20 جملة يقولها 95% من شباب مصر للبنات على الفيس بوك

جروب جديد على الفيس بوك يهدف إلى المزاح وتوصيل فكرة بسيطة بطريقه لذيذة للشباب والفتيات، لا يحذر الجروب من الحب وإنما يحذر الفتيات من الخداع باسم الحب، من خلال أشهر الكلمات التى يقولها الشباب للبنات، والتى ربما لا تكون دائما صادقة، وأوجز الجروب 20 جملة يقولها 95% من شباب مصر للبنات فى النقاط الآتية:-
1. حبيبتى أنتى عارفة أنا مش بحب حركات الشباب الطايش أنا أصلاً مبكلمش بنات "وتلاقيه يعرف طوب الارض".
2. يااااه ياحبيبتى أنا حاسس إنى أعرفك من زمان "وتلاقيه متلخبط بينها وبين بنت كان يعرفها قبل كده".
3. حاسس إن فيكى حاجة غريبة غير كل البنات "مثلاً بتمشى على إيديها ورجليها".
4. حاسس إن فى شبه كبير بين أفكارى وأفكارك إحنا أكيد مخلوقين لبعض "أكيد دى البنت رقم 100 اللى بيقولها كده وكأًن كل بنات الدنيا مخلوقين عشانه".
5. حبيبتى أنتى أول حب فى حياتى وحاسس إنى اتولدت يوم ما قبلتك "على أساس إن والدته كانت حامل فيه 20 سنة وولدته قبل ما يقابلها بيومين".
6. يااااه يا حبيبتى أنتى تؤمرى وأنا أنفذ اللى إنتى عايزاه أجبهولك "فى المشمش".
7. حبيبتى الطقم اللى أنتى لبساه ده تحفه بس متلبسهوش تانى عشان بتبقى حلوه وانا بغيييييير بغيييييييييير "طبعا فاهمين الحركات دى تلاقيه مش عاجبه أساسا".
8. هكلم باباكى أول ماأكًون نفسى "موووووووووووت يا حمااااااااااار".
9. عايز اشوفك كل يوم كل ساعه كل ثانية "عشان أصحابه يتأكدو إنها حلوه".
10. حبيبتى افتكرى دايما إنى لما بحب بحب بجد وأنا حبيتك بجد من أول ماشوفتك وكنت بدور عليكى من زمااااااان "الأسطوانة المشروخه".
11. علاقتى بيكى محدش يعرفها غيرى وغيرك وربنا لأنك بقيتى كل خصوصياتى "يعنى يا دوب اللى يعرفوا إخواته وأصحابه وجيرانه وأقاربه وأصحاب صحابه.....الخخخخ".
12. معلش ياحبيبتى مش هقدر أعدى عليكى بالعربيه النهارده علشان هيا فى التوكيل "طبعا عارفين شويه الفشخرة دول هو أساسا ماعندوش عربيه وأكيد ماعرفش يزوغ بعربيه باباه".
13. يا حبيبتى انتى بتتكلمى فى ايه أنا كل عطورى من فرنسا "أيوه زغلل عنيها ياواد".
14. يااااااه لما بشوف رقمك على الموبيل قلبى بيتنفض "طبعا من الخضه انها تكون فقسته".
15. فلان قالى اديله رقمك بس انا قلتله اقتلنى قبل ماتاخد رقمها منى "ياااااه على التضحية وهى ياعينى رقمها مع مخاليق ربنا كلهم".
16. حبيبتى عايز صورتك عشان قبل مانام أشاهد جمالك واحطها تحت الوسادة الخالية "لا وهو الصادق عشان لما يتخانقوا يهددها بيها".
17. آسف يا حبيبتى إمبارح مقدرتش أكلمك كنت مشغوووول فى المذاكرة "قصده معهوش فلوس أو مشغول مع واحدة تانيه".
18. آسف يا حبيبتى إنى مقدرتش اجى فى الميعاد إمبارح كان عندى ظروف صعبه "الواد افتكر ميعاد البنت التانيه اللى بقاله 3 أسابيع يؤجله".
19. عارفه يا حبيبتى أنا طول الليل منمتش قاعد بفكر فيكى "بس على ميين ترد عليه تقوله أومال مين اللى كان نايم ومبيردش على التليفون؟ بس كالعادة الرد جاهز.. ياااه انتى تقصدى الخمس دقايق اللى نمتهم دوول؟ دول من كتر التفكير فيكى جالى غيبوبه".
20. عارفه يا حبيبتى أنا أصلا مش بفتح الماسنجر إلا لما بتكونى موجودة أصلا النت من غيرك ما يسواش "يقصد مش بيفتح البلوك عنها إلا لما تكون هيا بس إلى أون لين عنده".