فانتازيا.. فيلم مرسى الشرقاوى ((أدهم الشرقاوى)) سابقا

بطولة: محمد مرسى (أدهم الشرقاوى) مصر (سلمى) خيرت الشاطر (مغاورى) محمد بديع (الباشا) محمد أبو حامد (عاشور أفندى) أبو إسماعيل (الشيخ شلبى)
منين أجيب ناس لمعناة الكلام يتلوه
كلام قالوه ناس وياما بكره ناس يقولوه
القول على سبع لكن سبع شرقاوى
الاسم مرسى لكن نأبه شرقاوى
حكايته يا العجب فيها العقول بتوه
ومنين نجيب ناس لمعناة الكلام يتلوه
كان أول مكتب الإرشاد
كان أشطر الشطار ولما قامت مظاهرة ضد الأشرار
مبارك وحبيب وجمال وعز وسرور نط من ع السور وقال لابد تولع نار
ولما لقيوه قائدهم خدوه حبسوه من غير تحقيق ولا محاكمه فى وادى النطرون حطوه
آه وألف آه يا جدع لما الزمن بيخيب
والسبع يصبح أسير الكلب ولا الديب، الصبر طيب
أنا رايح وبكره جاى والظالم المفترى بكره ميعاده قريب
قريب الصبر طيب
يا شمس شوفى الجدع ليكون تعبان
قالت عليك يا جدع أجمد من الصوان
همك في دمك ماهمك سجن أو سجان
رفعت صوتك وناديت إحنا ناس يا ناس
لا إحنا عبيد نتملك ولا تراب ينداس
يحميك يا مرسى
الأولة الثورة قامت فى البلد طوفان
هزت وهدت حيطان النظام والسلطان
والثانية مرسى زعق وقال عيب عليك يا زمان
أنا أبقى مرسى وقيد السجن يغلبنى
والثالثه مرسى هرب ومعاه ولاد إخوان
يحميك يا مرسى
أول طريق الهرب شربوا العطش والصهد وفى عز عز التعب قابلوا عرب حماس عن بعد
قربوا قربوا ياعطشانين اشربوا ده انتوا عرب واحنا عرب
وعرفوا مرسى وكانوا بقضيته سامعين
وكسروا قيودهم وادولهم هدوم تانيين
وفى الأمان يا حماس مرسى فرد عوده
واللى يشوفه ما يعرف هو مين
ومشيت يا مرسى
وفى عز ثورة يناير
رجع البلد يا ولد على اللى رآه بعنيه
ظلم ومظالم وشهدا قال احنا ساكتين ليه؟
دى بلدنا، ودول ولادنا، ليه تتقتل؟ تتقتل ليه؟
ولبس بدله وكان لايق فى لبسه تمام
وراح على مكتب الإرشاد يا سلام
بديع الشاطر غزلان عزت الكل قال له تمام
وقاللهم إن سلاحكم فى الانتخابات
يا ناخد البلد يا فيها ما نقعد ولا نبات
من النهارده الظلم ولى خلاص
احنا بإيدنا حناخد حقنا كله
والرك ع الجدعنه ونية الإخلاص
يحميك يا مرسى
وأول الجد مرسى والرفاقة كتير
نزلوا على همم المصريين تكسير
وقالوا انتخاب الإخوان هو ده التكفير
مرسى رئيسكم وهو ده التغيير
وبسرعة البرق كان جاى شفيق يجرى
على قصر الرئاسة وأمله كبير
يقع بخدعه وخوف من الإخوان وقضاه ما خافوا من التزوير
ويكسب مرسى ويخسر شفيق ما يلقى حد مجير
وتعيش يا مرسى
ولبس خواجة وراح بلاد الخواجات يتكلم بدعا الوالدين حبة لغات
حكى لهم ظروف البلد وشحت قروض منهم
ورجع مصر وراح عاينهم
يحميك يا مرسى
وصابك رصاص الغدر جوه القلب من قلب مكتب الإرشاد
ووقعت يا مرسى ولو كان الرصاص له قلب
ما كانشى صابك وكان اترد على الأندال
يا خسارة، يا خسارة يا مرسى
مشهد 1....................................منزل أبو إسماعيل ....................................ليل داخلى
أبو إسماعيل: مساء الخير، ما بتسمعيش؟
زوجته: ما بيتش عندهم ليه؟
أبو إسماعيل: اتمسى وقولى يا مسا، وخدى العمة شيليها جوه
زوجته: وأشيلها ليه ما انت شيلتها من زمان
أبو إسماعيل: عايزة تقولى إيه؟
زوجته: عايزة أقول أنا والناس اتغشينا فيك ما كناش نعرف تحت العمة إيه؟
أبو إسماعيل: إخص الله يلعنك
زوجته: يا شيخ حازم يا راجل يا عالم بقى شويه مدعين دين ومجانين سلطة ونفوذ يشاورولك بصباعهم تروح لهم وتسمع كلامهم؟
أبو إسماعيل: وكتاب الله لو ما سكتى لأخلى ليلتك سوده
زوجته: ما هى سوده بعمايلك اللى زى الطين، خليت سيرتنا فى حنك اللى يسوى واللى ما يسواش
أبو إسماعيل: انتى انتى بتصدقى الواد أبو حامد المأفون ده؟
زوجته: الواد المأفون ده تربيتك إنت، يا خسارة، يا خسارة
أبو إسماعيل: إنتى بتخيطى إيه؟
زوجته: سلامة النظر جلابية
أبو إسماعيل: يا شيخة سيبك منها، وبلاش تمقيق عينين، الصباح رباح
زوجته: اوعى تقرب ناحيتى، ابعد عنى
أبو إسماعيل: لا والنبى
زوجته: أنا حقولك بالمفتشر، مش حخليك تيجى جنبى ولا تلمسنى كمان
أبو إسماعيل: إنتى عارفة تبقى إيه؟ تبقى ناشز
زوجته: ناشز مش ناشز أهه هو ده اللى إنت فالح فيه
أبو إسماعيل: يا ولية إنتى اتهبلتى فى عقلك؟
زوجته: ابعد عنى، اوعى تقرب منى لأحسن أصوت وألم عليك الخلق ويمكن الإخوان يسمعوا وياخدوا على خاطرهم منك
أبو إسماعيل: يا ولية إنتى نسيتى إنك مراتى؟
زوجته: كنت مراتك زمان أيام ما كنت الشيخ حازم لكن دلوقتى لا مراتك ولا أعرفك
أبو إسماعيل: طيب خشى نامى جوه، يا ولية ده ربنا قال للرجالة واهجروهن فى المضاجع مش للحريم
زوجته: للرجالة يا شيخ حازم
أبو إسماعيل: أستغفر الله العظيم، ولا حول ولا قوة إلا بالله................. قطع
مشهد 2................................... مكتب الإرشاد................................. ليل داخلى
مرسى: الندالة دروس بتعلموها لبعضكم
بديع: إنت اتخبلت يا مرسى؟ إزاى تقول على الإخوان كده؟
خيرت: ما هو خلاص عياره فلت ومعدش منه صلاح
مرسى: اليوم جه علشان أرد لكم الدين، السنين اللى قضيتها فى السجن، والعار اللى حل بالشيخ حازم، وتيتيم الأطفال، وحسرة العجايز، والخراب اللى حل على (سلمى) وضرب الثوار فى الاتحادية والعباسية وجلدهم فى المعتقلات ودموع الصبايا اللى اتبهدلوا على إيديكم والدستور اللى فصلتوه تفصيل، والوزارات اللى أخونتوها وكل مؤسسة فى البلد حطيتوا إيدكم عليها، المعارضة اللى همشتوها، الصكوك اللى حتبيعوا بيها البلد وكل أعضاء الإخوان اللى بيظلموا المصريين لازم يدفعوا التمن والمصريين لازم ياخدوا حقوقهم، يا ولاد ال......
بديع: بقيت تفهم فى السياسة كمان؟
خيرت: علمناه الشحاتة سبقنا على الأبواب
مرسى: دى مش سياسة ده حق
خيرت: إنت حكمت على نفسك بالهلاك مفيش حد يدخل بينا ويخرج سليم، إنت كتبت نهايتك بإديك يا مرسى
بديع: كويس إننا عملنا حسابنا على يوم زى ده وعموما البديل جاهز
مرسى: أنا حفضحكم قدام الرأى العام
خيرت: مش حتلحق يا مرسى
مرسى يتلوى فى مكتب الإرشاد من جراء السم الذى دس له فى العصير الذى تناوله
صوت مرسى: آه، آه، آه، عملتوها يا أنداااااااااااااااااااااااااااااااااااااااااااااااااااااال
............................... قطع
مشهد 3........................... ميدان التحرير................................................... نهار خارجى
موسى: دى هوجة زى هوجة عرابى
أبو حامد: دى مكانتش هوجة يا موسى دى كانت ثورة برضه ولولا الخيانة كانت نجحت وإحنا لازم نعمل زى الناس ما عملوا، لازم نشارك نشارك فى الثورة، الثورة لسه مخلصتش ومنتهتش طول ما الإخوان لسه موجودين حيدسوا سمهم فى كل شبر فى البلد
موسى: واحنا نقدر نعمل إيه؟
أبو حامد: بقوة الإيمان بحقنا نقدر نفحت فى الصخر، لازم نخرج الإخوان من حياتنا، لازم
صوت الجموع : كلنا معاك يا أبو حامد، كلنا معاك
.............................................................. قطع... البداية