بالصندوق.. وكمان ضمان أربع سنين

حبينا يوم نشتري بوتاجاز
قلنا...نجيبه مستعمل
وننسى شوية وابور الجاز
ونبص بقى للمستقبل

شاروا علينا....
وليه المستعمل؟؟
خدوا لكم واحد بالكرتونة...
- الكرتونة؟؟؟
- أيوة الكرتونة
يعني الصندوق
وعليه كمان
تاخدوا ضمان
أربع سنين
تعيشوا فيها متهنيين
تاكلوا كباب
وتشربوا شاي من غير هباب
وابور الجاز....
- الله الله ع الإعجاز
قال أبويا
شوفولنا حاجة بالتقسيط
أو يعني يكون تمنها بسيط
نزلنا السوق
نلف ندوَّر
شفنا كتير
ولقينا تاجر
شكله...شاطر
وعلامة الصلاة على قورته
تقولش ختم النسر وملزوق

فضل يرغي ويقنعنا
وأغمز لأمي وأبصلها
شكله مش مريحني
نظرة عيونه بتجرحني
قالت لي عيب
إوعي تتجنِّي
- عيب إيه؟؟
ده شكل وشه رد سجون..
يا بنتي حرام
ده الراجل كلامه موزون
وقال الله وقال الرسول

المهم قعد يقنعنا
عندي بوتاجاز
أربعة شعلة
كهربا وغاز
لو خدتوه بيطبخ لوحده
وحتدعولي على الإنجاز
وحيوصلْكو لحد البيت
بالصندوق

بابا سأله:
ده بالتقسيط؟؟
ضحك بسماجه:
وتمنه بسيط
وعليه ضمان أربع سنين

روحنا البيت والزغاريط
مالية الشارع
أم وفاء جابت بوتاجاز
بالصندوق
وعليه ضمان أربع سنين

وفتحناه....
ويااااويلاه
باب الفرن طلع مكسور
رجعناله
بصِّلنا شذرا بكل شرور
إنتوا واخدينه بالصندوق
وعلى فكرة مش راح يرجع
- والضمان؟؟
قال لنا: يولع

رجعنا نجر ذيول الخيبة
والحزن والقهر معانا
بالضبط زي ما يكون
حد ضربنا على قفانا

وصلنا البيت معرفش إزاي
طب اعمليلنا شوية شاي

لسه بولَّع
لقيت البوتاجاز في وشي يفرقع
الحمد لله إني جريت
أبويا قال:
على جثتي لازم يرجع
وأمي قالت:
يانا يا هو في قلب البيت

رجعنا تاني للشرَّاني
بصلنا بصة
كانت راعباني
وقفت في ضهر أبويا
وأمي كانت سانداني

قلناله صندوقك تاخده
وتسيب الحيّ وترحل
ومانشوفش وشك هنا تاني

قال: عليَّ وعلى أعدائي
وأنا حولَّع في شارعكوا
أنا وعشيرتي وإخواني

رجعنا شارعنا نادينا الناس
نزلوا وكانوا كارهينو
وقالوا محناش خايفين منك
غشك كلنا شايفينو
تدينا الحاجة بالصندوق
والصندوق جواه ثعابينو
لمّ تعابينك وإرحل
وصندوقك محناش عايزينه
وشارعنا حينضف منكم
والسجن....
وحشوه مساجينه