بهدلني إبن اللذينة

السلام عليكم.. أولا أنا باشكر الموقع الرائع وباشكر كل القائمين عليه .. ثانيا أنا عندي مشكلة.. أنا عندي 22 سنة ، متزوجة من شهر، ومش متجوزة عن حب ؛ بابا كان شديد عليّ أوي، وكنت عايزة أخرج من البيت بأي طريقة .. وكمان ماما ضغطت عليّ جامد أوي؛ لأنه متدين ومحترم وبيحبني جدا ومبسوط ماديا هو كان بيشتغل في مصر، وبعد كده سافر الخليج بعد خطوبتنا بشهرين، ونزل وأتجوزنا في نفس الأسبوع اللي نزل فيه.
وفي فترة الخطوبة أنا كنت باتحجج كتير أوي؛ علشان ماكلمهوش على النت ولا على الموبيل رغم إنه كان بيتصل كتير جدا .. بس أنا ماعرفتش أحبه خالص؛ بس كان لازم أخلص من البيت وتحكمات بابا فيّ ، وكلام ماما إن كل البنات اللي في سني أتجوزوا وأتخطبوا، وأنا لو سبته وعديت 25 سنة سني هيكون وحش للزواج.. والكلام بتاع الأمهات ده، وكمان أنا بنتها الوحيدة، وعايزة تفرح بيّ.. أنا الحمد لله متعلمة وهو كمان .. المشكلة إني أتجوزت وكرهت الجواز وكل حاجة , هو أيام الخطوبة قال لي إنه هياخدني معاه لما يسافر بعد الجواز، بس مع الأسف الكلام أتغير بعد كده.
أنا كنت عايشة مع أهلي في القاهرة، ولما أتجوزت رحت الفلاحين، والأهم إن حماتي معاها مفاتيح الغرف بتاعت الشقة ، وكمان معاها كل مفاتيح الشقة ، وجوزي معاه مفتاح واحد بس وبيسيبه كمان لما بنخرج ، وكمان رافضة إني أسافر معاه علشان المصاريف هتكون كتير عليه ، قالت له: "هي تقعد معانا هنا، وتاكل وتشرب من اللي إحنا بناكل ونشرب منه"، وطبعا هو علشان مايزعلهاش قال لي: "أنا هابقى أبعت لك الزيارة بتاعت 3 شهر، بس مش هتكوني معايا على طول".. وكمان من بعد أسبوع من الجواز هو بقى ينزل كل يوم تحت عند حماتي طول اليوم، وبالليل عند أصحابه، وأنا باكون لوحدي , حماتي بتبعت لي علشان أنزل أساعدها وبنتها الكبيرة اللي في سني بتكون نايمة أو تعبانة أو عند أقاربها، وعايزاني أنا أخدمها، وبتصحيني كل يوم من الساعة 7 الصبح علشان أنزل لها، وبتقول لي: "أبقي سبيه نايم وأنزلي .. ماتستنهوش يصحى علشان تنزل لي؛ علشان نشوف اللي ورانا".
وطبعا هو عاجبه كل الكلام ده، بيقول لي: "فيها إيه؟! إنتي عارفة من الأول أنك هتروحي فلاحين مش لسه في القاهرة".. وكمان بيزعق لي قدام أهله وبيكلمني وحش؛ عايز يعمل قدامهم إنه الكل في الكل، وقال لي: "أنا لما أسافر إنتي هتنزلي عند أمي، وتاكلي وتشربي تحت، وتروحي لأهلك يومين في الشهر"، أنا تعبت وزهقت من كل اللي أنا فيه، وفكرت كتير إني أسيب الدنيا كلها وأمشي .. يا ريت حد يقولي أعمل إيه في اللي أنا حطيت نفسي فيه.
أ . س
فضفضة
أولا لابد وأن تتحدثي إلى زوجك بهدوء وتلفتي نظره لما ترينه مناسب لحياتكما وأن الحياة قابلة لفكرة المرونة , إذا تقبل الكلام إستمري في تفاهمك معه بهدوء ولباقة , بينما إذا رفض عليك بإخبار والديك وبالتأكيد ستجدي لديهما الحل , في كل الأحوال المشاكل الزوجية وخاصة التي دخل بها طرف آخر مثل والدة زوجك تؤخذ بالتفاهم والترويض , وفقك الله للأصلح .