لف وما ترجعش تاني

هل من الصدفة ان يكون مدمر ليبيا هو معمرها. و وقبيح تونس الخضراء هو زينها. ومفسد اليمن هو صالحها .وجبان سوريا هو اسدها.والملعون من المصريين هو مباركها . ومهما اختلفنا. ومهما كانت مواقفنا. واتجاهاتنا سواء الايدلوجية اوالعقائدية. فهذه هى الحقيقة مهما كانت مرة. ولله فى ذلك بدل الحكمة الف حكمة. المهم ان نتعظ. ولا نكرر الاخطاء التى تكررت فى وطننا العربى التعيس.وبسذاجة متناهية تثبت وفى قول واحد لا تانى له ان التاريخ يكرر نفسه. وبصورة شبه كربونية. اى والله. وكانك يابو زيد ما غزيت. ولا يا عينى رحت ولا جيت . والمهم دلوقتى اننا لا نجد حتى الان عقاد نافع لكل ما حدث فى التلات سنين اللى فاتت من ثورات وانتفاضات. خد عندك تونس بيقولك هى البلد الوحيد اللى نجحت ثورته . طيب كويس بس ازاى نجحت. والناس هناك كل ما يقدموا رجل. يرجعوا الف ميل ورا. وكل ما كانوا ما يقولوا يا دستور. ما يلاقوا شئ. لغاية ما ربنا انعم عليهم بيه. وبعدين دلوقتى محلك سر. وكل واحد هناك بيقولك: وحنعمل ايه بعد كده؟ والكل متربص لكله من انصار الثورة. وبتوع بن على. و الله يرحمه بورقيبه. ونسور وصقور: النهضة والسلفيين والجهاديين والتكفيريين. والله يكون فى العون . وخد عندك ليبيا واللى حاصل فى ليبيا .واللى بقت بحق بلد ميليشيات. واللى مش عاجبه حد يقوم خطفه. واما يقتلوه. او يطلب فدية. والدولة غائبة؟! وانصار القذافى وعياله على الابواب. مستعدين للرجوع للسلطة بقوة . وياريت الخطر قاصر على ليبيا واهلها. ده امتد للبلاد اللى جنبها. وعمليات التهريب والارهاب. شغالة ليل مع نهار. وعلى عينك يا تاجر. وللى يدفع اكتر. وخد عندك اليمن اللى مصيبتها مصيبة. وبعد كل ما سفك من دم. طلع ناب اهلها على شونة اسمها: الفيدرالية. حتقسم اليمن السعيد لدويلات وحتطمع اللى يسوى واللى ما يسواش فيه. وكان ناسنا هناك. ماقعدوش عقود وعقود. بيحلموا بحلم وحدة الشمال ويا الجنوب! وخد عندك سوريا وحدث بلا حرج. قتل وسحل وخطف وجيوش نظامية. وميليشيات وجماعات ومخابرات. ومن كل لون يا بتيستة . واللة يعوض فى بلد المواجهة الوحيد اللى كان فاضل ضد اسرائيل. وبعد كل دول خد عندك مصر. واللى بيحصل فى مصر ..و الناس اللى بتتصرف وكانها جاية من كوكب تانى. وما لناش دعوة بحد بس نقطع ونبهدل ونكسر ونتخانق وننقر فى بعض.فلا احد يقولك حنعمل ايه بعد ساعة من دلوقتى؟ ولا مرشح يقولك ازاى حينتشل البلد. وينقلنا من زمن الرغى فى الفاضى والمليان اللى احنا عايشين فيه وبيه وعليه .. واللى بنصبح فيه بنبات عليه. وانا ومن بعدى الطوفان وابو الطوفان وامه كمان؟