المرشد للشاطر: إحنا فينا شىء لله!

المرشد: شوفت يا خيرت إن الأمور كلها ماشية فى صالحنا إحنا فينا شىء لله، الراجل النائب العام ده ريحنا إزاى ؟
الشاطر: قصدك الظبطية القضائية .؟
المرشد: هو فيه غيرها ؟ حديث الساعة دى جات فى وقتها كان اختيار موفق أحييك عليه يا شاطر إنت كل يوم بيعدى بتثبتلى فيه إنك تستاهل لقب مهندس الجماعة على حق وعن جدارة.
الشاطر: ده من بعض ما عند فضيلتك لولا توجيهك وإرشادك ماكناش قدرنا نفكر كده
المرشد: بلاش تواضع إنت دماغ يا شاطر وخليفتى فى مكتب الإرشاد أنا كل ما أشوفك بطمن على مستقبل الجماعة إنت عكس مرسى خالص مرسى دايما خايف ومرعوب ومتردد إنت عكسه إنت شجاع.. الخوف ما عرفش طريقه لقلبك إنت قلبك ميت يا شاطر ما بتعترفش بالعواطف العواطف بتودى فى داهية المشاعر مالهاش مكان فى الحرب السياسية وده سبب نجاحك.
الشاطر: أنا بزداد ثقة فى نفسى لما بسمع إطراءك وثناءك عليا.
المرشد: ده لا إطراء ولا ثناء دى الحقيقة إنت أهل لها.
الشاطر: كده ولادنا بالضبطية القضائية دى حيقدروا يتحركوا براحتهم ويأدبوا المتظاهرين والثوار والخارجين عن طاعة فضيلتك والرافضين لحكم مرسى وكمان البلاك بلوك وماحدش حيقدر يقول لهم إنتوا بتعملوا إيه بعد ما النائب العام اداهم ترخيص للفتك بالخارجين عن الطاعة.
المرشد: شوفت الولد اللى اسمه أبوحامد بيقول علينا إيه؟
الشاطر: أيوه شوفت عاوز يقبض علينا أنا وإنت بالظبطية القضائية، بيقول إن إحنا بندير جماعة غير قانونية
المرشد: طقم المحامين والمستشارين بتوعنا عملوا إيه فى النصاب القانونى للجماعة
الشاطر: شغالين معاليك
المرشد: بلغهم إنى مستعجل على الموضوع ده لازم نقنن وضعنا القانونى بسرعة العطلة والبطء ضدنا مش فى صالحنا خالص ماحدش عارف أعداؤنا بيدبرولنا إيه؟
الشاطر: حاضر جنابك
المرشد: مفيش أخبار عن السيسى ؟
الشاطر: ماحش عارف فيه إيه فى دماغه
المرشد: مفيش غير التوكيلات أكيد بيشاور عقله بس خايف من الأمريكان
الشاطر: الأمريكان معانا سعادتك بعد ماراضينا إسرائيل
المرشد: الأمريكان مش مضمونين دول زى الدنيا والزمان قلابين ومالهمش الا مصالحهم ولو لقوا مصلحة مع الجيش حيرمونا ورا ضهرهم لازم نحرص منهم ياشاطر لازم
الشاطر: أمرك يافندم اللى حضرتك تشوفه إنت راجح الفكر ودايما أفكار فخامتك سديدة
المرشد: زودوا الحراسة على مكاتبنا فى القاهرة والجيزة وباقى المحافظات ماحدش عارف المخربين دول ممكن يعملوا إيه
الشاطر: أنا حكلف رجالتنا من حماس بحراسة المكاتب دول قلبهم ميت وحيعرفوا يتعاملوا صح مع المعتدين
المرشد: عين العقل يا شاطر هو أنا بحبك من شوية ماهو من أفكارك السم دى
الشاطر: والواد التافه أبوحامد ده حنعمل معاه إيه حنصفيه
المرشد: بلاش تصفية فى الوقت ده الحكاية مش ناقصة دوشة كفاية عليه قرصة ودن احرقوا مكتبه ولعوا فى عربيته خسروه يمكن يلم لسانه شوية
الشاطر: لكن ده تطاول
المرشد: معلش نأدبه مؤقت وبعد الدنيا ما تهدى نبقى نتصرف معاه
الشاطر: أمر سموك
المرشد: أبوالفتوح لسه بيحلم بالرئاسة عاوز انتخابات رئاسية مبكرة
الشاطر: سيبه يهاتى ماحدش حيسأل فيه ده بوء على الفاضى وبعدين ده انكسر خلاص فى الانتخابات اللى فاتت وخصوصا لما الولد حمدين تعداه وجه قبله ده مش حتقوم له قومة تانى كارت وانحرق
المرشد: ومرسى بيتحرق هو كمان لازم نكوم مستعدين ليوم زى ده
الشاطر: ما إحنا حطناه فى وش المدفع ووقفناه قدام القطر ولو القطر داسه يبقى عادى البديل موجود
المرشد: لسه بتحلم بالكرسى ياشاطر ؟
الشاطر: أنا عاوز الحكومة علشان أمشى أعمالى ومصالحى
المرشد: حتمسكها يا شاطر أنا كلمتى ما تتردش أبدًا
الشاطر: وكلامك ده بيصبرنى وبيطمنى وبيريحنى وده فى حد ذاته كفاية عليا
المرشد: إنت ابنى يا شاطر والأب لازم يقف جنب ولاده وأنا فى ضهرك
الشاطر: كتر خير معاليك ده شرف ليا
المرشد: ولادنا فى قطر حيبعتوا لمرسى قرشين يمشى بيهم الحال شوية
الشاطر: ونعم الولاد
المرشد: حل أزمة السولار خلى البلد تهدا شوية
الشاطر: أمرك اعتبرها اتحلت
المرشد: يلا بينا نصلى وندى ربنا حقه وابقى فكرنى بعد الصلاة أقولك حنعمل إيه مع السلفيين ونأدبهم ازاى
الشاطر: تأمرنى حضرتك.