متكفَيش شوية عصافير!
وعمر كان يخاف ع النعجة لو وقعت من جبل يتحاسب عليها لمَا كان للمؤمنين أمير
والريس والوزرا يسافروا ويتعالجوا ببلاش "عبَي دي مصر للفلوس بير"!
هتقول عملت وبنيت؟؟ ما دة واجبك ولاَ فاكرها تكية تاكل وتقيَل على أريح سرير؟!
افتكرنا ف عهدك هنحس بأمان أتارينا سلَمنا أكبر فار مفتاح المجارير!
قلنا "راعي" وانت سايبنا للذئاب ووحوش... الخنازير!
بربَي بناتي إن زيَهم زي أي إنسان كلنا خلق الله مصري كان أو غير!
كلَنا سواسية الغني زي الفقير!
قسَمتنا وخلليت الغني ياكل أخوه الفقير!
كلَه فهلوة إهبش واجري خلليك واد مخلص خطير!
يا "ريس" لو دامت لغيرك ما وصلت ليك ولا بعد سنين كتير!
مباني وأكاديميات فخمة حطوا عليها اسمك كان اضطرار والله ونفاق كبير!
حاولوا يرضوك فاكرين انك عليهم وعلى عرضهم هتغير!
فرنسا وغيرها دلوأتي بيصطادوا في المية العكرة بس دة عشم إبليس مصر من الله محمية وميهمهاش تعكير!
أمريكا وإسرائيل آل بيراقبوا الوضع وهما نفسهم ييجوا بحجة حماية الجمهور الغفير!
إوعوا يا أهلي تسيبولهم مصر دة دلوأتي أسهل تفكير!
دة مناهم من زمان مش يبقى ابني ف حضني والف العالم أعمل عليه تدوير!
بقولها تاني نسيبك لمين دة انت أمَنا هنحميكي ونعمَرك أحسن تعمير!
ظهرت تاني بعد زيارة الأمريكاني خطاب برضه تثبيت واشتريت بلطجية والشارع من تراب الضرب اتملا تعفير!
بجد بنقولها المرة دي ومش هتكون الأخيرة هننتفض ونثور وزي ما قلنا كل دة لسة اللي جوانا أكتر بكتير!
بنتي سنتين بتقول "تحيا مصر" وهي مش فاهمة والله بيقولها الصغير قبل الكبير!
يا مصر حبك في دمنا دي حقيقة فهمها كل جاهل وخبير!
إتقال لي الكلام دة جامد وزجل خطير!
والله ماعرف هو شعر.. هجاء.. رثاء ولا تسجيل لواقع مرير!
اللي يقول بقى عمَ "نجم" ولاَ "الجخ" يارب ينجح ويرجع لنا "الشاعر الأمير"!
مش هاممني المسمى إيه المهم إنه طلع من قلبي وعقلي بكل تقدير!
أهلي قلقوا وقالوا: ..."مش وقته" قلت: بالعكس دة وقتنا وثورتنا تقرير مصير!
بس خايفة على بلدي وكل مصري وبدعي يارب أحسن ختامنا إنك أنت القدير!
مصر باقية وآمنة بنصرالله واللي هيكون بعد إرادة الله هي إرادة الجماهير!
25 يناير اتحفر بإيد شبابنا في صخرة التاريخ ولعقود جاية كتير!
قلنا: "حكومة جديدة" قلت: ماشي ..بس لسة إعلام وخارجية وبترول ودفاع آعدين و"طنطاوي" لسة المشير!
عوزين شباب يحكم مصر وسيبوا الراحة للراجل الكبير!
أنا مش أديبة ولا شاعرة ولا مؤرَخة بتحكي أساطير!
كل اللي حصل من ربَنا إلهام وبلهجتنا الجميلة حاولت أستعير!
بكل بساطة أنا واحدة مصرية مستفزَة من وضعنا وعلى مصر بتغير!
وبقول للشباب مش وقت فلوس نطيَرها في السجاير وفَروها دة مش وقت مزاج وتعفير!
كل ملَيم بقى يفرق ولو لقمة ناشفة خلليها وكفاية تبذير!
الخاتمة والخلاصة بنقول زي ما الراجل كتبها لعلك المرة دي تسمعها: "إرحل يا خنزير"!
18 يوم كرامة وأطول مظاهرة بيضا ف تاريخ الجماهير!
جه 11 فبراير واتنحيت الشعب كبَر ومن ع الأرض كان هيطير!
صرخة واحدة وزغروتة خللت أرواح الشهدا حوالينا ترفرف وتطير!
فرحة أمة اتختمت بزمامير وتصفير!
ربنا نصرنا وحسينا أخيرا بروح التحرير!
بقلم: دينا الخطيب