المصري (قصيدة عامية )

كان أسد جسور شجاع وكان ... وكان...
كان أسد تخاف منه كل الفئران
كان أسد قوي وعادل وحكيم كمان
يهابه العدو ويقدره الأعوان
وكان طيب أوي مع الأصحاب والجيران
كان أسد وكان ..... وكان ......
بس يا خسارة ده كان زمان .....
دلوقتي الأسد أتغير وبقى جبان
الأسد عجز وتعب
وراح في غيبوبة ونام
ولما يفوق يقول أنا لسه أسد
أنا بنيت سد وهرم
ويرجع تاني ينام
ويقوم يقول أنا لسه أسد
أنا كنت رمز للشجاعة والكرم
ويرجع تاني ينام
بقت حياته كلام في كلام
ضحكوا عليه شوية تعالب لئام
قالولوا يا أسد نتفق وبلاش خصام
أنت أسد وهتفضل أسد
بس خليك ساكت وهادي وعيش في سلام
قوم يا أسد _ أعدائك بتتكاتر
أعدائي مين __ مبقاش الأسد فاكر
قوم يا أسد _ أعدائك بتتكاتر
قال الأسد سيبوني _ خلاص مش قادر
الأسد أتظلم
ومن أبسط حقوقه اتحرم
وهو كمان لما سكت لنفسه ظلم
ولما الفساد ساد وغطى
الأسد __ الأسد بقى قطة
بقى يخاف يمشي في أي حتة
بقى يترعب ويجري من أي هتة
الأسد اندبح ودمه ساح
ومن الألم قام اتنفض وبأعلى صوته صاح
والناس فرحت وحست بارتياح
وقالوا أهو قام وهيرجع اللي راح
والأسد كان بيتألم من وجع الجراح
قالواعادي وطبيعي انه يكون مش مرتاح
واللي جاي أحسن من اللي راح
والأسد كان بيتألم من وجع الجراح
وهما بيقولوا اللي جاي أحسن من اللي فات
ميعرفوش أن الأسد خلاص راح ومات
قعدوا يتكلموا عن الماضي والأمجاد واللي فات
بس كل ده بقى زكريات
أصل الاسد خلاص راح ومات
حمدي أبوسالم