فيلم الموسم : "رجال فى الغيبوبة" .. بطولة مرسى وبديع !!

هذا الفيلم بطولة محمد مرسى ومحمد بديع
محمد مرسى : عارف يا بدعدع أنا حاسس إن الوضع حيتغير وحتروق وتحلى وتبقى زى الفل بس الأمور تهدى شوية
بديع : أهم حاجة انت تروق أعصابك كل اللى بيحصل ده زوبعة فى فنجان احنا نسيب أبو إسماعيل على المعارضة وهو حيخلصنا منهم هو ومحمد عباس.
مرسى : الدنيا بخير ومصر زى الفل والخير كتير مش فاهم بس الإعلام غيته أيه من التهويل ده ؟ كل شويه مصر حتفلس مصر حتفلس والديون كتيره ديون إيه بس دى اللى بيتكلموا عليها ما البلاد كلها مديونه لبعضيها
بديع : شويه كده ونشغل مشروع النهضة وتبقى زى الفل
مرسى : فكرك مشروع النهضة ده حيجيب نتيجة ؟
بديع : خلى ثقتك فى أى حاجة تعملها الإخوان كبيرة نحن نرى ما لا يراه الأخرون
مرسى : ما هى دى المصيبة أنا نفسى الناس تشوف اللى احنا بنشوفه علشان يهدوا
بديع : اخبار جولتك إيه يا مرسى ؟
مرسى : كويسة فضيلتك انا اجتمعت برجال أعمال كتير وشجعتهم على الاستثمار فى مصر وعرفتهم ان فلوسهم بأمان وان الدنيا ربيع والجو بديع
بديع : ماهو لازم يكون بديع علشان انا موجود
مرسى : ربنا يهدى المصريين ويعرفوا قيمتى وإن حكم الإخوان أفضل حكم ليهم وإنهم فى نعمه مش حيحسوا بيها دلوقتى
بديع : حتعمل إيه مع الإعلاميين والمعارضة وجبهه الإنقاذ ؟
مرسى : كنت ناوى أقطع ودانهم وأعلمهم الأدب وكنت حتخذ إجراءات صارمه لكن السيسى اثنانى عن اللى كنت حعمله وقالى تحاور معاهم
بديع : وانت ناوى تتحاور ؟
مرسى : اتحاور مين يابدعدع اللى عايزىنه هو اللى حيكون وخطه التمكين لازم تمشى لازم البلد كلها تتأخون حتى الإعلام
بديع : صعبه حكايه أخونة الإعلام دى يا مرسى عليك
مرسى : بالصبر كله حيتغير أدى يسرى فوده ربنا انتقم منه وأكيد حيتغير بعد الحادثه فاضل المجعلص اللى اسمه ابراهيم عيسى بكره ربنا يهديه او احنا نعقله ونهديه
بديع : والوليه اللى اسمها لميس دى ناوى تعمل معاها ايه ؟
مرسى : انا بقول ابعت لها ام احمد تحاول تهديها وترشدها للطريق الصحيح يمكن تتعظ وتستجيب
بديع :وجريده الوطن
مرسى :حنحرق ابوها
بديع : ما انتو حرقتوها مرتين قبل كده ايه كانت النتيجه
مرسى : العيار اللى مايصيبش بيدوش واهم خافوا برضوا
بديع : والجبهه حتعمل معاها ايه ؟
مرسى : دول بوء ع الفاضى حسكتهم بالبرود وهدوء الاعصاب
بديع : والبرادعى
مرسى : ده ثعلب عجوز سنانه وقعت بكره نشوف له شوفه ونخلص منه
بديع : احبك واّمنت ان قلبك جامد ووّحش
مرسى : البركه فى الشاطر هو اللى علمنى اكون كده سّبع
بديع : الشاطر ده ربنا يحرسه ويصونه ماجابتهوش ولاده راجل بصحيح ياريت كان عندنا منه عشره كنا قفلنا البلد على نفسنا بالضبه والمفتاح من بدرى لكن نعمل ايه مفيش غير شاطر واحد
مرسى : ربنا يبارك فيه
بديع : يلا انا عازمك على العشا فى مكتب الارشاد انا عارف انك بتحب الكباب وموصيلك الكتاتنى عليه يجيبه من ابو شقره وريش ضانى من اللى انت بتفضلها بينا على المكتب
مرسى : بينا انت فتحت نفسى ام احمد تسامحنى بقى انى حتعشى من غيرها
بديع : اتصل بيها تحصلنا على المكتب تتعشى معانا
مرسى : لا هى لازم تتعشى مع العيال سيبك منها ويلا بينا
بديع : يلا يامرسى
وانصرفا إلى مكتب الإرشاد لتناول الكباب