مرسى ملبوس بجن سلفى والإخوان يلجأون لشيخ مغربى !!

ليل داخلى
المكان التجمع الخامس
الزمان بعد صلاة العشاء
المشهد الأول
-مرسى عصبى ويهذى بكلام غير مفهوم يتحدث بلهجة مغربية منذ يومين
-اتصال بقيادات الإخوان لدراسة الموقف واتخاذ القرار المناسب فورا
-أحد العاملين: ده كلام مغربى أنا متأكد
-البعض طالب بجلسة زار لإن واضح كده إن فيه جن مغربى لابسه
-أخذ مرسى يتمتم بكلام من عينة "قد قول لكم حق هذا ما يرضى رب العالمين"
-تعجب الحاضرون
-الدموع تتساقط من أهله وعشيرته والعاملين، نحيب والله ما كان يومك يا غالى
والله كان طيب وحنين وبتاع ربنا وعمره ما كان مؤذى إلا من تسعة شهور بس.
أحد العاملين: أكيد دى دعوة واحد من الشعب بس باين عليها جامدة قوى جابت رجله.. جن مغربى مرة واحدة؟
-واحد تانى: وليه ما تكونش دعوة الشعب كله
-مرسى يبص يمين وشمال لا يدرى ما يحدث حوله .. عيناه معلقتان بالسقف ويقول كلاما غير مفهوم مرة يقف مرة ينام مرة يضحك مرة يبكى.
-الست أم أحمد: مقطوعة الرئاسه واللى شار بيها .. الراجل هيضيع منى .. حد يشوف حل انتم إيه مفيش فى قلوبكم رحمة الراجل خلاص على وشك الجنون ماله هو ومال الهم ده بس يا ربى
-عدد من قيادات الإخوان: اصبرى يا أخت أم أحمد انتى مؤمنة والمؤمن منصاب لكى الأجر إن شاء الله
-اجتمعوا ووصلوا لقرار هام جدا
أن يتولى الشاطر إدارة شئون البلاد دون أن يشعر أحد تحديدا وسائل الإعلام التى فى انتظار فرصة للانتقام من الإخوان، ممنوع الكلام نهائى حتى نعالج مرسى ويرجع تانى لطبيعته وربنا يشفيه.
-القيادات فى صوت واحد آمين، ده غلبان يارب والشعب ظالمه
-المرشد: يا جماعة لازم الكتمان _ويبص على مرسى _معلهش يا دكتور عشان الجماعة لازم تتحمل تضحى إن شاء الله حتى بالنفس مش مهم المهم الجماعة.
-البلتاجى : وأنا أقول ليه من أسبوع كان عايز يروح المغرب .. ياحبيبى يا دكتور مرسى.
-العريان : دى مصيبة كبيرة لو حد شم خبر تبقى كارثة لازم يكون فيه حل يا جماعة لازم.
-الشاطر صامت لم يتفوه بكلمة واحدة والمرشد لاحظ صمته وسأله والحل يا شاطر البلد هتضيع
-وصول هشام قنديل
-البلتاجى : خير يا وش الخير، انت عرفت منين يا رئيس وزراء الهنا
هشام غاضبا: بالراحة شوية علينا يا دكتور الموضوع أخطر من كلامك.
-البلتاجى فى حالة عصبية : وديت البلد فى داهية وقدمك حلو على الدكتور وعلى البلد يا ترى الدور على مين الراجل هيضيع يا جدعان حد يتصرف.
-الشاطر : اهدى شوية يا بلتاجى
الكتاتنى : لا لا يعنى إيه البلد خلاص ضاعت مصر راحت مننا مستحيل
-البلتاجى باكيا : يعنى إيه هنرجع السجن تانى يانهار اسود ومنيل ده احنا هنشوف أيام أسود من قرن الخروب.
المرشد : يا جماعة لابد أن نتماسك حتى نصل لحل وإن شاء الله ربنا يزيح عنا هذه الغمة إن شاء الله.
المشهد الثانى
خروج مرسى مرتديا ملابس مغربية ويتحدث بلهجة مغربية
-البلتاجى : يا حبيبى كان نفسك تروح المغرب يا حبيبى والله شكلك حلو فى اللبس المغربى.
ويسأل عبدالله بن مرسى هو مين جاب اللبس الحلو ده؟
عبدالله: من زمان عند بابا دايما ده كان يلبسها ده بيحبها قوى وطول ما هو قاعد فى البيت لابس العباية المغربى.
الشاطر يخرج ناحية الجماعة: الحل يا إخوان هو الزار يمكن ربنا يشفى ..أنا اتصلت بشيخ مغربى
-يدخل الشيخ المغربى ويتمتم ببعض الكلمات والحضور فى حالة صمت وذهول
وتدخل بعده فرقة مغربية كبيرة ويطلب من الحاضرين لبس طراطير.
قيادات : يعنى إيه انت مش عارف احنا مين
الشيخ : انتم مين ده موضوعكم لكن موضوعى دى طقوس لازم تتعمل
الشاطر : خلاص يا جماعة نلبس الطرطور
ويسرع أول واحد البلتاجى ويلبس الطرطور ضاحكا : الله حلو الطرطور ده يلا يا إخوان.
وينادى على هشام قنديل تعالى يا هشام البس ده أنت لبست مصر كلها فى حيطة سد تعالى يا خويا البس البس يا خويا.
المشهد الثالث
تبدأ حفلة الزار، بمجرد ما يسمع مرسى موسيقى الزار ويبدأ الرقص بمهارة ويتمايل يمنيا وشمالا ويقدم وصلة رقص مغربية رائعة.
البلتاجى لهشام : شايف المعلم بتاعك والله بيرقص حلو قوى اتعلم الرقص ده فين ده الدكتر طلع خلبوص كبير
لازم يا هشام تتعلم الرقص يمكن يركبك جن هندى انت كمان ولا أثيوبى.
-هشام : لو سمحت يا دكتور خلينا فى المصيبة اللى احنا فيها.
وتخرج القيادات كلها لابسة الطراطير وتبدأ موجة هيستيرية من الضحك والرقص وتبدأ حفلة الرقص المغربى ومرسى فى الوسط والإخوان حوله إلى أن يغمى عليه ويبدأ الحوار بين المغربى والجن اللى ساكن مرسى.
المشهد الرابع
الشيخ المغربى : انت مين وعايز إيه من الدكتور؟
-أنا جن سلفى ومرسى نقض العهد مع الأحباب السلفيين أكتر من مرة ومش كده وبس ده مع الشعب كله كل شوية يقول كلام ويرجع فيه يشرب بقى.
-كل القيادات تبص على الشاطر
الشاطر : هو الموضوع وصل لكده ..ماشى ابعت ليهم جن إخوانى والعين بالعين.
الجن المغربى :على فكرة الجن الإخوانى بيحترم كلمته وعمره ما رجع فيها مش زيكم كل يوم بكلمة وبعدين أنا متحالف معهم تحالف جن يحترم كل واحد التانى مرسى مجرد إنذار والدور عليكم واحد واحد.
البلتاجى يشاور بيده وهو خايف : أنا لا أنا مليش دعوة
الشيخ المغربى: لماذا اخترت مرسى يكون أول واحد؟
الجن المغربى: عشان هو ده اللى هيوجعهم دلوقتى
المرشد بهدوء : يا أخى نتصالح وكفى الله المؤمنين القتال.
الجن : بشروط واجبة التنفيذ وإذا لم تنفذوا يبقى على أنفسهم جنوا الإخوان ماشى.
-قيادات الإخوان : ماشى عدا الشاطر
الجن : والحلو اللى عامل شاطر
المرشد : وباقى الإخوان يطالبوا الشاطر بالموافقة
الشاطر: هعمل اتصال وبعدين أقول لكم الرد
البلتاجى : أكيد هيتصل بأمير قطر هو الأمير يقدر على الجن هى أمريكا
المرشد : اصبر يا دكتور بلاش كلام يجيب مشاكل وبعدين الشاطر بيعمل لمصلحة الإخوان فاهم
-البلتاجى : طبعا وسمو الأمير عايز مصلحة الإخوان بالطبع.
الكتاتنى: يا جماعة لازم نوافق على شروط المغربى بس الخوف تكون شروط تعجيزية زى شروط الشعب والمعارضة وجبهة الإنقاذ أو يطالب بإقامة دولة مدنية ليه لأ.
المرشد: سيان كان المهم نطلع من الكارثة دى
العريان : احنا نسمع وبعدين نقول ونفكر بس المهم نسمع الأول
ليه بس كده يا دكتور مرسى احنا قادرين على البشر لما تروح للجن.
البلتاجى : سرك باتع يا دكتور مرسى اسم الله عليك مرسى العياط اسم الله عليه خلاص يا خويا
خلصت على المصريين ودخلت على الجن مع إنى حاسس إن الكارثة دى هتطلع من البرادعى وصباحى وموسى والثورجية والشعب خلاص.
العريان : دى لعبة وحتما فيه طرف تالت مش بعيد تكون دولة معادية للإخوان.
المرشد : هو احنا هنضحك على بعض بلا طرف بلا خيط الواحد تعب من الطرف والخيط ومن مرسى.
الكتاتنى : فضلية المرشد مالك إيه اللى حصل دى أزمة وإن شاء الله هنخرج منها أقوى من الأول ومرسى هيبقى زى الفل.
يتدخل الشاطر: نسمع كلام الجن ونشوف
الجن: تسيبوا مرسى يحكم مصر لوحدة دون تدخل منكم نهائى.
الإخوان فى صوت واحد : نعم لا لا ما يعرفش ده ما بيعرفش يحكم فرخة لا لا.
البلتاجى : يانهار اسود لو كان كده الواحد يروح أى بلد تانية دة كدة هتبقى عكة.
الشاطر: احنا موافقين بس لينا شرط واحد
الجن : اسمع وشوف يا حلو
الشاطر : ناخد فرصة سنة وبعدين نسيب البلد كلها لمرسى وللشعب.
الجن : يا راجل فاكرنى أهبل واصدقكم لا طبعا ولا يوم
الشاطر: خلاص ستة أشهر
الجن : ولا يوم
الشاطر : ثلاثة أشهر
الجن : ولا يوم
الشاطر : أسبوع وده آخر كلام
الجن : موافق
الشاطر : اجتماع هام الآن للجميع
انصتوا جيدا من النهاردة
الجميع فى حالة ترقب لما يقوله الشاطر
الشاطر : من اليوم تخرج مظاهرت حاشدة فى كل أنحاء مصر تطالب بسقوط مرسى لأنه فشل فى إدارة البلاد.
العريان : فكرة هايلة يا دكتور الله عليك
الكتاتنى : طب وبعدين كدة احنا هنخسر كل حاجة
الشاطر : انت مش سامع كلام الجن المغربى بيدى لابيد عمرو.
وبعد كدة نتحالف مع المعارضة وندفع بمرشح إخوانى مرة تانية ونكسب أو يكون واحد من الأحباب هو الرئيس نفذوا الخطة الآن.
الجن المغربى : يا ساتر يا رب أمانة عليك سيبنى اخرج من مرسى أنا خلاص حرمت وتوبت اقرب من أى واحد إخوانى تانى.
الله يكون فى عون الشعوب العربية وشعب مصر ربنا معاكم.