كلام مسئول

محمد صلاح: يا مساء الخير الرسام الهولندى فان جوخ مسمهاش زهرة الخشاش سماها آنية وزهور لكن هى أشتهرت بزهرة الخشاش بسبب زهرتين خشاش تحت فى الجنب كده فى تحت الجنب الشمال من اللوحة ما كنتش اللوحة أهم ما رسم فان جوخ رغم كده وصل سعرها ل100 مليون دولار إذا كان إتقال 55 مليون دولار أول ما إتسرقت فدا تقدير تمنها من 20 سنة سرقة اللوحة عملت حاجات كتير قوى أولها عرفتنا إن مش أحنا بس بنتسرق عندنا لأ دا فى لوحات بقى فى أعظم المتاحف بتسرق هات يا نشر بقى عن سرقة لوحات فى فرنسا فى المكسيك وأسبانيا وجواتيمالا غريب الأخبار دى ماكنتش بتتنشر ليه قبل كده ؟ ما علينا السرقة كمان رفعت إحساس الناس بالفن التشكيلى خصوصا بقى بعد الأرقام اللى إتقالت دا أسعار اللوحات بقت نار يا ريت رب ضارة نافعة أصحابنا الفنانين التشكيليين يبيعوا والناس أذواقها تتحسن نهتم شوية باللوحات حاجة كمان سرقة اللوحة بالسهولة دى رجعت لينا عادة جميلة قوى ننفرد بيها بين الشعوب وبين الأمم أى مصيبة تتطلع الشعوب حريقة هنراجع مواصفات الأمن الصناعى تغرق مركب هنراجع بقى أحوال المراكب قطر يلبس فى أخوه هنراجع احوال القطارات والمزلقانات والقضبان وبعدين يقل الإهتمام وترجع ريمة لعاداتها القديمة لغاية ما نصحى على كارثة جديدة وندير المسألة بنفس الطريقة زهرة الخشاش جات من هولندا وأشتراها محمد محمود خليل وحطها فى بيوته اللى سابه لحرمه اللى إتبرعت بيه بعد كدهبعد وفاتها علشان يكون متحف ليهم هما الأتنين إتسرقت من 20 سنة فاتت وبعدين أتسرقت تانى بقى من عصابة كبيرة أو من الله أعلم يمكن يكون دا حصل علشان نعيد ترتيب نعرف الكنوز اللى عندنا ونحافظ عليها ثروتنا فى متاحفنا وقصورنا هيكون لينا عنها النهاردة كلام مسئول
تقرير
فتحت سرقة لوحة زهرة الخشاش للفنان الهولندى فان جوخ من متحف محمد محمود خليل وحرمه فى قلب القاهرة فتحت قضية الإجراءات الأمنية ليس فى متحف محمد محمود خليل فحسب وإنما فى كافة المتاحف الفنية فى مصر خصوصا وأن هذه المتاحف تحوى كنوزا قدرها البعض منذ نحو 20 عاما بأنها يمكنها أن تسدد ديون مصر ناهيك عن الكنوز الأثرية التى لا تقدر بثمن فى مصر عشرات المتاحف الفنية والأثرية والنوعية غالبيتها مفتوحة فى السنوات الأخيرة وتم تجهيزها لكن سرقة زهرة الخشاش أصابت الجميع بالشك من أن تكون التأمينات موجوده شكلا وليس موضوعا وأن الإجراءات قد تنكشف وتنهار أما أول محاولة للسرقة وعقب سرقة زهرة الخشاش جرت مراجعات سريعة لإجراءات تأمين 23 متحف تابع للمجلس الأعلى للأثار مع العمنل على تطوير 18 متحف جديد وتأمين كلا منها بوسائل الإنذار الحديثة من كاميرات المراقبة وأجهزة الإنذار ومكافحة الحرائق يدرك من أقربوا من ملف زهرة الخشاش أن عملية تأمين المتاحف الأثرية لا تنجح إلا من خلال منظومة متكاملة من العنصر البشرى المؤهل والألة فى تنسيق متشابك للمتابعة اليومية الدقيقة وصيانة وإصلاح الأجهزة والإحلال والتجديد
محمد صلاح: يمكن بسبب شهرة زهرة الخشاش سرقتها عملت صدى واسع تلاقى الكل مهتم بيها من ساعة ما إتسرقت لحد دلوقتى لكن اللى زعل الناس بجد إن أحنا حسينا إن أحنا عندنا كنوز كتيرة مش عارفين نحافظ عليها نحافظ عليها أزاى ؟ أنا معرفش عايزين نعرف بقى العام للمجلس الأعلى للأثار الدكتور زاهى حواس هيكون لينا معاه كلام مسئول ومن كلام الدكتور زاهى حواس لم تكن السرقة جريمة عادية عند أجدادنا الفراعنة ولكنها كانت بمثابة زلزال تهز المجتمع كله وتعتبر جريمة ضد الأله نفسه الأله الذى يحكم بالعدل بين البشر وكان كل من يثبت عليه جريمة السرقة لا يستطيع العيش بين الناس لأنه تجرأ وسرق ما لا حق له فيه سرقة التراث الحضارى لا تحرمه القوانين الدنيوية فقط بل إن الحث الأنسانى والضمير يحرمه لما فيه من ضياع وتاريح وحضارة الأمه هذا التراث ليس ملكا لفرد بعينه وإنما ملكا للأنسانية كلها وقال الدكتور زاهى حواس المتاحف الأثرية المفتوحة مؤمنة تماما بكل وسائل التأمين الألية ومنها كاميرات المراقبة وأجهزة الإنذار ومكافحة الحرائق بالأضافة إلى العنصرالبشرى الذى يتمثل فيه مراقبى الأمن وعناصر الشرطة وهذه المنظومة تعمل وسط تنسيق ومتابعة على مدار 24 ساعة ومع ذلك الحاجة بتتسرق السياحة هى العدو الأول للأثار زيارات السائحين للمقابر الأثرية لها تأثيرات خطيرة نتيجة إنبعاث أبخرة التنفس مما يؤثرا سلبا على نقوش المقابر موضوع زهرة الخشاش بين إيدين القضا لكن اللى يهمنا أنوا ما يتكررش اللوحة أصلية ولا مش أصلية الإنذار معطل الص فلسع يمكن باعها أتخلص من البضاعة يمكن هرب من البلد يمكن جوا البلد يمكن عايش فى ورطة بعد ما سرقها كده بالساهل مش عارف يتصرف فيها يمكن اللوحة تختفى للأبد أو تظهر بعد شوية هنعمل أيه أنا معرفش بس عايزين نعرف بقى الدكتور زاهى حواس الأمين للمجلس الأعلى للأثار بقى رئيس لجنة متابعة المراقبة على تأمين كل المتاحف المصرية هيكون لينا معاه كلام مسئول
فاصل
محمد صلاح: أرحب بالأمين العام للمجلس الأعلى للأثار الدكتور زاهى حواس منورنا يا دكتور
د/ زاهى حواس : شكرا يا أستاذ محمد
محمد صلاح: دكتور زاهى موضوع سرقة لوحة زهرة الخشاش أمام القضاء وبالتالى أحنا ما بندخلش أبدا فى أعمال القضاء ولكن اللى يهم الناس ويهمنا إن السرقات دى تتوقف وأنها ما تتكررش معايا ؟
د/ زاهى حواس : معاك
محمد صلاح: أتشكلت لجنة قرينا فى الجرايد المفروض أنها برئاستك لى إاعادة الرقابة على تأمين كل المتاحف اللى أنا عايز أعرفه اللجنة دى ناقشت أيه ؟ شافت أيه على أرض الواقع؟ أيه رؤيتها علشان السرقات دى ما تتكررش ؟
د/زاهى حواس : تمام هو أنا بس علشان أوضحلك الموقف أحنا فى الأثار عندنا 54 متحف أثرى
محمد صلاح: دول تابعين لهيئة الأثار
د/ زاهى حواس : وفيه تبع الفنون التشكيلية عندهم حوالى 18 أو أكتر معرفش متحف لما أتسرقت لوحة الخشاش السيد فاروق حسنى وزير الثقافة فكر إن أحنا نعمل عبارة عن مركز شامل المركز دا يراقب كل المتاحف ليست فقط المتاحف الأثرية ولكن أيضا المتاحف الفنية علشان نعمل هذا لموضوع بنعمل أيه ؟ بنتصل بالجهة الى ممكن تعمل هذا المركز والجهة الوحيدة الى ممكن تعمله وبإقتدار هى جهة الأمن القومى هيئة الأمن القومى فأحنا تقدمنا وأنا أتصلت بالأمن القومى بناءا على تعليمات سيادة الوزير وبدأ الأمن القومى دلوقتى بيعمل دراسة المفروض هتتقدم لينا للتنفيذ خلال أيام قليلة طبعا علشان يعملوا هذا لازم يعرفوا التكنولوجيا شكلها أيه ؟ ويعملوا أيه ؟ يعنى بتاخد وقت وبيعملوا إتصالات خارجية علشان يقدروا يعملوا تكنولوجيا حديثة الحجرة اللى من خلالها تعرف كل ما يدور فى المتاحف
محمد صلاح: بس الناس ممكن تسأل يا دكتور زاهى على طول والكلام دا مكنش موجود ليه يعنى ؟ سؤال صعب ولا حاجة ؟ ولا بتاخد نفسك ؟
د/ زاهى حواس : لا لا لأ مش صعب ولا حاجة أنت لازم تسألنى المتاحف اللى تبعك عامل فيها أيه ؟ لكن متقوليش المتاحف الى مش تبعى متحملينيش المسئولية دى
محمد صلاح: أنت تتحمل دلوقتى المسئولية بعد تشكيل اللجنة الجديدة لكن اللى قبل كده بتتنصل من أو ..........
د/ زاهى حواس : كل الى أنا مسئول عنه فى الوضع الجديد هو أنى أنا أعرض على السيد الوزير إتصالات أحنا عملنها مع الأمن القومى لعمل هذه الحجرة
محمد صلاح: اللى هى حجرة رقابة على المتاحف كلها يعنى
د/ زاهى حواس : يعنى غرفة مركز المهم أنها من خلال الكاميرات تقدر تعرف كل ما يدور فى المتاحف لكن أحنا بالنسبة للمجلس الأعلى للأثار
محمد صلاح: قولى بقى المتاحف بتاعة الأثار أخبارها أيه ؟
د/ زاهى حواس : أنا زى ما قلتلك عندنا 54 متحف منتشرة فى كل مكان فى مصر منها متاحف بتنشأ لسه جديد متاحف بتطور لكن المفتوح لزيارة 23 متحف كل ال23 متحف هذه المتحف بعد تطويرها تم عمل يعنى كاميرات وأجهزة إليكترونية لتأمين هذه الأماكن تأمين تام بيحصل أيه بقى ؟ الحاجة المهمة أنوا أنا عامل شركات صيانة كل متحف من هذه المتاحف يعنى فيه فى أسوان 3 متاحف فيه شركة واحدة للصيانة المفروض مدير المتحف فى إسكندرية متحف المجوهرات حصلت فيه مشكلة بيتصل بشركة الصيانة ولازم شركة الصيانة فورا فى نفس اليوم تقوم بنفس الدور
محمد صلاح: الصيانة دى بتقوم بالتأمين ضد السرقة ولا النضافة والديكور ؟
د/زاهى حواس : لا الصيانة ليس لها صلة بالنظافة إطلاقا الصيانة هى الصيانة الإليكترونية الخاصة بتأمين المتحف فقط أمنيا شركة النظافة دا موضوع تانى لكن أى كاميرا عندك تعطل تيجى تصلحها فورا كابل كهربا أتقطع تيجى تعمله فورا وبيحصل أيه تانى بقى ؟ أنوا قطاع المتاحف عندوا لوا بيرأس إدارة هذه الإدارة مهتمتها التأكد أنوا دا كله بيتم ولا لأ ؟ ونمرة 2 لازم مدير متحف فى كل منطقة وفى كل متحف لو عنده مشكلة لازم يبعت فاكس فورى بالمشكلة اللى عنده
محمد صلاح: يعنى أقاطع بقى عايز أسأل دلوقتى أنت كلامك معناه يا دكتور أنوا المتاحف التابعة لهيئة الأثار كلها متأمنة وما يتسرقش منها حاجة
د/زاهى حواس : لأ هقولك حاجة أنت لازم تعرف إن أهم حاجة مش الكاميرا والحاجات الإليكترونية
محمد صلاح: العنصر البشرى مش كده ؟
د/زاهى حواس : أه العنصر البشرى مهم جدا وللأسف الشديد مهما بتعمل تدريبات للعنصر البشرى العنصر البشرى يعنى لوحة الخشاش لو ما كنوش راحوا سابوا المتحف وراحوا يصلوا مكنش حد هيسرقها لأن العنصر البشرى موجود لكن ممكن العنصر البشرى يغفل عن مراقبة كاميرا متحف فى فيينا من أهم المتاحف اللى فى العالم اللى فيه كل مكان فيه كاميرا دخل لص محترف لسرقات اللوحات ودخل من فوق سرق اللوحة وطلع متحف بوسطن للفنون الجميلة يوم جمعة الساعة 12 دخل لصوص الأثار مسلحين والكاميرات شغالة وسرقوا
محمد صلاح: دول مسلحين يا دكتور لكن أنا معاك وكل البنوك فى العالم معرضة للسرقة
د/ زاهى حواس : ما هو أنت متسبش فلوسك على الترابيزة لكن أنا بقولك أهو أنا كأثار عامل كا إحتياطاتى أنا أولا رغم كل اللى معمول فى قطاع المتاحف أشوف دور أنا أيه ؟ فى رئيس قطاع المتاحف وكل متحف له رئيس وقدامهم فيه رئيس أنا بقى كأمين عام مسئوليتى كجهاز متابعة على أعلى مستوى لازم كل يوم تأتى جهات لمراقبة كل متحف فى مصر حصل بقى خطأ من أى موظف فى المتحف أو فى القطاع يعنى أنا أسف مش أفترى ولا حاجة أنا مؤمن بالثواب والعقاب أنا عندى شفت واحد عمل عمل محترم واحد أخطأ خطأ أشيله لو فى المتحف بتاعه عامل شيىء مش مظبوط لازم يمشى ما ينفعش أنقله مكان تانى وأنا بقلهم أفرض أنت عندك مشكلة فى المتحف عرضتها على رئيس القطاع مردش عليك رئيس القطاع ؟ تيجيلى توقف على مكتبى تقولى فى مشكلة رئيس القطاع محلهاش
محمد صلاح: أمال ليه بعد أزمة زهرة الخشاش دى عندك 3 متاحف أتقفل ؟ من ضمنهم متحف النوبة أتقفل وأتفتح تانى
د/ زاهى حواس : أحنا بنجدد متحف النوبة دا معمول أتعقد من سنة 88 معمول من زمان جدا
محمد صلاح: مش أسباب تتعلق بالرقابة ؟
د/ زاهى حواس : الكاميرات اللى موجوده فيه بتحتاج إلى تجديد فأحنا بنجدد المتحف المصرى دلوقتى يعنى بدأنا التجديد لكن الكاميرات القديمة كلها شغالة فأنا فى متحف النوبة لقيت الكاميرات متهالكة قفلنا لمدة أسبوع واحد بعد الأسبوع جهاز الأمن القومى مع المسئولي فى الأثار وعملوا تقرير بيقولنا أنوا المتحف متأمن
محمد صلاح: طب الأساليب اللى أنت واخدها فى الهيئة بتؤمن الأثار وتطمن الناس شوية أمال ليه أتسرق من عندك من قصر محمد على لوحات تابعة للأثار ؟
د/ زاهى حواس : القصر دا مفتوح قصر لا يمكن يراقب بالكاميرات القصر رحته؟
محمد صلاح: رحته طبعا
د/ زاهى حواس : شفت طبعا لايمكن يكون فيه كاميرات
محمد صلاح: لا لا ممكن يبقى فيه بس عايز كاميرات كتير
د/ زاهى حواس : لا لا لأ ما ينفعش ولو جبت مليون كاميرا لأن دا حاجات مفتوحة
محمد صلاح: يعنى يتسرق يتسرق ؟
د/ زاهى حواس : أنا عامل إجراءاتى كلها إجراءاتى هى أيه ؟ عندى أمن عندى شرطة بره يعنى كل الإجراءات كلها أيه وجه الإهمال بقى ؟ لما أسيب متحف مفيش فيه كاميرات ولا مراقبين أمن على مستوى عالى ويسيب المكان ويروح يصلى وميرجعش تانى الموظف يتجاز على هذا الإهمال لكن أحنا عاملين كل الإجراءات يعنى أنت دلوقتى لو فيه متحف جراله حاجة متقدرش ترمى المسئولية على حد فيه لأن أنت عامل كل إجراءاتك
محمد صلاح: الناس بقى سايبة أماكنها ورئيس القطاع نايم فى البيت ومديرة المتحف بتولد نعمل اللى علينا والباقى على الله يعنى دكتور زاهى أنت كمثقف يعنى سيبك من مكانك الوظيفى دلوقتى للإيجابة على الؤال ده أنت مش شايف إن عندنا مشكلة كبيرة فى مصر وهى أنوا لما تحصل كارثة زى كارثة زهرة الخشاش كده بنشكل اللجان ونحط السيخ المحمى فى صرصور ودن اللى يعمل مش عارف أيه وبعد كده نرجع تانى
د/ زاهى حواس : هو شوف فى العالم كله كده
محمد صلاح: برضه
د/زاهى حواس : العالم معانا فى أيه ؟ لما بيحصل مشكلة بيحصل تشديد وبيستمر التشديد عندنا كلامك صح بعد شهور كله يرجع تانى وبكل أمانة أحنا عندنا دراسات يعنى أقدر أقولك لا ما مات
محمد صلاح: دكتور زاهى قولى طريقة أخرى للإدارة فى مؤسسات الدولة نعالج القصور أللى بيحصل ده أنوا ميبقاش بتحصل المصيبة فنقوم وبعدين نهدأ مركب يغرق نشوف أخبار السمك والبحر أيه؟ قطر يلبس فى أخوه نشوف أخبار القضبان أيه ؟ بتبقى العلاج على المدى الطويل
د/زاهى حواس : علشان تعمل وتصل إلى المستوى اللى العالم كله بيعمله لازم يكون عندك سيستم شغلك صح وتختار المتعاونين ليك صح لازم أنت بقى كمسئول تصحى اللى حواليك كل يوم متغمضش عينيك يعنى أجى الصبح كل يوم الساعة 9 فى مكتبى 9 ، 9 ونص بعمل أوامر أعمل كذا اللى هيعمل كذا يعمل كذا بعمل أوامر مكتبية كل يوم
محمد صلاح: بتدخل أنت كل يوم تشوط على طول
د/ زاهى حواس : بصحى الناس
محمد صلاح: بيروح نايمين مريحين يعنى
د/ زاهى حواس : المصرى ما بيرجعش لمجده بيرجع للحصل من الإستعمار من أيام الأسكندر الأكبر والعرب الدنيا
محمد صلاح: إدينا بقى فى التاريخ
د/زاهى حواس : أحنا بقى عايزين نصحى من أجل مصر لازم أحنا فى مصر بنعتمد على المسئول الأول هى للأسف الواحد بيغير بص للطيران المطارات كان أحمد شفيق بص لمحافظ إسكندرية اللواء عادل لبيب وبص لقنا وأللى حصل فيها يعنى المكان الشخصى مهم جدا فأنا عايز أقولك حاجة أحنا عايزين دايما حد يصحينا فلازم المسئول دايما يعمل كده لأنوا لو غمض الناس هتنام
محمد صلاح: بس فى كلام فى الإدارة يعنى ضد الكلام اللى بتقوله المسئول لما بيكون صاحى وواعى وعنده مكان لكن فى نظرية قايمة على عدم المركزية وهى تتعلق بالناس اللى تحتك
د/ زاهى حواس : أنت عارف أنا بضحك ليه ؟ لأنوا من سنة 52 ربطت كل الناس بالوظيفة أنت عارف أنت لو جالك موظف صغير الموظف دا ممكن تنقله لحتة تانية وممكن الموظف دا أولا متقدرش ترفده ممكن يخلى حياة المسئول سوده يقعد يكتب فى شكاوى وفيه تلغرافات من محمد صلاح ويقول إنقذونا يعنى فى أى مكان تانى علشان تنفذ كلامك ده لازم المسئول ده يبقى فى أيده يغير لازم اللى بيشتغل ده يبقى عارف أنوا لو أخطأ هيمشى لكن أنت بالعكس دا المثل أللى لازال فى الدولة يقولك لو مشتغلتش فى مش عارف أيه فأحنا أنا عندى كل الناس اللى تحتى وبديله السلطة الكاملة وأقوله أغلط وبعلمهم والحمد الله أنا نجحت مع الناس بتوعى فى المدة البسيطة اللى فاتت دى إن أحنا الصغير بياخد قرار وبيتحمل هذا القرار ولو أخطأ ما أعقبهوش عدم العقاب لما بيخطأ
محمد صلاح: على أساس أنوا الخطأ غير تقديرى
د/زاهى حواس : وأنا ما بحولش نيابة إدارية وتحقيق غير فى الأمور الجسيمة والخطأ الجسيم لكن اللى أنا بعمله دا صعب فى الأجهزة الأخرى لأنوا ل زال عندنا السلطة بتبقى فى إيد شخصا واحد ويرجعوله فى كل حاجة وأنا معاك يعنى علشان تنطور يبقى فيه تطوير فى سيستم النظام
محمد صلاح: دكتور زاهى بالشكل دا أنت مع الأصوات اللى بتنادى بخصصة الثقافة أو على الأقل جزء من الثقافة ييعنى مثلا ممكن ندى صيانة المتاحف أو تأمينها لشركات خاصة وإداراتها؟
د/ زاهى حواس : لأ إدارتها أنت لازم بقى يعنى زى ما أحنا بنعمل دلوقتى التأمين شركات خاصة الصيانة شركات خاصة النضافة شركات خاصة هى بقى الشركات الكبيرة العاملين أحنا دلوقتى يعنى أقولك بكل أمانة أحنا معندناش القيادات أللى على مستوى المتحفى اللى أنت بتقول عليها الناس بتطمن وتغمض عينيها وما بتقمش بواجبها متاحف مثيرة جدا لما قفلنا المتحف الرومانى فى الإسكندرية علشان نطوره لقينا تلته مش متسجل تلت الأثار اللى فيه مش متسجلة فبدأنا نسجل الأثار قعدنا سنتين المتحف المصرى لو أنت جيت للقطع دى لو نقلتها ووديتها المكان التانى مبيسجلوش ما بعرفش راحت فين ؟ حاجات ضايعة فى المتحف مش موجوده بدأنا نعمل قائمة بيانات بتسجيل كل الأثار يعنى أحنا بنحاول لكن أهم حاجة التدريب أهم حاجة علشان أنفذ لازم أبقى متعلم كويس أنت للأسف الشديد العنصر البشرى فى المتاحف المصرية كلها عنصر ضعيف جدا سواء الإدارة أو سواء الإعلام أو سواء الدعاية لأن المتحف عبارة عن مؤسسة تعليمية بتدخل فى عقل الناس كلها فلازم أنت تروح المدارس تعمل دعاية فى وسط الناس تعمل دعاية علشان نربط الفرد بالمجتمع عمليات جمعيات أسمها جمعيات أصدقاء المتحف المصرى الحقيقة إن فيه 3 متاحف ناجحين جدا أحنا كان نور الشريف كان رئيس الجمعية دلوقتى هو مشغول وأحنا دلوقتى بندور لكن تعال للمتحف القبطى والمتحف الإسلامى ومتحف محمد على عاملين جايبيين نجوم كل المجتمع فى مصر ورجال الأعمال ويبصوا أزاى يطوروا المتحف ؟ أزاى ياخدوا بقى مدير المتحف يعلموه فى سويسرا ويرجعوه تانى ؟ هما نفسهم بيقولوا أحنا منقدرش نترك الحكومة بس أو المجلس الأعلى للأثار بتعليم الناس لأ أحنا بقى علينا واجب عملوا حفلة بالملابس الرسمية فى المتحف القبطى حضرناه فريد منصور رئيس الجمعية وحاجة جميلة أنوا مسلم هو رئيس جمعية المتحف القبطى حاجة جميلة والفلوس اللى بيجمعوها كلها بيصرفوها على المتحف فأحنا بنعمل بقى إتفاق مع اليونسكو المفروض بينتهى بقلنا فيه بنشتغل بقلنا 3 سنين بنحاول نعمل نظام بنحاول نعمل تدريب شامل فى مصر بمساعدة الوزيرة فايزة أبو النجا من خلال إعتمادات أيضا إن أحنا نتوسع لتدريب وتعليم هذه الكوادر
محمد صلاح: يبقى فيه أمل يعنى فى العنصر البشرى ؟
د/ زاهى حواس : فيه أمل طبعا أنا عايز أقولك حاجة الأمل أنا وأنا فى الهرم مدير أثار الهرم قلت إن أنا فى يوم من الأيام أمسك الأثار فمسكت الأثار لحوالى 8 أشخاص بصراحة أنا بعتمد عليهم فى كل أعمالى إعتماد كبير جدا أنا مؤمن إن كل المشاكل دى مش هتنتهى بالكاميرات ومضش بتأمين المتاحف بالإهتمام بالعنصر البشرى
محمد صلاح: العنصر البشرى فى مصر يعنى بيدير المساءل بمنطق العزب يعنى مثلا أمناء العهد فى متحف محمود خليل 27 موجود منهم عمليا بيشتغلوا 16 منهم 4 بدون عهدة فطلعنا فطلعناهم من ال16 وواحد فى أجازة بدون مرتب 11 هما أصحاب العهدة الفعليين 3 منهم بقى كانوا واخدين راحة أسبوعية المنطقى دا فى الحكم على الوظيفة الحكومية والتعامل مع الوظيفة الحكومية لأن كلكم فى النهاية حكومة مش كده ؟ هل يجدى معه إعادة التأهيل والتدريب ما هو برضه بعد ما يدرب ويتأهل هيروح الصبح ياخد عارضة واللى بتولد أنت فاهم بقى الحاجات
د/ زاهى حواس : طب هتجيب منين ؟أنت دلوقتى لازم تبص للى عندك مفيش عندك أحسن من كده وبعدين نمرة 2 حارس الأمن أو موظف الأمن فى المتحف المصرى أنا رغم المتحف المصرى دا كله فى كاميرات للمراقبة لكن لازم أفراد أمن يكونوا موجودين عندنا أكتر من 250 واحد أنت عارف الواحد فيهم بياخد كام ؟ 300 جنيه
محمد صلاح: كام ؟
د/ زاهى حواس : 300 جنيه
محمد صلاح: فى الشهر ؟
د/زاهى حواس : أه والله طب دا يعمل أيه بقى ؟ الراجل دا يعمل أيه بقى ؟ بينتج عنه إن هو يخلص الوردية ويروح يشتغل فى حتة تانية ويجى ينام عندك النهاردة أنا قلت الكلام دا وقلت لازم نشوف طريقة أزاى نزودهم فى الإجتماعات اللى بتحصل وبأذن الله هنشوف إن أحنا نزود أحنا بدأنا نرفع عنهم كل العاملين فى المتاحف والمناطق الأثرية كان عندى 13 ألف واحد ال 13 ألف دول بحاجة أسمها أجر نظير عمل الأجر نظير عمل بل لا زال موظف عملناهم عقود علشان نقدر نربطه فى المكان ونقدر نحاسبه ونقدر نديله عهدة
محمد صلاح: مفيش تعيين عندك يعنى الوزارة ما بتعينش ؟
د/زاهى حواس : بالظبط كده أنت فهمت العملية الدولة ما بتعينش دلوقتى لكن أنت عندك حاجة أسمها دلوقتى العقد العقد دا الموظف بعقد بتقدر تحاسبه وتقدر تجازيه وتديله عهد أجر مقابل عمل ما تقدرش دا هو بيشتغل تديله أجر أحنا عملنالهم عقود علشان يبقوا تابعين لينا وفى نفس الوقت تعاقدنا علشان يبقوا ليهم تأمين صحى على مستوى كويس عملنا برنامج للصحة بحيث إن أنا أرمم الأنسان ودا المبدأ اللى أحنا شغالين فيه وشغالين فيه بكل أمانة
محمد صلاح: يعنى السنة اللى فاتت عملت معرض لى توت عنخ أمون فى أمريكا ولف كذا مدينة فى أمريكا وكان ليا الحظ إن أنا حضرت المعرض بره معاك يعنى أنا عايز بس شهادتك تقولى الفرق بين تأمين الأثار بره وهنا ؟ علشان أولا العرض كان بشكل والتأمين كان بشكل والحضور كمان كان بشكل برضه يعنى أحنا مش عارفين نصون الأثار هنا مش عارفين نصون مقتنياتنا طب حتى بنعرف نتفرج يعنى بنعرف نشوف ؟
د/زاهى حواس : يعنى أنا نفسى تجيب الكاميرا بتاعتك دى وتروح تشوف المتحف الأسلامى أنا بقولك على المتاحف اللى أتطورت فبعملها على النظام الحديث النظام الحديث عرض متحفى على مستوى عالى جدا إضاءة على مستوى عالى جدا العرض والجرافيك على مستوى عالى وبعد كده الدعاية للمتحف اللى بيقنصنى عن الأجانب اللى أنت شفتهم إن هما ناس عندهم ضمير وناس بياخدوا فلوس بتتكافأ أو بتتساوى مع الفلوس العنصر البشرى عندى بيختلف عنهم العنصر البشرى عندى مرتبه ضعيف جدا التانى مرتبه مرتفع العنصر البشرى عندى مش مدرب التانى مدرب دا بقى الإختلاف الوحيد اللى أنت شفته فقط
محمد صلاح: دا إختلاف كبير قوى
د/ زاهى حواس : إختلاف مهم جدا لأن العنصر البشرى هو اللى عليه هو اللى بيعمل كل هذا الحارس واقف فى مكانه ومالوش دعوة بالكاميرات هو عليه والأنسان هناك ملتزم السايح فى بلده لما بيزور أثار بيلتزم عندنا ما بيلتزمش لأن أنت بتساعده على عدم الإلتزام أنا أديت مرة موافقة فى المتحف المصرى زى كل السواح فى كل الدنيا يصور بالكاميرا من دون فلاشه جيت لقيت مفيش فايدة كل سايح داخل بيضرب فلاشة لأن المرشد اللى جنبه أو الحارس اللى جنبه مبيقلهوش لأ دخات المتحف لقيتها كله بالفلاشه منعت التصوير لأن أنا فى الأول مهمتى إن أنا أحافظ على الأثار
محمد صلاح: بتخسن أنت كده خليك معايا لسه الكلام مخلصش
فاصل
محمد صلاح: الدكتور زاهى حواس مركز قوى فى الحزء الأول من الحوار على مسألة العنصر البشرى وأنوا يعنى التقنيات يمكن توفيرها وتدريب الناس عليها المشكلة فيه العنصر البشرى دكتور زاهى معان مداخلة من الدكتور على حسن رئيس هيئة الأثار السابق بيتكلم حوالين الموضوع اللى بنتكلم فيه يعنى نشوف الدكتور على حسن بيقول أيه
د/ على حسن : مصلحة الأثار نشأت لأول مرة فى عصر محمد على عام 1853 وكان مجرد يعنى أهو مجموعة من الموظفين يعملون فى حمى الأجانب أو تحت إشراف الأجانب وكانت أول محاولة للتحكم إلى حد ما فى أثار مصر وهل نعلم إن أول رئيس لمصلحة الأثار عين سنة 1953 وأن رئيس الأثار كان فرنسى بحكم القانون يعنى أحنا متولناش الأثار والحفاظ عليها إلا بعد الثورة وفيه قانون بعض القوانين ظهرت من ضمنهم القانون اللى أصدره حزب الوفد سنة 1950 للحفاظ أو تنظيم عملية الأثار ولو أن فى كان تقسيم 50% من الأثار لنا و50% للمكتشف الأسوأ من هذا كانت هناك عملية بيع الأثار تستطيع أنك تخش محل تشترى كيلو جبنة وتشترليك تمثال وتخرج بيهم فى شنطتين شنطة فيها جبنة وشنطة فيها تمثال فكان الأجانب الكل بيشتروا والقانون بيسمحلك وتاخد فاتوىة صغيرة وتخرج بيها ودا خرج الألاف من القطع الأثرية ناهيك على أنه توجد عصابات لتهريب الأثار عصابة فى هولندا مافيا وفى أمريكا وفى اليابان وفيه فرنسا وفيه أنجلتر رغم أنوا العالم معاهدة أسمها معاهدة فينسيا فى عام 1970 تحرم إستقبال الدول أثار مسروقة وقع عليها العالم كله ما عدا هذه الدول لم توقع فرنسا على هذه الأتفاقية اللى هى منع تهريب الأثار ولا أنجلتر ولا ألمانيا ولا أمريكا ولا هولندا ولا اليابان ودى الدول اللى فى فيها الأثار وبصفة مستمرة ودا من الأسباب اللى خرج الألاف القطع الأثرية خارج مصر ناهيك على أن الحراسة الحراسة من أضعف ما يمكن والحراسة من زمان و لازالت من رجل كان زمان من أسرة وزير الأثار كان بيبقى من أسرة من أسرة كبيرة فالأسرة تحميه أنحدرت الأمور لما بقى أى حد دلوقتى يستطيه أنوا يقدم وعن طريق ما وواسطة ما ومجاملة ما يتعين يبقى غفير أثار ويبقى هو أحد المشتركين فى سرقة وتهريب الأثار بعضهم مش كلهم طبعا زائد أنوا بعض الأثريين الشبان متهمين وبعضهم فى السجوان دلوقتى بعملية تهريب الأثار وهروبها من مصر الشيىء بقى اللى لازم أقوله إن سرقة الأثار بدأت منذ قدماء المصريين نفسهم يعنى عدد الأثار الموجوده خارج مصر قد اللى موجود فى مصر فى متاحفنا 5 مرات أو 6 مرات أحنا كل اللى عندنا فى المتحف المصرى 170 ألف قطعة أثار متحف واحد فى نيويورك عنده نفس العدد يمكن أكتر منها شوية رحت المتحف البريطانى شف الألاف مؤلفة متحف بردين فى هولندا دا أنت لما بتروح مدارس صغيرة فى أمريكا عندهم مومياوات حتى المومياوات كانوا بياخدوها ومازالت عندهم حتى الأن نخش على المتحف أو المتاحف اللى موجوده فى مصر لابد من التأمين الكامل والتأمين الفنى ولازم يكون المرور مستمر وأن يكون التقنيات حديثة الأشعة فوق الحمراء الأشخاص قادرين على حماية هذه الأثار وإختيار الأشخاص مش علشان عندى مكان فاضى أحط واحد لازم أجيب واحد معاه تخصص أثار مجبش ستات قاعدين زى المتاحف اللى بيتسرق منها الخشاش وغيرها وقاعدين طول النهار أفتح وأقفل وخلاص والعسكرى يقولك أحنا قفلنا حطيت الشمع لكن مريت وشفت أيه اللى موجود وأيه أللى مش موجود أيه اللى أتسرق وأيه أللى مازال موجود لسه فى مكانه ؟ أحنا متاحفنا ومناطقنا الأثرية تحتاج بصفة مستمرة إلى الحراسة واليقظة دون يعنى كمية الا مبالاة اللى بتحصل هى اللى بلتشجع السرقة
محمد صلاح: لأول مرة أعرف أنوا الأثار كانت بتخرج زى الجبنة مبنعرفش أصلا نصدر جبنة أحنا طلعنا جبنة زى اللى قال عليها الدكتور على حسن ؟ وأول مرة أعرف إن الأثار اللى موجوده بره فى المتاحف اللى بره أكتر من الأثار اللى موجوده فى المتاحف اللى .. أيه رأيك يا دكتور ؟
د/زاهى حواس : لأ هو طبعا الدكتور على حسن هو بيتكلم يعنى بيقول بطريقة المبالغة وطلع فعلا أثار لكن مش أكتر من الأثار اللى موجوده لا فى متاحفنا ولا مخازنا فى أنا عايز أرد على الدكتور حسن طبعا الدكتور على حسن كان رئيس هيئة الأثار لمدة سنة وكان رئيس قطاع الأثار المصرية أنا لما أخدت المتاحف بتاعتنا دى بتكليف من السيد وزير الثقافة فاروق حسنى كانت الحالة سيئة جدا حالة لا يمكن أوصفهالك متاحف ما تتشفش ناس ما تدارش أحنا صرفنا بلايين وملايين الجنيهات فى تطوير هذه المتاحف وشغالين لسه فى أعمال االتطوير العنصر اللى الدكتور على بيتكلم عليه الغفير أبو نبوت كان موجود أحنا من 6 سنين كان مشكلة بالنسبالى زمان الغفير أبو نبوت ده يعنى كان فيه مثلا شيخ غفر أسمه الشيخ مجدى أبوه كان أبوه راجل يمشى كده محدش يقدر يقرب للأثار كده لما القوات المسلحة سرحت كل الشباب الصغير اللى بقى ياخد وظيفة الحارس معندهوش شخصية سرقة أثار مخازن تتفتح تتسرق أتسرق مخازن مهمة فى الأماكن فى مصر وكانوا يحفروا تحتيها وبتاع أحنا قلنا بقى لازم نغير وننضف عملنا بقى أيه ؟ عينا 8000 واحد مؤهل متوسط وعالى للعمل أسمه فرد أمن
محمد صلاح: معاه أيه بقى علشان يبقى فرد أمن؟
د/ زاهى حواس : لازم على الأقل دبلوم تجارة
محمد صلاح: ودبلوم التجارة ماله ومال الأمن؟
د/ زاهى حواس : ما هو أنا مش هجيب بتاع دبلوم الصنايع همسكه يقدم برنامج كلام مسئول دا أنا بديله وظيفة مسئول أمن وباخده أوديه الأمن القومى يتعمله برامج تدريب أزاى يحمل السلاح ؟ وأزاى يفهم الأثار دى معناها أيه ؟ وأزاى يعرفها ؟ والمؤهل العالى اللى بيقبل بياخد الوظيفة بقى عندى 8000 واحد ومرتباتهم بعد ما كان بياخد 50 ، 60 جنيه ترحولوا تقوله خد 200 جنيه وروح أتفرج على التلفزيون وتسرق الأثار على الأقل أحنا غيرنا سيستم النظام اللى موجود فى المجلس الأعلى للأثار أكتر من 200 سنة
محمد صلاح: دكتور على حسن برضه لمح للواسطه وحاجات كده
د/زاهى حواس : لأ مفيش واسطة أحنا عملنا إعلان فى كل حتة وبدأت الناس تجيلنا كل الناس عملنا عليهم تحريات فى الأمن القومى لما جت موافقة الأمن القومى بدأنا نعمل تدريبات دا عن طريق كل الأجهزة أحنا دلوقتى عندنا 8000 مندوب فرد أمن مستواهم يؤهلهم للحراسة وفى نفس الوقت عليهم مراقبة من مفتش الأثار وشرطة السياحة والأثار فالعملية بقت ممسوكة
محمد صلاح: دا بيقولك مفتشين أثار يعنى ناس أثريين برضه موجودين فى السجن
د/ زاهى حواس : ما أنا هقولك حاجة يعنى أنت سيادتك بتشتغل أيه يا أستاذ محمد ؟
محمد صلاح: يعنى صحخفى على قد حاله
د/زاهى حواس : هل كل الصحخفيين على المستوى ؟ لازم يكون فيه الوحش وفيه الكويس فيه أتنين أعتقد فى السجن من الأثريين يعنى عملية طبيعية جدا أنوا يكون من الاف الألاف اللى عندنا أكتر من 10 ، 15 ألف أثرى بيبقى فيه أتنين فى السجن وما تضمنش برضه يعنى إن يبقى فيه ناس موجوده لكن المهم إن الغالبية أمينة وشرفاء وبتعمل بأمانة وناس محترمة جدا وشباب تفرح بيهم لما تيجى تشوفهم
محمد صلاح: دكتور زاهى أنت عندك موقف من السياحة بقرالك كتير كلام أنوا السياحة العدو الأول للأثار وقلت كمان أنوا مثلا وادى الملوك والملكات هينقضى عليه فى ظرف من 150 سنة لى 500 سنة إذا
د/زاهى حواس : 100 سنة
محمد صلاح: 100 سنة يعنى نزلت بالمعدل دلوقتى
د/زاهى حواس : شوف هقولك لما أنا بقول المقولة اللى هى السياحة عدو الأثار هى مقولة أنا عايز أخوفك علشان تحافظ على الأثار أنت دلوقتى لما تيجى لمناطق الأثار الشكل الى هو تخلى سايح داخل المقبرة شايل شنطة ومعاه المرشد السياحى بيشرحله اللى جو المقبرة وبعض المرشدين بيحبوا يستعرضوا خدماتهم ممكن يقعد يتكلم ساعتين راحل مثقف ومتعلم الساعتين دول بالنفس اللى موجود والكاميرات والشنط ممكن تدمر النقوش والمناظر تماما
محمد صلاح: دا وفق نظريات علمية يعنى مش كده ؟
د/زاهى حواس : أه طبعا مش كلام أنا مرة أخد صورة فى معبد كوم أمبوا وجت تانى سنة أخدت الصورة وبعد 3 سنين أخدت الصورة ودايما لما بتكلم عن السياحة والأثار لأن أنا تخصصت عملت مقالات كثيرة جدا فى هذا الموضوع وفى أى مؤتمر سياحة عالمى بياخدونى أتكلم للدول أقولهم أيه الطريقة؟ نوفق بقى بين الأتنين بدال ما أنت عدوى وأنا عدوك طب ليه ؟ ما نبقى حبايب ما فيه طريقة إن أنت تحافظ على الأثار وةتخلى السياحة كمصدر دخل قومى
محمد صلاح: حكاية الصورة اللى أنت خدتها على مدار 3 سنين دى فيه فروق ؟
د/زاهى حواس : فرق طبعا لا يقل عن 30% تدهور فأحنا قلنا بقى أيه الحل يا جماعة ؟ الحل نمرة واحد متعملش أوتيل رخيص ومناطق الأثار متبقاش رخيصة أنا لما يجيلى فى منطقة الأقصر 5000 واحد فى يوم كتير ال5000 واحد لو دفع أوتيل أكتر ودفع مواصلات بدل ما تجيب واحد يقعد أسبوع يصرف 500 يورو ال5000 فى اليوم دول هيدفعوا قد ال15 ألف سايح وةفى نفس الوقت بعمل أيه بقى أقفل المقابر أرممها وأفتح مقابر تانية علشان تدار
محمد صلاح: يعنى بتريح بعض المقابر
د/زاهى حواس : نمرة أتنين بدل ما كل الناس بتزور وادى الملوك الصبح بدرى نعمل زيارات 3 مرات الصبح والضهر وبالليل وأحنا عرضنا على السيد الدكتور أحمد نظيف هذه الفكرة وهناك إتصال مع السيد وزير الداخلية فى سبيل إن أحنا نفتح هذه المناطق للزيارات ليلا هتخفف العبء نعمل بقى حد أمان للمناطق الأثرية مصر هى الدولة الوحيدة فى العالم أللى فيها مناطق أثرية بتدخل فيها بالعربيات قدام المعبد وقدام المقبة أزاى ؟ أى دولة تانية بتعمل حد أمان
محمد صلاح: طب أنت ما قاومتش الحكاية دى ليه ؟
د/زاهى حواس : ما هو أنا عايز أقولك بقى أحنا عملنا أيه ؟
محمد صلاح: السنة اللى فاتت قلتلك هنا فى نفس المكان أنوا أوباما لما كان ماشى وأنت ماشى جنبه فى الهرم كان الغسيل بتاع نتزلة السمان باين ورا مش كده
د/ زاهى حواس : ودا مسئوليتنا يا أستاذ محمد ؟
محمد صلاح: لأ المفروض أوا دى منطقة أنت بتشرف عليها والمفروض أنك تتعامل مع الأجهزة الأخرى
د/ زاهى حواس : الأجهزة الأخرى علشان أنا مقدرتش أتعامل معاها أضطرينا عملنا سور طوله 17 كيلو حوالين الهرم علشان أحميه بعد سنة بأذن الله كل مناطق الأثار اللى بتزار سياحيا بيتم عمل البرنامج اللى بقولك عليه ده أللى هو بيسموه إدارة المواقع السياحية أزاى أنت تحمى الموقع وتنطرله ككل ؟
محمد صلاح: ليه هو غزو جاى من بره مش المفروض يبقى فيه تعاون مع الأجهزة الأخرى مع المحافظين مع بتوع المحليات مع الحكومة الحكومة تحمى ثروة البلد؟
د/ زاهى حواس : فيه أجهزة بتتعاون وفيه ناس ما بتردش عليك خالص أقولك حاجة بص للطريق اللى موصل من شارع الهرم إى منطقة سقارة وأمشى وخد الكاميرا بتاعة كلام مسئول هو مسئول ولا معسول ؟
محمد صلاح: مسئول قوى
د/زاهى حواس : خد كلام مسئول وروح قابل الناس المسئولة شوف الطريق ده أولا جزء منه تبع محافظة وجزء منه تبع محافظة تانية ونمرلاة أتنين بقى بص الترعة تلاقى جاموسة مقتولة وتلاقى واحدة سايحة تقوم مطلعة الكامير ومصورة المنتظر ده تلاقى قامك بيوت من الطوب اللبنى البيوت دى لازم الناس دى نشوف لها أماكن ولازم الطريق ده ينضف أكوام الزبالة من سقارة على الترعة التانية اللى بيستعملها بعض السواح علشان يزوره أبو صير والله لم أرى مكان فى الدنيا أنا بقول يا جماعة الشوارع بتاعتنا فيها زبالة خلاص هنعمل ايه ؟ خلاص قدرنا لكن صورتنا قدام العالم وصورتنا دى لازم نحافظ عليها والمشكلة الكبيرة إن منطقة دهشور دى حكاية وإن أنا بدى 5% من دخل سقارة والهرم وميت رهينة للمحافظات دى علشان تنضف ما بينضفوش
محمد صلاح: طب الحل أيه نصور كله ولا أيه ؟
د/ زاهى حواس : هل أنا أسيب الأثار ونسيب ترميم الأثار؟ طب أنا هقولك حاجة روح القاهرة روح مثلا السيدة زينب والقاهرة القديمة كل جامع النهاردة كوم زبالة قدامه ولسه من أسبوع مسجد قدامه أكوام زبالة أحنا مش قادرين نشيلها عيل ولع ربنا ستر أنوا الراجل المسئول عن الأثار بعد الولعة لكن الولعة دى موجوده فى كل مكان نتيجة للزبالة ولأنها موجوده جنب مناطق الأثار ودى مشكلة مش قادرين عمل فيها حاجة
محمد صلاح: يعنى أيه المشكلة ؟ ألو دكتور وزير محافظ القاهرة فيه زبالة قدام مسجد الغورى
د/ زاهى حواس : هل الدكتور عبد العظيم وزير هو كمحافظ مش فيه رؤساء حى وفيه رؤساء للشوارع يعنى لازم دول يرعوا ضميرهم هل محافظ القاهرة هو بنفسه هيمشى فى كل مكان هو راجل محترم وبيعمل حاجات كويسة لكن العملية صعبة مش سهلة يا أستاذ محمد أحنا بنتحدث عن سمعة مصر وبعدين لما يجي واحد سايح أو واحدة يكلمنى ويقولى يعنى بلدكم دى بلد قذرة أقوله أيه ؟ بيقولى ما بتنضفوش الشوارع دى ليه ؟ طب هقولك حاجة خطيرة تانية عندنا كان فى أبوصير من حوالى 15 ، 20 سنة عملوا مقلب الزبالة جنب منطقة أبو صير يقوم طالع عاصفة رملية تقوم عاملك ورق على الهرم المدرج وورق على أبو صير وورق على أهرامات الجيزة تجيب شركة نظافة علشان تنضف مش نافع أنا بقول إن الهرم دا شيىء جميل وشيىء ربنا بيدهلنا وبيدنا منه رزق لكل الناس يعنى أنا بقول إن الناس اللى عايشين جنب منطقة الأثار المفروض الطبق الدهب ينضفوه هما مش بينضفوه لا الأهالى ولا المسئولين لازم أحنا نعرف قيمة المنطقة دية اللى بتجبلنا خير من غير ما أحنا بنعمل حاجة
محمد صلاح: فيه أمل يعنى ؟ يعنى عندنا موضوع سرقة دلوقتى والكلام دا ودخلنا فى موضوع الجمال أو إحساسنا بالجمال وإحساسنا بالثورة اللى عندنا العنصر البشرى زى ما أنت قلت يعنى فيه مشاكل وكده فى الأثار المفتوحة والأماكن المفتوحة دى مشاكل أكبر حلها أيه دلوقتى؟
د/زاهى حواس : طبعا مشاكل الأماكن المفتوحة بالنسبة للحراسة أيضا مؤمنة بس مؤمنة ما تقدرش تحرسها بالكاميرات مؤمنة بالعنصر البشرى العنصر البشرى زى ما قلتلتك بيتكون من حاجتين الحاجة الأولانية حراس الأمن والتانية شرطة السياحة والأثار النضافة بقى أحنا لما بنطور الموقع الأثرى بنعمل حمامات نضيفة بنعمل كافيتيريا نضيفة لكن المشكلة التانية بقى اللى بيوقف على الحمام ده مطلع عيننا
محمد صلاح: يا راجل
د/زاهى حواس : إذا ما خدتش الجنيه هيطلع عينيك عملنا مناقصة علشان نديها للشركات
محمد صلاح: شركات تدير الحمامات ؟
د/ زاهى حواس : أه مفيش حل غير كده طب هنضف الحمام أزاى ؟ اللى واقف ده لو أديته 1000 جنيه فى اليوم لازم يبقى ماسك الورقة فى أيده دى أنا طلعت قرار كان نفسى أجيبه لو أعرف إن أحنا هنتكلم عن الحمامات
محمد صلاح: أنت اللى جبت سيرة الحمامات
د/ زاهى حواس : قلت ممنوع واحد يقف جو الحمام كل واحد بينضف الحمام يقف برا ما يدخلش الحمام إلا إذا ما كنش فيه حد لقى فيه حد يطلع برا علشان حكاية ماسك بتاعة الكلينكس علشان يديهالك علشان ياخد الجنيه فقلنا نجيب شركات تاخد الجنيه وعملنا مناقصة وطرحنا ولا حد جالنا
محمد صلاح: محدش رضى يدير الحمامات وضع الحمامات أيه دلوقتى ؟
د/زاهى حواس : هنرطح تانى علشان حد يديرها لازم مفيش حل تانى أحنا بنعمل التواليتات بتاعتنا على أعلى مستوى فايف أستار لأن دا بيدخلها السايح بيجيلك وبيتكلم عليك بره يعنى دى سمعة البلد أنا بسيب حاجات فكرى والأثار اللى أتعلمتها وبشتغل فى الحمامات وبشتغل فى البتاع وفيه تدريب الناس
محمد صلاح: العنصر البشرى مهم من الأهرامات والأثار العظيمة القديمة للمتاحف والقصور لحد الحمامات وقال الأمين العام للمجلس الأعلى للأثار الدكتور زاهى حواس كلامه معانا النهاردة كان كلام جميل كلام معقول أكيد كان كلام مسئول وخلص الكلام سلام نلتقى فى الحلقة المقبلة .