أنت مين فيهم؟

كان فيه حكاية اتقالتى زمان أوى وأنا فى الإعدادية, قال إيه بقى.. كان فيه مرة تعلب وأسد وفهد وذئب ( نمشيها كده عشان أنا مش فاكر الحكاية بالظبط ) المهم بقى.. الأربعة دول طلعوا فى رحلة صيد واصطادوا مثلا غزالتين وبقرتين.. فجاء الأسد "الكبير طبعاً"، وقال للفهد " قسم اللى اصطدناه , فراح الفهد قايله.. "أنا والثعلب كل واحد مننا غزالة وأنت والديب كل واحد منكم بقرة " قام الأسد ضربه كف مخبرين فمات على طول.. بص للديب وقاله "وزع ياخويا" الديب كان ناصح شوية فقاله" أنا غزالة والتعلب بقرة وأنت الباقى يا باشا " قام الأسد رزعه شلوت خبطه فى الشجرة اللى جنب الترعة فوقع فيها وغرق على طول.
بص للتعلب وقال " وأنت يا حيلتها " التعلب بقى كان ناصح زيادة عن اللزوم فقال " يا جناب الكوماندة المهم , أنت تاخد غزالة فى فطارك وبقرة فى غداك وغزالة فى عشاك والبقرة لبكرة , ده إحنا لحم أكتافنا من خيرك ياغالى " ... ضحك الأسد أوى وقاله " أنت واخد كورس توزيع غنايم ياض ولا إيه ؟" التعلب قاله وهو مطاطى راسه " لا يا كبير, بس اتعلمت من موت الديب والفهد".
خلصت الحكاية.. إيه لزمتها بقى؟..لما الحكاية دى خلصت الأستاذ بصلنا كده وقالنا
" شفتوا التعلب.. بذكاء عرف ينقذ نفسه وطلع من المقلب بمكره.. مش زى الهبل التانين.. ياريتكم كلكم تبقوا زى التعلب".. ماكانش يعرف إن أمنيته دى هتتحقق مش فى الفصل بس , لأ في الجيل كله....... دلوقتى الحرامى بقى أستاذ وذو ذكاء خارق , النصاب ده واد فهلوى بيعرف يسلك القرش، المنافق هو إللى بيعرف إزاى يمشى أموره عشان يوصل للى هو عايزه.. وتلاقينا نقول بكل أسى وحزن " هو هيعمل إيه يعنى.. يشحت؟
طب سؤال: نفرض الفهد كان مكان التعلب.. بمعنى تانى.. لو كان التعلب هو إللى اتسأل الأول وقال نفس إجابة الفهد, كان الفهد هيجاوب نفس إجابة التعلب؟.. أنا أعتقد إنه كان هيجاوبها.. الموضوع مش موضوع ذكاء خارق من التعلب.. الموضوع إن حظه كان حلو إنه أتسأل فى الآخر وهو كان ذكى حبتين فاستوعب الدرس, إنما كان ممكن قوى أى حد مكانه يعمل إللى هو عمله.. يعنى إذا كان الموقف يعتمد على التوقيت مش على الشخص.. طب واحد يقولى هو موقف التعلب ده يحترم يعنى؟.. لا طبعاً.. هو تعب معاهم وشقى وطلع عين أهله لحد ما اصطادوا الصيدة دى، فى الآخر مجهوده ده كله يروح فى الهوا عشان يرضى جناب الكوماندة!! المهم.. وعشان إيه يعنى؟ هيخسر حياته؟.. إلا هى الحياة أغلى ولا كلمة الحق؟!
وكمان حكاية زى دى تبين إن المدرسين فى مصر عايزين مدرسين ليهم قبل مايكونوا هما مدرسين أساساً
شفتوا بقى إن العملية التعليمية عايزة معجزة تغير كل النظام الموجود.. مش عايزة فلوس بس على فكرة.. عايزة دماغ حلوة.
ودلوقتى.. وبعد كل الكلام اللى قلناه.. ياريت كل واحد يفكر مع نفسه ويقول هو مين من الشخصيات الأربعة؟.. أسد.. ولا فهد.. ولا ديب.. ولا تعلب.
أنا عن نفسى متحطش فى موقف مماثل بس ممكن أوى أكون أى واحد فى الأربعة وبس.