اللقاء الأول..عاملين نفسهم عايشين حلم

اللقاء الأول.. عاملين نفسهم عايشين حلم
كما قال الشاعر أحمد شوقي في إحدى قصائده الشهيرة نظرة فابتسامة فسلام فكلام فموعد فلقاء، لكن في التطبيق الفعلى على أرض الواقع يكتمل بيت الشعر ليصبح فخطوبة فزواج وعيال وخناق.
لا يستطع أحد أن ينكر سحر اللقاء الأول الذي يلقى بتعويذته على قلوب الرجال والنساء، الذي بدوره يصنع ضبابا محبوباعلى عيوب كلا الطرفين، فكل منا لا يريد رؤية عيوب الاخر حتى وان كان لها وضوح الشمس – مراية الحب عمية -، لكن من الطريف أن طابع اللقاء الأول يكون متشابها إلى حد بعيد لدى الكثير، حتى وان اختلف ظاهره، إلا أنه يملك نفس الإيقاع والتفسير، لذا حينما تتفاقم الخلافات بين الطرفين يلجأ كل منهما إلى لعنة اللقاء الأول – كان يوم أسود يوم ما قبلتك – على اعتباره بداية الطريق الذي جمعهما معا
ملامح اللقاء الأول العفوى
اللقاء الأول العفوى هو اللقاء الغير مخطط والذي تتعدد أشكاله فربما يتعرفا على بعضهما في المواصلات العامة- ربما تكون خناقة على الأجرة- ويمكن أن يتعرفا في فرح أو أي مناسبة عامة، أو في الجامعة أو العمل وخلافه، بالطبع لا يكون لذلك اللقاء أي نوع من التخطيط سواء في الملابس أو أسلوب االتعامل أو غيره فممكن تكون الهانم منعكشة والاخ مترب – ماعلينا المهم أن العيون هتتقابل وتسرح في بعضها –
اللقاء الأول الرسمى
بالنسبة للقاء الرسمى فدا بيختلف تماما عن اللقاء إياه، هنا بقى البنت ممكن تعلق طقم من بتوع أخواتها البنات ومكياج من صاحبتها وبرفان من مامتها، طبعا عاوزة تكون في أحسن صورة، أما الشاب طبعا بيحلق دقنه ويحط جيل وبرضه يعلق طقم شيك من حد من اصحابه، وبيحط برفان من عند الحلاق، طبعا الباشا لازم يظهر جان وكريم ومفيش منه، بيختار مكان شيك للمقابلة ويمكن كان يستلف فلوس المشاريب، وتبدا طقوس المقابلة
*هو: مش مصدق نفسى انك وافقتى تقابلينى
*هي: بصراحة كنت مترددة بس ماحبتش أزعلك
*هو: مانمتش امبارح من كتر التفكير فيكى
*هي: -ابتسامة خفيفة مصحوبة باحمرار الوجة- وانا كمان
*هو: على فكرة انت شيك اوى ورقيقة اوى وجميلة أوى ٍالنهاردة
*هي: ميرسى.. دا من ذوقك
*هو:اة.. سامحينى على قلة ذوقى.. الكلام اخدنى ونسيت أسألك تاكلى إيه؟
*هي: ميرسى انا مش هقدر أكل- لكن طبعا من جواها نفسها تطلب المنيو كله وتاخد كمان معاها اكل وهى مروحة-
*هو: لا ازاى لازم تاكلى أو تشربى حاجة
*هي: خلاص هشرب لمون- رغم انها مهرية لمون في البيت ومابتحبهوش بس طلبته علشان ماتشربهوش وتبان قدامه مؤدبة وقنوعة
*هو:ياااااة أخيرا حلم حياتى اتحقق وقاعد مع اجمل بنت في الدنيا
*هي: ( مكسوفة وتبص في الارض)
*هو:اتكلمى انا بحب اسمع صوتك
* هي: ياااااة اتأخرت لازم اروح
* هو: بسرعة كدة احنا لسة يادوب قاعدين
*هي: اسفة جدا مااقدرش اقعد اكتر من كدة
وينتهى اللقاء وهم الاتنين قلبهم متعلق ببعض ونفسهم يفضلوا قاعدين لكن لكل شئ نهاية.. وينزل التتر بابتسامة هادية من الطرفين
تلك هي مواصفات اللقاء الأول التي تكون فيما بعد محل لعنة الطرفين في اقرب خناقة بينهما، فهو لب العلاقة بينهما فقيمته هي الاعلى أهمية بين اللقاءات الاخرى.
لذا فنصيحتى للجميع احذروا اللقاء الأول..احذروا اللقاء الأول.. لو حصل بلاش تتجمل زيادة عن اللزوم علشان الايام السودة اللى بعد كده.