أهالي أرض اللواء: "نظرة يا رئيس الحي.. القمامة تقبض أرواحنا"

على الرغم من كونها المنطقة الحيوية فى أرض اللواء، إلا أن يد الإهمال تسربت إليها كغيرها من مناطق الحي، وهى منطقة المحور، التى تحاصرها القمامة من كل جانب، الأمر الذى أثار غضب الأهالي، مناشدين النائب عبدالرحيم على بالتدخل ومخاطبة الحى الذى يتجاهل ذلك رغم بساطة الأمر.
عم حسن صاحب ال50 عاما يقول: «مكان عام والناس داخلة وخارجة منه، نشم الريحة، تسببت بأمراض، هل يعقل أننا دلوقتى كل مشكلة حياتنا، إننا نطالب الحى بإنه يشوف شغله ويشيل الزبالة، بنمشى رجلنا تغوص فى الزبالة، وبقينا على بحر من الزبالة محوطانا من كل مكان، وللعلم يعنى إحنا تابعين لحى العجوزة، وطبعا إحنا لا نتساوى بمنطقة العجوزة، فعايزين نعرف السبب وسؤال مش برىء لرئيس الحى، يا سيادة اللواء لو دا فى حى العجوزة كنت هتسيبه كدا ومخاطبتنا ليك ولا ترد عليها، ولا فى فرق بين مواطن أرض اللواء ومواطن العجوزة؟».
أضافت سوسن علي: «الزبالة ريحتها بتدخل بيوتنا بمجرد ما نفتح الشبابيك أو الأبواب لأن ده طبيعى، ولا حد بيسأل فينا، منظر الزبالة من كل ناحية، حوالين الكوبرى، ازاى أصلا، ازاى تتساب كده، والكوبرى واجهة المكان، يعنى لازم يكون نضيف، ده غير الدخول والخروج منه 24 ساعة، يا ريت نهتم».
وقال كمال علي: «أنا مش عارف أقول إيه غير ارحمونا من الريحة والمنظر والناموس والذباب اللى ناتج من الزبالة، دى حاجات بسيطة، مش فاهم ليه سايبينها كده، يا ريت الحى يتعاون معانا ويشيل الزبالة دى، خاصة أنه مكان عام قبل أى حاجة، يعنى واجهة البلد تتساب كدة ازاى طيب؟، يا ريت المحافظ ييجى يمر مرة من هنا ويشوف الحى بيعمل إيه سايب الدنيا، وإحنا نتصاب بالأمراض، ولا الحشرات منعرفش ننام بسببها وهما ولا هنا، يا ريت تحسوا بينا ولو مرة يا كل العاملين فى حى الدقى».