السيسي قد يكون ميه ميه .. بس البطانة مش هيه

وقد هنا التى تخص سيادة المشير. ليست تقليلا من قيمته. ولا هى ايضا تعظيم مبالغ فيه فى امكانياته فى الحكم. ولكنها تعبير دقيق لرجل اختبرناه عسكريا ناجحا. خاصة فى محاربة الارهاب فى سيناء. ومطاردة فلول الجماعات الارهابية الجهادية المتطرفة هناك. والحكم على الرجل كرجل سياسة ودولة لن يكون الا باختباره فى الامتحان الصعب.. بحكم 95 مليون مصرى. كل واحد فيهم بقى بسم الله ما شاء الله جهبذ فى السياسة. وبيفهم فى الاقتصاد. وعنده معلومات عن العلاقات الدولية. وازاى نركع امريكا وابو امريكا كمان. ونفس ال95 مليون دول عندهم فكرة مش ولابد عن ازاى تبقى مصر زى النمور الاسيوية فى ظرف شهور يا عم وبكده فالرجل امامه بعد ما يبقى رئيس هموم الدنيا والاخرة. ومطالب لن تنتهى لشعب يطالب سيادة المشير بان يصحو كل يوم من خمسة الصبح. وكلنا نعلم ان خمسة الصبح دى هى بالضبط ميعاد نوم اغلب المصريين!؟
يعنى معنى كده انهم حا يطبقوا ومش حيد وقوا طعم النوم والرجل عندما ياتى رئيسا. سوف يفاجأ- وارجو الا يفاجأ- بطوابير النفاق وحملة المباخر بتوع كل عهد. وحا يفاجأ ليه ماهو العينة بينة وبوادرها بدات قبل الهنا بسنة. وراينا من هذه النماذج الكثير. وزى الهم على القلب- اى والله-
واحد مثلا كتب بيقولك واحسب ان السيسى مع حفظ الالقاب والمقامات.. يريد فى قرارة نفسه ان يترشح. قرارة نفسه يا عم الحاج هو انت استغفر الله العظيم عليم ببواطن الامور ولا ايه؟؟ سيب سيادة المشير فى حاله يقرر ما يراه مناسبا له. وللناس. الله يرضى عليك.
وواحد تانى بيقولك ان السيسى خلاص حيترشح قالوا له امتى؟ قال لهم: النهاردة بعد ساعات. وفاتت الساعات. قالوا له: امتى يا عم؟ قال النهاردة بالليل. وفات الليل. وبعدها قالك: بكرة بالكتير. وفات بكرة وبعد بكرة؟! واللى قالك كده ولا عنده خشا ولا حيا. وعمال يطلع من فضائية لفضائية. وكانه المتحدث الرسمى للرجل الذى بالطبع لم يفوضه لذلك.ودى عادة فيه ولا حيشتريها.
فقبل كده قالك عن مرسى : جاء الرجل الذى يحفظ كتاب الله. وشوف دلوقتى بيقولك عليه ايه . والذى نرجوه ان يكون فريق السيسى الرئاسى من ناس محترمة حاسة بالناس. وبالامهم. ومش بتاجر فيها.وخد عندك كمان. . واحدة فضائية لما عرفت انها بره اللعبة. قامت نخز وهمز ولمز عن شلة النفاق السياسى. وده كتير قوى يا جماعة. واوفر والله اوفر. وازاى يا جماعة تبقى واحدة زيها بره الصورة ودى ليها خبرة طويلة فى التلميع. واسالوا جمال مبارك ما فلك الله سجنه .
ونفس الشلة اللى استفادت من كل عهد : عبد الناصر والسادات ومبارك.. واحد منها رجل اعمال متريش قالك عليا ب 30 مليون جنيه.. ولكن اذا ترشح السيسى ! وواحد عمال يطبع فى بوتسترات هنا وهناك ويحط فى الشوارع وفوق الكبارى( وعلى الله ينوبنا من الحب جانب) وخد عندك مع ده وده حتلاقى مش بس كده ده( لا مؤاخذة) ده فى كده وكده وكده كماااااااان