مفيش فرح ياعمى.. نياهاهاهاها

والله يا عمي انا قررت ماعملش فرح
=يعني ايه متعملش فرح !! احنا مش متفقين ان الفرح عليك !!
-اه متفقين ان الفرح عليا ...والخطوبه عليكم
=طب ماحنا عملنا خطوبه ...يبقي انت عليك الفرح !!
- خطوبه ايه اللي عملتوها !! انت بتسمي العشرين نفر اللي جبتوهم في الصاله عندكم ... مع حته جاتوه وباتيه جبنه رومي من غير جبنه رومي دي خطوبه !!
= والله ده كان اتفاقنا .. وبعدين يا ابني الفرح ده ليله العمر ... ازاي تضيع علي نفسك ليله العمر !!
-انت عارف ليه سموها ليله العمر !!
=عشان مره واحده في العمر بقي وكده ؟!
-لا ما الراجل ممكن يتجوز تاني ... مش ده السبب
=امال ليه يا ابني
-سموها ليله العمر ...عشان بتدفع فلوس العمر كلها في ليله واحده
=نعم !
- انت عارف اقل فرح لناس زيكم بتحب الفشخره بيتكلف كام ... مش اقل من 50 الف .. انت عارف 50 الف دول شغل كام سنه في الحكومه ؟! شغل 4 سنين ... يعني اشتغل 4 سنين عشان ليله !! وياعالم هنعيش كام 4 سنين
يا ابني مبتتحسبش كده
امال بتتحسب ازاي !! ادفع 50 الف عشان اشغل اغنيتين انا واصحابي الصيع نقعد نرقص عليهم ... وكل شويه واحد سخيف يجي من ورايا ويعمل حاجات مش تمام ويضحكلي ضحكه مع غمزه حمدي الوزير .. او يشيلوني وينططوني ...وطبعا الناس هتبقي فاكراهم فرحانين بيا مش عارفين انهم بيوجبوا معايا
او اخد ذنب واحده جايبه بنتها معاها ...وكل شويه تقرصها في رجلها وتقولها يا بت قومي اعملي اي منظر .... خلي اي حد من المعاتيه اصحابه يشوفوكي ... يمكن تتجوزي بدل مانتي قاعده في قرابيظي كده
او واحد صاحبي يشوف واحده فتعجبه ... فيتجوزها ... ويفضل يدعي عليا العمر كله بعدها !!
ولا قرايبك اللي هيجوا يتريقوا علي اهلي ....وعلي الكوشه ... وهيفضلوا قاعدين علي الترابيزات مستنين البوفيه عشان ياكلوا ويتقلوا ويروحوا يناموا
ده غير لوازم الفرح ....ميكب ارتيست مش اقل من 6 الاف عشان طبعا انت عارف ان وش بنتك محتاج شغل كتير
وفوتوجرافر ب 6 الاف كمان عشان يصورني وانا حاضنها من وسطها وباصين علي السما .... او قاعدين في جنينه خضرا واكيد برضه هنبقي باصين علي السما اللي هو صباح التكرار والا مبالاه يعني
انا عارف ان الصور بتطلع حلوه ...بس مش 6 الاف يعني برضه
حس بيا يا عمي ده انت كنت شاب وعارف الظروف
=عاوز ايه يعني !!!
-هعمل كتب كتاب ... ونسافر اي حته نقضيلنا ليلتين حلوين واهو يبقي ليلتين العمر نياههاهاها
=هتعملوا في الرحمن الرحيم ...ولا مسجد الشرطه ؟!
-سعد ابن ابي وقاص
= ده دار مناسبات جديد ولا ايه ؟!
- ده الزاويه اللي تحت بيتنا ...واحنا اولي بال 5 الاف بتوع كتب الكتاب كمان