بالصور.. قصيدة "لمسة وجع" للشاعر كرم فصاد في أمسيته بإتحاد الكتاب

ألقي الشاعر كرم فصاد هذه القصيدة ضمن باقة من أشهر قصائده الوطنية والغنائية في أمسيته الشعرية بمبني إتحاد كتاب مصر بقلعة صلاح الدين.
قدَّمه في هذه الأمسية الشاعر الكبير المنجي سرحان وشاركه الأمسية الدكتور أحمد منصور والشاعر الحسيني عبدالعاطي، ضمن فعاليات الأمسيات الشعرية بإتحاد الكتاب.
الجدير بالذكر أن هذه القصيدة حصلت علي المركز الثاني لقصيدة العامية عام 2009 من جمعية دار الأدباء برئاسة الشاعر الكبير محمد التهامي.
لمسة وجع
مشَّى إيديكِ ع الجراح
مشِّى إيديك ع الوجع
يا وش عنوان الصباح
ولا حُزن عمره معاه رجع
كل السنين بعدِك عِجاف
كل الفصول بعدك شِتا
ما اعرفش ليه منِّك باخاف
بردان قوى و فين الدفا؟!
يا مقفلة الأبواب
ومألهة الحجاب
يا مبَّعدة الأعتاب
و مقرَّبة اللى خان
أنا قلبى مجروح من زمان
من ألف عام
من يوم ما سبتيه ع الرصيف
يتسوِّل الدنيا ويديكِ الرغيف
والخوف شديد
بيهز أبوابى الضعيفة كلها
ريح الخريف
وتحُط فوق قلبى المحن
وتشدِّنى لبر الظلام
وانتِ الوطن
أنده لمين و أروح لكام ؟!
علشان يحلوا المُعضِلة ؟
غرقان قوى ..
والأجوبة مستعصية ع الأسئلة
والليل تابوت ..
فى قلب حوت
يونس أنا
و اخرج منين ..؟!
كل البيبان متقفِّلة
مجروح قوى..
و الحُزن مالى الحوصلة
كل السنين اللى انقضت
من عُمرِنا نزرع خضار
ليه م التاريخ مستأصلة
كل الحنين اللى ف وريدى

بيشد قلبى لمِقصلة
و الليل دنا
ليه كل فرح ف دنيتى
بيمر ضيف ؟!
و الحُزن ليه
واقف طابور طول السنة ؟!
مستنى طيف
حِلِّى ضفايرك
وافرديهم ع المدى
أيوب يا ناعسة .. هو انا
مشتاق لأجمل سوسنة
شوفى الحنين
واقف فى وش الغُربة
والليل والأنين
شوفى الحنان
مادد جذوره
جوَّه قلبى من سنين
شوفى الأمان
صلبوه على شجر الكلام
تمثال حزين
و لحد إمتى الإنتظار ..؟!
ما فضلش لينا من زمان
غير نور ونار
والشوق جِرار
ماشية فى سكة حلمنا
داير مدار
والضلمة واقفة ع الطريق
فوق كل دار
صعبة الحياة دى ف ليل طويل
وانتِ النهار
بيهد فى حيطان الدُجى
يا ام التاريخ والبهرجة
انت المزار
ليك طواف الأفئدة
كل اللى فات والأمنيات متأججة
وانت اللى أعلم بالطريق
وأنا الغريق
يتمنى لو بايدك نجا
قلبى مشعلل بالحريق
مكتوب عليه الاعتذار
عن شوقُه ليكِ
يوم ما جار
جوة الوريد والأنسجة
مين يا ترى .. ؟!
يبعدنى عن شط الهوان
والكل خان ..
والذكريات ليه محرجة ؟!
وانتِ الحروف
وانتِ الكتاب
وانتِ الغريب
وانتِ الصحاب
وانتِ الفرح
وانتِ العذاب
وانتِ الحقيقة .. والسراب
وانتِ التميمة .. والحجاب
من كل غُربة مزعجة
وانتِ اللى وحدك
بعد ربى المُرتجى.
كلمات الشاعر: كرم فصاد
الكاتب الصحفي والشاعر كرم فصاد أثناء أمسيته الشعرية بإتحاد الكتاب بالقلعة
الكاتب الصحفي والشاعر كرم فصاد أثناء أمسيته الشعرية بإتحاد الكتاب بالقلعة
الكاتب الصحفي والشاعر كرم فصاد أثناء أمسيته الشعرية بإتحاد الكتاب بالقلعة
الكاتب الصحفي والشاعر كرم فصاد مع الشاعر الكبير المنجي سرحان والشاعران الحسيني عبدالعاطي واحمد منصور