حوار مع أم الهنا

سألتنى ببراءة .... هو يا دكتورة ربنا هيحاسبنا إزاى
قلت ... بالرحمة , بالإحسان , بالعدل
طب يعنى هما الفنانين دول هيتحاسبو زينا
مش عارفة
إزاى مش عارفة ,,, مش انتى دكتورة
يعنى , بس مش فى علوم الدين
مش ربنا قال و رفعناكو فوق بعض
ههه,,, آه ده حقيقى , ربنا سبحانه و تعالى قال و رفعنا بعضكم فوق بعض درجات
طيب , لازم تكونى عارفة
ماهو ربنا يا أم الهنا لم يعطينى سره .............. بس عموما إنتى عايزة تعرفى ايه ؟؟ يمكن أقدر أريحك
عايزة أعرف هما الفنانات الممثلات دول يعنى هيدخلو الجنة و الالا النااااااااااااااااار
ياااااه , يا أم الهنا .... ده سؤال صعب قوى
و لا صعب و لا حاجة ,,,,, دول حتما و لابد لازم يعنى هيدخلو النار
دى فتوى يا أم الهنا .... و الفتوى تودى جهنم ,,, أنا شايفة إن قاعدتك كتير امام القنوات الدينية هتعمل منك مفتى الديار بعد كدة
شوفى يا دكتورة , من غير كلام كتير , الشيخ بيقول ان الواحدة لما تخرج برة بيتها حرام , و انها تكون كدة يعنى و العياذ بالله لابسة كدة مالط تدخل النار , و انها تتكلم بصوت عالى و تضحك بصوت عالى و ترقص و تغنى , حرام يا دكتورة حرام ,,,, ده غير الحاجات الكتير اللى بنشوفها , الشيخ بيقول ده زنا و العياذ بالله
و إنت مقتنعة شكلك بكلام الشيخ ؟؟
لأ يا دكتورة .... صحيح إحنا تربيتنا مختلفة ما إنتى ست العارفين , و صحيح الواحدة فينا بتكون ملتزمة فى لبسها فى بيتها حتى و هى نايمة جنب جوزها , شوفى يا دكتورة أنا خلفت ست بنات و ثلاث رجالة , و عمرى عمرى الحاج ما شافنى و أنا من غير هدوم
ههههههههه,,, أم الهنا , إنت هتسرحى بيا و الالا ايه ؟؟؟
تضحك من قلبها و يترجرج جسمها الممتلىء و تقول , كاتك ايه يا دكتورة
, فاهماكى , و الله الموضوع ما بيبقاش بالشكل ده ,,, العريان اللى احنا بنشوفه ده فى التليفزيون عمره ما يكون عندنا , إحنا الوضع عندنا مختلف , يعنى مثلا أنا عمر أبوكى الحاج ما باسنى كدة يا ختى
ههههههههههههه , أمال إزاى ؟؟؟
بكلم جد يا دكتورة ,, هو يصح ان الناس تحضن و تبوس بعض كدة ؟؟؟ و تقولى لى هيدخلو الجنة لأ ,,, شوفى , أنا مش من مسئوليتى أحدد مين هيروح فين , ده أنا زى الناس ربنا يرحمنى برحمته ,,,, إنما اللى عايزة أقوله إن ربنا أكيد عنده معايير للحساب , يعنى هو أكثر معرفة بينا , و مواطن القوة و الضعف فى كل نفس , و أكيد و الله تعالى أعلى و أعلم هيحاسب كل واحد فينا على قدر طاقته و قدرته
بس شوفى يا أم الهنا , خلينى أأكد لك على حاجة أنا واثقة منها من غير ما أضر بقاعدة ثابتة عندك , إن ربنا رحمن رحيم , صح و الا إنت ليكى رأى تانى ؟؟
لأ يا دكتورة , طبعا ربنا رؤوف رحيم , ده أحن على الويلد من والدته اللى ولدته
طيب , ليه تستكثرى على ربنا أنه يرحم الفنانات دول
و بعدين خلينى أفكرك برابعة العدوية
آاه , بشوف الفيلم ده كل سنة فى العيد الكبير
أيوة ,,, شفتى بقى ربنا رضى عليها إزاى
أيوة يا دكتورة , بس هى عرفت ربنا فى النهاية , وبقت بتصلى و بتصوم
و مين قالك يا أم الهنا إن الفنانات مش بيصلو و لا بيصومو و لا بيقرأو قرآن و لا بيتصدقو و يزكو
أ يا دكتورة ,,, قولى لى كلام غير ده ... عايزة تقولى إنها بعد أو قبل التمثيل أو الرقص تصلى و تقرأ قرآن .... إزاى بقى
و بعدين الفلوس بتاعتهم جايبنها منين ؟؟؟
يادكتورة ده إنت عارفة إن ربنا طيب يحب الطيب
و زى الشيخ ماقال قصة قابيل و هابيل ,, لما ربنا تقبل من هابيل عشان كان طيب و عشان إختار قربان طيب ,,, و ماقبلش من قابيل رغم إنه أخوه عشان خبيث و لم شوية خضار دبلانين و قدمهم قربان
و الله يا أم الهنا , قصة قابيل و هابيل صحيحة ,,,, إنما برضه الموضوع كبير و غير قابل للفتوى و إحنا قاعدين هنا
خلينا أفضل فى الفاصوليا اللى بتفصصيها دى ...... هو الكيلو بقى بكام النهاردة
الكيلو ده عندكم يا دكتورة ف البندر ,,, احنا بننزل الغيط و نحش شوية خضار و ننيجى نجهزهم و نطبخهم
طيب يا أم الهنا ,,, يادوب تجهزى الأكل عشان معاد الفطار
سيبينى بقى أشوف شغلى
طبعا هربت منها
سؤالها أو موضوعها مهم
لكن بالتأكيد مش أنا اللى أجاوب عليه
ربنا يرحمنا