صوم الفار

كان صيف
والنهار طويل
والدنيا حر..
هموت م العطش يامه
اسم الله عليك يا ضنايا
وألف بعد الشر..
هانت.. أنت راجل
والراجل يتحمل..
أهو عدى نص النهار..
بس أوعى تكون بتصوم
زى الفار..
السنة دى إنت كبرت
ولازم تكمل..
صايم والله
حتى شوفى لسانى
مرت الأيام
وأنا لسه ف مكانى..
حان الآن موعد أدان المغرب
حسب التوقيت المحلى..
اكسر صيامك
وقوم صلى..
ده أنا لما حبيتك
لا قلت لحد
ولا حد كان قال لى
آدى منابك
والحتة دى منى زيادة
طول عمرك محظوظ
بتلاقى ناس حواليك
تهديك السعادة
بدون مقابل..
أوعدينى يا حبيبتى
يوم ما نتقابل..
وأبص ف عيونك
أعرف أن الدنيا لسه بخير