اتكلم

لميس الحديدى:مساء الخيرحلقة النهاردة بتهم كل بيت فى مصركل مواطن مصرى يهموا ان هو يعيش فى بيئة غيرملوثة فى بيئة نظيفة مايشفش قمامة ومايشفش وساخة لكن للاسف وللاسف جدا بلدنا مش نضيفة الزبالة والقمامة فى كل الشوارع والميادين ولا تفرق بين ميدان عام وشارع صغير وزقاق وعشوائيات كلنا يعنى كما يقال فى فى الهم شرحه ،لما جت ازمة انفلونزا الخنازير وكان القرار بقتل هذه الخنازير اواعدامها يعنى سمى القرار كما شئت ، فى البعض بيقولوا ان الازمة ستتضاعف وهتزيد وهتبقى مشكلة اكترلان الخنازير دى كانت بتاكل جزء من القمامة ، الناس كانت عايشة جنب المنطقة دى تدوير القمامة وما الى ذلك ، دلوقتى الزبالين فى كتيرمن الزبالين قال لك لا خلاص بقى انتو قطعتوا اكل عيشنا احنا مش شغالين ، وحكاية القمامة فى بلدنا محيرة جدا يعنى كده شكلنا البلد الوحيدة اللى عندها القصة دايما احنا عندنا خصوصيه خصوصيه فى كل حاجة ، عندنا خصوصية فى التعليم عندنا خصوصية فى الديمقراطيه عندنا حتى خصوصية فى جمع القمامة ، قالولنا ايه انتوا مبتعرفوش هاتوا خبير اجنبى بعتلونا بقى يستوردولنا خبرا اجانب من بره ما احنا ما بنعرفش ننضف يعنى سيستم الزباليم مش نافع على مدى سنوات طويلة ، فجابولنا خبير اجنبى من سنة كده 2003 قرروا خصصة خبير اجنبى ، جم الخبرا الاجانب لقوا ان الموضوع برضه مش نافع ، ما هى العمارات مفيهاش اماكن لالقاء الزبالة موضوع الصناديق دى غالبا الناس سرقتها او عملت فيها حاجات استخدمتها فى اشياء اخرى اجوان ، يعنى احنا دايما عندنا خصوصية اشياء كثيرة جدا ، الغريبة بقى ان دول كثيرة تعتبر ان القمامة ثروة ، يعنى القمامة دى كنز طن القمامة دا تمنه حوالى 6000 جنيه ،ومصر بقى بتطلع ايه حدث بقى ولا حرج ، 20 الف مثلا طن قمامة فى كل يوم ، يعنى حاجة عظيمة جدا اكتر الدول استخراجا للقمامة ، فى الصين يعنى علشان اكون محددة دخل الفرد زاد من رقم لى رقم بس بسبب تدويرالقمامة ، لكن احنا نص قماماتنا فى الشوارع كاننا معتزين بيها عارفين كده بنعتزبحاجتنا نقولك لا خليها جنبنا نحب شوفها ايه نحب الزبالة نشوفها حوالينا ، ليه بلدنا مش نضيفة ؟ هل دا يعود لسلوكياتنا احنا؟ احنا ما بنعرفش نكون نضاف تلاقى الشقة متكلفة ملايين وبره الشقة الزبالة مرميه، هل نظام الزبالين ده بايظ ؟ يعنى ليه كل هذه الحكايات من الفشل، ليه بنفتح الموضوع دلوقتى؟ لان برضه موضوع اعدام الخنازير او قتل الخنازير فتح هذه القضية مره اخرى ، لان هذه الخنازير كانت تربى فى اماكن اقل ما يقال عنها انها يعنى هما بيقولوا عليه الزريبة هى فعلا كانت زريبة ، وكان فيه ناس كانت عايشة جنبها وميكروبات كان شىء صعب جدا الدولة فشلت على مدارسنوات طويلة فى ان تنقل هذه الاماكن او هذه الزرائب الى اماكن اخرى فى الصحراء ، هنعرف دلوقتى ليه ؟ اما مقاومة اما يعنى عادى الدولة طنشت لكن دلوقتى كان فيه قراران نقتل الخنازير ، جريدة المصرى اليوم انفردت بمشهد يعنى انا مش قادرة انساه من راسى ، مشهد اعدام الخنازير وهى حية وانا لااظن ان متخذى هذا القرار سواء يعنى فى الادارة المركزية او فى الحكومة المصرية او فى مجلس الشعب قالوا موتو الخنازير بالمنظرده ، مفيش حد طبعا لا اسلام ولا مسيحيه ولا يهوديه ولا اى دين فى الدنيا ممكن يقبل ان تقتل هذه الخنازير دى روح فى النهاية بمواد كيماوية وبحجر جيرى وتعدم بالشكل الوحشى واللانسانى فى دولة مسلمة متحضرة ،يعنى هنقول ايه للعالم؟ هنقول ايه لجمعيات حماية حقوق الحيوان ، هنقول ايه حتى لجمعيات حقوق الانسان هنقولها ايه ؟ هى دى الطريقة اللى بنفذ بيها القرارات وغالبا هى المحليات اللى قررت قالولنا اعدموا الخنازير نعدمها ومقالولناش نعدمها ازاى ؟ هما قالولنا موتوا خنازير فاحنا هنموتها شىء يعنى صعب جدا ، اتمنى ان يكون هناك تراجع عن الطريقة الوحشية التى تم بيها التخلص من الخنازير، قضية القمامة قضية مهمة جدا لانها بتمس حياتنا ممكن نموت الخنازير ويجلنا انفلونزا الطيورمن الزبالة دى على فكرة ، يعنى ما هو انفلونزا الخنازير دى ما بتجيش من الخنازير بيتناقلها الناس عن طريق الرزاز، هذه قضيتنا النهاردة لكن قبل ما اقدم لكم ضيوفنا الحقيقة عندنا خبر كده عايزة اشاركم فيه لان احنا بنعتبر نفسنا فى مصر اسرة واحدة اذا يعنى شكا منا احد طبيعى ان احنا نسال عليه ونقلوا الف سلامة ، مدام سوزان مبارك كانت المفروض تروح تستلم جايزة فى لندن جايزة مهمة جدا هى العضوية الشرفية المتميزة لجمعية الاطباء الملكيه البريطانيه ودى يمكن العضوية الشرفيه اللى بتقدم اول مرة لسيدة اولى وكان المفروض انها تروح تتسلم الجائزة لكن السيدة سوزان مبارك اعتذرت واصرت انها تفضل موجودة فى القاهرة علشان حفيدها محمد علاء مبارك عنده وعكة صحية ، ليه بنقول الخبر ده؟ علشان الريس دايما بيسال علينا الحقيقة احنا كاعلاميين وكسياسيين وكناس مثقفين عمر ما حد فينا عيى اللى لما الريس رفع سماعة التليفون وقالوا سلامتك ، ناس كتير تعرف الحكايه دى مش لازم نعلنها فى الجرايد مش لازم نقول عليها ، احنا برضه بنقوله الف حمد الله على السلامة يا ريس ان شاء الله كل اللى عندك يكون بخير احنا عيلة واحدة سواء فى السياسة اوبعيدعن السياسة احنا دايما عيلة واحدة ومصريين بيحبوا بعض وان شاء الله الف سلامة عليه ، فاصل ونرجع بعده .
فاصل
مشاهد من اماكن رمى الزبالة والخنازير
مواطن : الزبالة بتيجى بتبقى فيه ريحة تخلينى ارجع من الزبالة
مواطن: هيسبوها ما حضرتك مفيش خنازير بتاكل كانت الاول الزبالة دى بياخدوها علشان يودوها للخنازير ، يعنى يا كلوها الخنازيراللى هى الفضلات دلوقتى شالوا الخنازير هيودوها فين الزبالة ؟ هيعملوا بيها ايه ؟
لميس الحديدى: طبعا هذه المشاهد ممكن تخض ناس كتيرة لكن ناس كتيرة جدا بتشوفها طبيعيه وموجودة فى كل الاماكن فى مصر، هذه الحلقة يسعدنى ان يكون فيها السيدة النائبة سيادة جريس رئيسة جمعية حماية البيئة من التلوث مساء الخير يا فندم والمهندس امين خيال رئيس الادارة المركزية للمخالفات والنفايات الخطرة بوزارة البيئة ، واللواء صفوت امبابى مستشار الادارة البيئية والمتابعة الميدانيه بشركة اما العرب الايطاليه دا الخبير الاجنبى للبيئة يعنى دا الخبير الاجنبى اللى جابهولنا علشان ينضف شوارع مصر
صفوت امبابى : مصرى
لميس الحديدى: اه اجنبى مصرى ، خلينى ابتدى بسؤال اسالوا لثلاثتكم هل قراراعدام الخنازير هيؤدى لتفاقم مشكلة القمامة فى مصر ؟ يعنى هل مشكلة القمامة فى مصر مشكلة قائمة بذاتها موجودة كده ولا موضوع اعدام الخنازير ده هيؤدى لتفاقم المشكلة ؟
امين خيال : يعنى انا عايز اقول لحضرتك على حاجة علشان نعرف هل نرد على السؤال الاجابة العلمية للسؤال احنا نشوف قد ايه بيطلع من القاهرة الكبرى حتى علشان الخنازير دى كان مركزها فى القاهرة الكبرى
لميس الحديدى: الخنازير دى كانت بتاكل الزبالة مش كده؟
امين الخيال : اه طبعا القاهرة الكبرى بطلع يوميا 25 الف طن
لميس الحديدى: القاهرة الكبرى بس امال مصر كلها بطلع كام ؟
امين خيال : احنا بنطلع 52 الف طن يوميا
لميس الحديدى: دى متوسطات العالمية عالية واطية متوسطة ؟
امين خيال : لا متوسطة احنا بنصف حتى طبعا الزبالة بتصنف دخل الفرد تركيب الزبالة بتصنف دخل الفرد احنا بننصف فى العالم من الدول متوسطة الدخل الى المرتفعة الدخل ال52 الف طن دول بيطلعوا من مصر عندنا ال 25 الف كان اللى بيتم التعامل معاه مع مجموعة الخنازير اللى فى مصر تقريبا من 7 الى 8000 طرد منشية ناصر لوحدها كان بيروحها 4000 طرد
لميس الحديدى: دى اللى كانت بتاكلها الخنازير؟
امين خيال : لا مش بتاكلها لاتركيب القمامة ايه بقى ؟ مادة عضوية بتمثل تقريبا من 50 الى 60 % وازازوبلاستيك ومعادن حديد وكهنه وشوية مرفوضات كده بتمثل 50 % فال 50% لى 60 % اللى كانه بياكلوها الخنازير اولا الخنازير كانت بتاكل يعنى مش هنقولها زبالة بالمتعارف عليها لا جزء من مخلفات البيوت ولذلك كان جامعى القمامة كانه بيجمعوا من المنازل بالاضافة الى الفنادق اللى موجودة فى القاهرة
لميس الحديدى: المواد العضوية ؟
امين خيال : المواد العضوية فقط
لميس الحديدى: وبالتالى لما تختفى الخنازير هنعمل ايه فى المواد العضوية دى ؟
امين خيال: هقول لسعادتك احنا عندنا فى القاهرة الكبرى برضه 20 خط لتدوير القمامة والمخلفات مصنع لتدوير القمامة والمخلفات انشاتها الدولة هذه المصانع بتشتغل ب50 % من طاقتها ليه ؟ لان المخلفات العضوية دى ما كنتش بتوصل ليها وغالبية الاماكن ما كنتش بتوصل ليها
لميس الحديدى: علشان كانت هذه المواد بتروح للخنازير ؟
امين خيال: اه بتطلع مباشرة من الوحدات السكنية لزرايب الخنازيروالمرفوضات زى ما انتى حضرتك عارفة وكان موجود فى الصورة بيبقى الشكل العام سىء جدا الخنازير بتاكل اللى بتاكله ما بينضفوش تحتيها ويشيلوا المرفوضات اول باول
سيادة جريس : انا عايزة اقول حاجة
لميس الحديدى: اتفضلى
سيادة جريس: انا بعتقد طبعا حضرتك بتقول ان القمامة مش بتاكلها كلها الخنازير هى ما كنتش بتاكلها بتاكل الفضلات والفضلات اللى كانت بتاكلها كانت صالحة للاكل مهياش زبالة زبالة بالمعنى اللى احنا بنقوله ، وبعدين الجزئية التانية ان الخنزير كان منظومة من المخلفات دى لما كانت بتترمى للخنزير فكان بيتاخد الروس بتاعه وبعدين بيكسروا الزريبة وبعدين دا بيتحول الى سماد عضوى جيد جدا والنماذج دى موجودة فالنهاردة انا مع حضرتك ان احنا عندنا صورة طبعا مهياش هى مقبولة ان الخنزيريبقى عايش فى الكتلة السكنية مع ناس لكن برضه عايزة ارجع اوضح ان احنا كمصريين ارتباط الانسان بالحيوان بتاعه او المواطن الفلاح زى الجاموسة ا الطيورعايش جنب الحيوان بتاعه
لميس الحديدى: حضرتك عارضتى فى مجلس الشعب قتل الخنزيرليه ؟
سيادة جريس: طبعا انا كان اعتراضى ان انا لما ببص على الفئة المهمشة اللى هى كانت بتستنفع من الخنازير سواء تجارة او بتاكل لحم الخنزير انا جيت اخدت هذا القرار من غير ما ادرس ايه التوابع بتاعته الاقتصادية -الاجتماعية -الانسانية على هذه الفئة ، انا مع كل من طالب ان هما ننقل النشاط خارج الكتلة السكنية ودا فعلا احنا نادينا بيه وطالبنا بيه كمجتمع مدنى يعمل فى منشية ناصر على الاقل من11 سنة وفشلنا فى كل المجهودات كل ما تيجى تخصص الدولة بيطلع مشكلة لا دى تتطلع النهاردة محمية لا مش الناس رافضة
لميس الحديدى: لا برضه الناس رفضت يا سيادة النايبه الناس رفضت ان ينتقلوا لمناطق بعيدة وقالك لا احنا عايزين نعيش هنا ناس كتير وكان فيه التحام مع المحليات وما الى ذلك كان فيه محاولات للنقل لكن هما رفضوا
سيادة جريس: تسمحيلى اديلك فى نموذج عندنا احنا مطبقينوا كجمعيه اهليه انه جامعى القمامة عايشين فى المدينة بتاعة الوحدة الوطنية فى طره بيمارسوا نشاط الفرزوتدوير الزبالة فى القطامية ، يعنى احنا نجحنا ان احنا نقدرنفصلهم ودا نموذج ناجح جدا ودا اللى احنا كنا بنتمنى ان احنا نعممه
لميس الحديدى: دا نموذج واحد ، بشمهندس هل الاعدام كان الحل الوحيد ولاكان السبيل الاحوج للدولة اللى معرفتش انها تنقل كل التجمعات وكنا خايفين من موضوع انفلونزا الخنازير
امين خيال: انا عايزارجع بالذاكرة لسنتين بس فى حالة انفلونزا الطيورفى عندنا منظمة الصحة العالمية وانا عضو فى اللجنة العليا لانفلونزا الطيورلما جم حددوا فى البداية المرض اى مزرعة كان بيحصل فيها اصابه كان بتتعدم المزرعة وحواليها كيلو لوفي هناك مزارع ودى يعنى كان قرارمن اللجنة اللى هى منظمة الصحة العالمية انا مش عايز نبص لجزئية يعنى فيه ضحايا فى الموضوع فيه ضحايا نبحث عن الحلول نقل الخنازير احنا اختارنا المكان ليهم وهما موافقين عليه تماما والمكان بتنطبق عليه
لميس الحديدى: فين فين ؟
امين خيال :يعنى فى طريق الكرميات 11 كيلو ونص من الطريق الرئيسى داخل منطقة جبليه
لميس الحديدى: الكريمات دى فين بالظبط؟
امين خيال :هقول لساعدتك بالظبط فين
سيادة جريس : امام الصفط كده
امين خيال : لا لا لا بلاش المدن بس علشان بس الناس
لميس الحديدى: جنب حلوان دى ولا ايه ؟
امين خيال:لا لا لا مواصفات الموقع مواصفات الموقع الموقع بيبعد عن طريق الكريمات 11كيلوونص بيبعد عن مايو27 كيلو و7 من 10
لميس الحديدى: مايو هاتولنا مصطفى بكرى
امين خيال : لا كان معانا فى المكان ووافق
لميس الحديدى: هيقولكم لا ما هما كمان خايفين
امين الخيال : انا مش هنقل دى مزارع نموذجية جديدة مفيش دولة فى العالم بتربى الخنازيرعلى اللى موجود فى مصر واحنا من سنتين يعنى بصى ادى خطوط ارشادية معمولة
لميس الحديدى:بس دا خنزير غير اللى عندنا فى مصر دا بتاع العيال والله العظيم بصوا دا غير ده هاتولى صورة الخنزير اللى موجود فى مصر ارجوكم خلى الجمهور يشوفوا الخنزير اللى موجود فى مصر ارجوكم بص دا بتاع الكارتون دا غير اللى عندنا
امين الخيال : انا معاكى تماما فى اللى بتقوليه ايه السبب ايه السبب ؟ لان البيئة اللى هو فيها مش مريحة
لميس الحديدى: طب سؤال انت بقى بتقضى على كل السلاله انا جاية لحضرتك بقى هوهيفضل حاجة من السلالة دى ؟
امين خيال : لا هيفضل السلالة هتتحفظ ووزارة الزراعة متعهدة لذلك وزير الزراعة بنفسه متعه على الحفاظ على السلالة اللى موجودة
سيادة جريس: انا الحقيقة المطالبة كانت الحقيقة ان احنا على الاقل نحتفظ بى 1000 او 2000
لميس الحديدى: بص عامل ازاى ليه لونه مش بمبه
سياده جريس: بيستحمل البيئة بيستحمل الحر بيستحمل كل الظروف البيئيه الصعبة دى هى ورغم كده برضه السلالة دى مهمة جدا الحفاظ عليها لانها من ايام الفراعنة واحنا لازم نحافظ عليها والحفاظ عليها بصراحة مش انى انا احافظ بس على الجينس بتاعتها لا انا لازم على الاقل 1000 او 2000 راس وفى منطقة بعيدة جدا لغاية لما نتبدى نجهز الحظائر النموزجية للتربيه ونتعامل بقى مع الجزئية
لميس الحديدى: ليه انتوا واثقين كده ان الناس مربين هذه الخنازير سيقبلون الانتقال ؟
سيده جريس: لا راحو
لميس الحديدى: طب ما كان من الاول
سيادة جريس: اللى حصل بقى يعنى مش هنرجع لورا احنا نبص لقدام
امين خيال: من فترة طويلة واحنا بنحاول ننقلهم والناس ماكنش عندهم اى مانع
لميس الحديدى: رب ضارة نافعة يعنى
امين خيال: بالظبط رب ضارة نافعة
لميس الحديدى: اه بس فيه ناس كتيرة اتازت وانت عارف الحكاية دى
امين خيال : هقولك المشكلة مش مشكلة مصر بس دى كانت مشكلة عالمية ولو حصل هنا هتبقى مشكلة كبيرة
لميس الحديدى: انت كان رايك الاعدام ان الحل الوحيد؟
امين خيال لا انا مش راى ان الاعدام الحل الوحيد هو كان فى 100 طريقة لكن القرار اللى اتخذ انا اعتقد صواب نظرا لسلوكياتنا الموجودة، احنا سلوكياتنا فى التعامل سواء فى التعامل مع المخلفات سواء فى التعامل مع انفلونزا الطيور سواء فى التعامل مع اى مرض بيبقى فيها اخطاء كتير ، يعنى الوقايه او القرار اللى صدر ده
لميس الحديدى: لكن انت معايا ان الطريقة التى كشفت عنها جريدة المصرى اليوم قتل هذه الخنازير وهى حيه وعايشة والكلام ده كله طريقة نرفضها جميعا
امين خيال: طبعا مش عايزة كلام
سيادة جريس:انا امبارح فى مجلس الشعب اتكلمت فيها يعنى انفجرت بصراحة لما انا اتالمت للمنظر اللى انا بشوفه مش بس الطريقة اللى كانه بيتعاملوا بيها الجهات اللى كانت بتيجى تاخد الخنازير المحليات ويخبطو الخنزير على راسه بحديدة
لميس الحديدى: احنا هنجيب الطب البيطرى معانا على التليفون
جريس سيادة: فين الرفق بالحيوان ؟وبعدين ايه السرعه ان انا لازم اخلص كل القطيع
لميس الحديدى: ما هم خايفين برضه
جريس سيادة: خايفين من ايه ؟انا اسفة اقول لحضرتك ماهواش انفلونزا الخنازير اسمه اتش وان ان وان ما بقاش
لميس الحديدى: هوبيتحور داخل الخنازير لكن هو بينتقل من انسان لى انسان
جريس سيادة: يا فندم كل المعلومات الطبيه بتقطع ان قطعا الخنزير ليس مسئول ولا يمكن هيتحور واحد فى البليون ان يتحور فيروس جديد جوا الخنزير
لميس الحديدى: باشمهندس انتم كبيئة وافقتم وافقتوا ازاى على هذه الطريقة من القتل ؟
امين خيال: اولا مفيش قتل
لميس الحديدى: امال هو اللى انتوا بتعملوه دا ايه ؟
امين الخيال : مش احنا اولا دبح الخنزير الله هو كبير بعد الكشف الطبى عليه السليم يدبح والصغير كان فيه اعدام ليه ويدفن فى مدفن اما القتل او انه يدفن حى معتقدش ان فيه حد يوافق عليه
لميس الحديدى: انت دلوقتى حضرتك من جهاز البيئة من وزارة البيئة المفروض ان انتوا تكونوا عارفين يعنى مش ممكن تكون المحليات عملت ده وانتوا متعرفوش؟
امين خيال: الطب البيطرى المحليات ما بتدبحش كمان علشان تبقى حضرتك عارفة بتتم فى الطب البيطرى وعندنا مجزرين مجزر فيه البساتنين ومجزر فى
لميس الحديدى: ايوه مجازر قليلة جدا طب بمناسبة الطب البيطرى معايا الدكتور د/حامد سماحة مدير ادارة الخدمات البيطريه بوازرة الزراعة مساء الخير يا دكتور
د/حامد سماحة: مساء الخير يا استاذة لميس
لميس الحديدى: اهلا بيك يعنى اكيد المشاهد اللى حضرتك شفتها فى جريدة المصرى اليوم كان شىء مفظع ان تقتل الخنازير بهذه الطريقة حتى لو كان هناك قرار باعدامها يعنى شىء لا يمكن ان تقبله اى شريعه السماوية وعلى راسها الاسلام
د/حامد سماحة: بالظبط كده يا فندم اولا مفيش قرار بالاعدام للخنازير
لميس الحديدى: امال اللى حصل ايه يا فندم؟
د/حامد سماحة : هو قرار بذبح الخنازير والقرار ده اتخذ لاسباب معينة اعادة صناعة الخنازير بطريقة صحيحة
لميس الحديدى: طب ايه اللى حصل بقى ؟
د/حامد سماحة : اللى حصل ان الامور اللى احنا فيه دورى احنا بعتناها للسادة مديرين الطب البيطرى بالنسبة لطريقة الدبح السليمة المتعارف عليها بالوغز فى القلب وتطبيق الشروط الخاصة بعد عمليه الدبح اللى هى الوغزة دى وفيه قواعد لعملية الدفن السليم اللى هى يبقى فيه حفرة حفرة كبيرة حسب حجم الخنازير وحسب عدد الخنازير والحفرة دى تبقى مبطنه اوفيها جزء الجير الحى اسفل الجير الحى هنا وظيفته ان هو مطهر مش وظيفته مادة كاوية وبعدين هو مالوش قيمة لان الخنازير بتكون ادبحت بالوغز فى القلب
لميس الحديدى: يعنى انتى بتقولى ان الخنازير دى مماتتش حيه ؟يعنى قصدى لم تدفن حيه؟
د/حامد سماحة لا طبعا
لميس الحديدى: وهذه الصورة مفيهاش ان الخنازير دفنت حيه اذا كان الصحفى بيحكى القصة وبيقول ان هو شافها بعينيه؟
د/حامد سماحة: انا بقول لحضرتك على الشروط اللى احنا بعتناها للمديريات سيادتك
لميس الحديدى: يا دكتور الشروط دى جميلة الشروط موجودة فى الدنيا كلها فيه شروط للبيئة وللنظافة وللصحة ولكن هذه الشروط لم تطبق
د/حامد سماحة: حضرتك الامور دى خاصة بالمحليات والمجازر ديه تتبع المحليات انا لا يتبعنى مثل هذه الامور ولكن اذا كان هناك حوادث فرديه حصلت فى مثل هذا الامر مش موجودة فى كله
لميس الحديدى: لا ثوانى نقف هنا حضرتك يعنى مدير ادارة الطب البيطرى اكيد بتفتش اكيد بتكشف واذا اخطا شخص لازم تحاسبه عندما حدثت هذه الاخطاء حاسبت مين ؟
د/حامد سماحة : دا اللى حصل حضرتك دا حصل حضرتك
لميس الحديدى: وحاسبت مين ؟
د/حامد سماحة: حاسبنا اولا انا عايز اقول لسيادتك على حاجة احنا مسئولين عن الصحة الحيوانية مش عملية الدفن نفسه الدفن بيبقى البيئة مع المحليات احنا وظيفتنا نشوف الخنزير ده صحى ولا غير صحى
لميس الحديدى: ايوة مات خلاص احنا مش بنربيه احنا بنموت الخنزير
د/حامد سماحة: احنا ما موتناش حد ما موتناش خنازير احنا مقتلناش خنازير احنا دبحنا خنازير
لميس الحديدى: ايوه واللى بتدفنوهم عايشين دول اللى نزل صورهم على ..
د/حامد سماحة: حضرتك لو فيه حفرة موجودة وحطيتى خنزير فيها هل هيقف زى ما هو ؟الخنزير هيقف كده زى ما هو ؟ هيطلع ويجرى الخنزير, حيوى اكتف فى الحركة وما بيوقفش شفتيه حضرتك فى المقدمة بتاعة البرنامج بتاع حضرتك بيتحرك لا يمكن ولا يمكن حيوان بيندفن حى لا يمكن باى حال من الاحوال يحصل هذا الامر
لميس الحديدى: ايوه انا حضرتك اطلبولى مجدى الجلاد الله يخليكم يعنى جضرتك دلوقتى بتقولى ان هذه الصورة مش حقيقيه ؟ ولا حدثت اخطاء والاخطاء هنحاسب عليها من اخطا ؟
د/حامد سماحة : انا قلت لحضرتك فى اخطاء لكن اخطاء فرديه
لميس الحديدى: كام واحد اتقتلوا بالاخطاء الفرديه دول ؟
د/حامد سماحة: انا بقول لحضرتك الامور دى كلها وانا قلتلك على الطريقة اللى احنا بعتنهالهم يطبقوها
لميس الحديدى: جميلة الطريقة زى الفل انا مقلتش حاجة انا بتكلم على الاخطاء انا بتكلم على الخطا الخطا ده حاسبتوا عليه الناس؟
د/حامد سماحة: حضرتك ان لا املك انى انا احاسب اى حد فى اى محافظة انا رئيس الطب البيطرى انا استاذ جامعى وعميد كليه سابق لا اقدر لان كلهم تبع المحليات انا تبع وزير الزراعة هنا واحنا مركزية فبنحط الخطط وبنحط السياسات
لميس الحديدى: يعنى انت بتقولى ان ده تبع محافظ القاهرة؟
د/حامد سماحة: انا معرفش
لميس الحديدى: اطلبولى محافظ القاهرة على التليفون يعنى انت بتقول ان دا مش تبعكم خالص
د/حامد سماحة : لا انا بحط القواعد انا بقول لحضرتك احنا بندبح الخنزير ما بنموتش الخنزير ما بنقتلش الخنزير يا استاذة لميس
لميس الحديدى: يا استاذ يا دكتور انت بتحط القواعد ولا تتابع تنفيذ هذه القواعد
د/حامد سماحة: انا ليى مدير للطب البيطرى فى المحافظة هو اللى بيتابع مع السيد المحافظ
لميس الحديدى: طب ماشى خلاص اوكيه شكرا يا دكتور سماحة ماهو مفيش حد مسئول فى مصر يعنى الخلاصة انا هطلع فاصل علشان دمى فار هو مفيش حد مسئول فى مصر المحليات ملهاش علاقة وزارة الزراعة ملهاش علاقة الطب البيطرى ملهوش علاقة البيئة ملهاش علاقة كل ده ملهوش علاقة استنوا بقى لما تيجى هيئات حقوق الانسان الدولية تعد تنشر علينا حاجات لطيفة جدا وتقول ادى الدول المتحضرة وما الى ذلك وفى النهاية تفرقت دم الخنازير بين القبائل او بين المؤسسات فاصل ونرجع مرة تانية
فاصل
لميس الحديدى: اهلا بكم من جديد ليه بلدنا مش نضيفة ؟ ليه عندنا زبالة كتير؟ هذا هو السؤال الاساسى فى هذه الحلقة مين المسئول يا سيادة اللوا عن رفع القمامة فى مصر وانتم شركة يعنى انتم الشركة الاجنبيه اللى جابوهلنا يعنى قالك ايه دول اللى هينضفولنا البلد ؟
صفوت امبابى:الشركة كشركة اجنبيه والغرض من الاجنبى فيها اللى هى الاداراة الاستثمار الافكار الجديدة ولكن
لميس الحديدى: انا مشفتش الحقيقة ولا فكرة جديدة الشركات الاجنبيه اللى موجودة ماسكة ايه بالظبط ؟انهى مناطق؟
صفوت الجبالى : هى الشركة اللى انا بمثلها اسمها شركة اما العرب للبيئة ودى بتتولى العمل فى منطقتين داخل محافظة القاهرة المنطقة الغربية والمنطقة الشمالية
لميس الحديدى: يعنى قولى الاسامى كده احياء
صفوت الجبالى :الشمالية اللى هى بتشمل شبرا وروض الفرج والساحل والشرابية والزواية الحمرا بولاق
لميس الحديدى: دى مناطق نظيفة تماما
صفوت الجبالى : الشركة بتعمل فى هذه المنطقة من سنة 2003
لميس الحديدى: وبعدين النتيجة بقى ايه ؟زى ما احنا عارفين
صفوت الجبالى:انا هتكلم فى القضية دى من زواتين
لميس الحديدى: اتفضل بس سريعا
صفوت الجبالى : زائد انى انا مواطن يهمنى برضه مكان ما انا ساكن يبقى المكان بتاعى كويس ولو فيه ملاحظات ليا ببلغها للمسئولين عن المكان اللى انا ساكن فيه والزوايه الاخرى انى انا زاولت العمل فى الاتجاهين العكس بعض يعنى زاولت العمل كرئيس حى عابدين سابقا وحاليا انا بشتغل فى شركة البيئة
لميس الحديدى: طب عملتوا ايه كشركة ؟ خلينا اقولك بقى انتم كشركة عملتوا ايه بقى لتنظيف هذه الاحياء المهمة جدا فى مصر ؟
صفوت الجبالى: هنتكلم على المنطقة الشمالية اللى الشركة فيها بقالها اكترمن 5 سنين يعنى المنطقة الشمالية نقدر نقول المستوى فيها ارتفع عن السابق بكثير و الزواية الرئيسية فى النظافة هى منظومة الجمع السكنى
لميس الحديدى: انا بقى عايز مواطنيين من اللى هما شرفاء من اللى هما ساكنين فى شبرا روض الفرج الساحل دا الساحل دى بالذات كارثة انا عايزة ناس من المناطق دى يردوا عليا لانى انا مش ساكنة ولا بدعى انه بسكن فى هذه المناطق فمش هقول حاجات معرفهاش بس طبعا بنعدى عليها فبنعدى عليها بنشوف يعنى ثانية واحدة بس علشان معايا اتصال من مجدى الجلاد رئيس تحرير جريدة المصرى اليوم مساء الخير يا مجدى
مجدى الجلاد:مساء الخير يا استاذة لميس
لميس الحديدى: يعنى انا كان معايا سيجال مع الدكتور د/حامد سماحة اللى هو مديرة ادارة الخدمات البيطرية فى وزارة الزراعة ان هو بينفى تماما ان الصور دى حقيقية وبيقول يمكن يكون هناك كانت اخطاء فردية الصور اللى انتم نزلتوها عن دفن الخنازير وهى حية
مجدى جلاد : يا استاذة لميس حضرتك اعلاميه كبيرة وعايزة اقول لحضرتك على حاجة يعنى المصرى اليوم هيكون عندها القدرة انها تجيب عربيات خنازير وتجيب اجهزة تنفيذية وتجيب مادة الشبه والجير
لميس الحديدى: انتم ناس كبار يا مجدى اكيد ممكن تعرفوا تعملوا الحاجات دى كلها
مجدى الجلاد: يا استاذة لميس اللى حصل بالظبط ان المحررة والمصور طلعوا من الخصوص من مكان مزرعة الخنازير مع الحملة نفسها 3 ساعات لغايه ابو زعبل انا بستغرب جدا ان احنا بنتكلم عن حاجة ثابته الناس معترفين فيه الجورنال ومسجل والكليب محطوط على الموقع الالكترونى للجريدة تسجيل صوت وصورة بيقولوا احنا استخدمنا مادة كذا وكذا وجايبيين الصورالكليب كامل 4 دقايق ونص تقريبا يعنى هنالف منين يا جماعة فكرة النفى عايزين نرشد فكرة النفى والتكذيب فى المسائل دى يعنى احنا طب انا بطلب من اللى بينفى يرفع على قضية
لميس الحديدى: طب يا استاذ مجدى هل وصلكم من اى جهة من هذه الجهات المسئولة حد يقولك اننا اكتشفنا ذلك وعاقبنا فلان الفلانى؟
مجدى الجلاد: والله يا فندم انا هقول لحضرتك على حاجة جميلة جدا كل المسئولين اللى هما من محافظة القليوبيه اللى هو المستشار عدلى حسين لغاية المسئولين عن الحجر وغيره نفوا لكن الجهة الوحيدة اللى تعاملت مع الموضوع ده باحترام هى رئاسة الوزرا لان النهاردة طلعت تصريحات وبيان على لسان الدكتورمجدى راضى المتحدث الرسمى طالب المسئولين بعد نشر هذا الموضوع بالتعامل بدون وحشيه مع الخنازير والتخلص منها بطريقة نظيفة اذن فاحنا بنتكلم عن رئيس الوزراء بيطلع تعليمات للمسئولين هذا تعامل محترم بدال ما ننفى يا استاذة لميس لازم نقول ان احنا اخطانا وهنصلح واعتقد ان تصريح رئيس الوزرا دا اعتراف
لميس الحديدى: طبعا اكيد اكيد انا اعتقد ان انتم كان عندكم حملة مهمة جدا على النضافة وصلتم لفين فى الحملة دى هل حاسين بتعاون المجتمع المدنى معاكم؟
مجدى الجلاد: اقول لحضرتك وصلنا لى فين ايه احنا لغاية دلوقتى احنا لغاية دلوقتى شغالين فيها لكن هى المشكلة الاساسية ان بعض المسئولين عن الاحياء والمحافظين اعتقدوا ان دور جريدة المصرى اليوم فى حملة من اجل مصر نظيفة انها تبلغ عن الاماكن وهما ينضفوها ودا مش حقيقى المفروض ان احنا نقوم بالجهود ديه من غيرما الاعلام يقولهم يعنى انا مش كل يوم هقلهم مناطق الزبالة كلها انا بقلهم مكان واحد فبيروحوا بصراحة فى استجابة بيروحوا يشيلوا وفى بعض الاحياء فجرت مكان القمامة لكن انا راى يا استاذة لميس ان كل الكلام اللى بنسمعه ده كلام كله جزئى لان احنا بقت عندنا مسالة القمامة ونظافة المجتمع كاننا طالعين القمر انا راى ان مصر هتطلع القمر قبل ما تحل مشكلة القمامة
لميس الحديدى: الموضوع بالنسبة لنا صعب جدا
مجدى الجلاد: صعب جدا انتى عارفة ليه حضرتك؟ لسبب مهم جدا لان لا توجد فلسفة ولا فكر ولا منظومة للتعامل مع القمامة فى المجتمع المصرى احنا بنشيل من حته بنحط فى حتة يا استاذة لميس
لميس الحديدى: زى البيوت بنشيل من جوا البيت نحط بره البيت
مجدى الجلاد: عايز اقولك على حاجة كانت هذه المشكلة قاصرة منذ سنوات على بعض الاحياء الشعبية دلوقتى بقت موجودة فى المهندسين وفى المعادى
لميس الحديدى: صحيح صحيح انا بشكرك شكرا جزيلا استاذ مجدى الجلاد رئيس تحرير مصرى اليوم انا متعاطفة مع حماسه لان احنا كلنا بنتعرض لما بنهاجم مسئول او بنثبت شىء دايما ايه محصلش مفيش احنا بنتخيل خيالنا حاجات كده واسع ليه برضه ما نجحتوش انتى بتقول انكم نجحتوا نجاح جزئى تحسن مستوى النظافة
صفوت الجبالى: انا هتكلم باللغة الارقام احنا بنرفع يوميا من المنطقتين دول الغربية والشماليه 2600 طن قمامة يوميا وحوالى 1300 طن مخلفات مبانى او ردم او هدم يعنى يبقى كده احنا بنعدى حوالى 4000 طن يوميا يعنى لو حاجة من دى باتت فى الشارع يعنى تبقى كارثة تانى يوم دا بيترفع كل يوم
لميس الحديدى: عندكم صناديق زبالة فى الشوارع؟ انا عمرى ما عديت على المنطقة دى ولقيت صناديق
صفوت الجبالى: لا فيه يا فندم فيه نوعين من الصناديق فيه صناديق كبيرة اللى هى خاصة بالعربيه اللى بتلف اللى بتنزلها فى مكان معين وبتيجى العربيات تسحبها الونش وتروح تفضيها فى المدفن وبترجع تانى وفيه صناديق المتر ديه اللى احنا بنعانى من تحركها بواسطة المواطنين
امين الخيال: احنا عندنا مشكلتين فى ادارة المخلفات مشكلة التراكمات يعنى لو رحنا مناطق شعبية و خلافة هنلاقى التراكمات كتيرة ومشكلة التولد اليومى الموجود ما بيترفعش يوميا سواء فى الشركات الاجنبيه سواء فى هيئات النظافة انا هقولك ايه السبب وايه اللى بيتعمل فى الفترة اللى جايه مشكلة التولد اليومى اللى ما بيترفعش العقودات التى تم عملها بواسطة هيئات النظافة والمحليات مع الشركات الاجنبيه لم يتضمن العقد الكمية اللى بتتشال يوميا
لميس الحديدى: يعنى ايه الكمية اللى بتتشال يوميا ؟
سيادة جريس: يعنى مثلا فى شوارع معينة هو لازم يروح مثلا مرتين فى اليوم او مرة فى اليوم وبعدين فى حاجة اسمها رئيسى وفرعى فالشركة ما بتغطيش كل الكم
امين خيال: انا هكمل لحضرتك المعلومة بالكامل علشان بس الرؤية توضح وبعدين يبقى التعليق مباح يعنى كمية المخلفات زى ما قلنا ان العقد لم يتحدد فيه كمية التولد اليومى او الكميه اللى المطلوب ان الشركة ترفعها
لميس الحديدى: يعنى هو بيقولك تعالى كذا مرة؟
امين خيال : لا مش كذا مرة العقد بيقول بيقدم خدمات جمع ونقل المخلفات
لميس الحديدى:مين الل عمل العقود ؟
امين خيال :المحافظات مع الشركات
لميس الحديدى: وازاى المحافظات تقوم بهذه العقود بهذا الاخلال بالمضمون؟
امين خيال :الكلام ده اتصلح
لميس الحديدى: اتصلح يا سيادة اللوا؟
صفوت الجبالى: بيتصلح يعنى الشهر دا تعديل العقود
سيادة جريس : المشكلة الاساسية ان الزبال اللى هو كان فى الاصل بيلم الزبالة من المنازل النهارده بعد ما دخلت هذه الشركات همش من هذه العمليه لان ما كنش فى تعاقد مباشر معاه لان هو فى الاخر خالص هو اللى كان بينضف المدينة قبل ما تخش الشركات فاحنا عندنا نظام متوازى عندنا الزبال اللى بيجى البيت اللى هو المفروض بيعمل وبعدين فيه الشركات اللى هى المفروض بتيجى تشيل من الحوايات اللى هى بصراحة منظر من اقبح ما يمكن فى اى مدينة حضاريه ان يبقى فيها هذا المنظر فى الشوارع الرئيسيه فاحنا معندناش التنسيق اللى هو المفروض يكون موجود علشان خاطر ادخل الزبال فى هذه المنظومة بطريقة منظمة واوظفه لحسابه برضه لان هو بيؤدى خدمة بدون مقابل لهذ المدينة
لميس الحديدى:بس هو بياخد من الناس
سيادة جريس:بياخد كام بياخد 3 جنيه 5 جنيه هو دا فلوس يعنى انا النهارد علشان يشيلى الزبالة بتاعتى بديله 5 جنيه
لميس الحديدى: انا ها قولك انا بدفع كام دلوقتى
امين الخيال : بصى انا هقول لحضرتك على حاجة المفروض صاحب اى شقة ما يدفعشى للزبال ولا مليم
لميس الحديدى: انا بدفع للزبال وبدفع على فاتورة الكهربا ومش عارفة الفلوس دى اساسا رايحة فين ؟
امين خيال : دا خطا ولازم يتصلح الشركة متعاقدة مع المحافظة اوالهيئة على شيل القمامة
لميس الحديدى: منين من البيوت ولا من الشارع ؟
امين خيال: من البيوت تم تعديل العقد من البيوت
لميس الحديدى: امتى تم تعديل العقد؟
امين خيال :قريب قوى
صفوت الجبالى: اوضح انا بتكلم على نقطتين فى القاهرة القاهرة 4 مناطق انا بتكلم على منطقتين المنطقتين دول الجمع السكنى بيتم فيهم بنسبه عالية جدا
لميس الحديدى:يعنى انت كشركة بتمشى موظفينك ولا بتعتمد على الزبالين ؟
صفوت الجبالى:لا يا فندم انا بعتمد على الرئيسى بالنسبالى الزبال بتاع زمان اللى كان شغال فى البيوت
لميس الحديدى: انت متعاقد معاه ؟
صفوت الجبالى: انا متعاقد معاه انا بدفع 400 الف جنيه شهريا لمتعهدى القمامة
سيادة جريس: المتعهد غير الزبال
لميس الحديدى ايه الفرق بين المتعهد والزبال ؟
صفوت جبالى: المتعهد ده معاه مجموعة عمال يعنى المتعهد ده زى مقاول صغير معاه مجموعه عمال العمال دول اللى هما كانه زمان بيخشوا بيوتنا
لميس الحديدى: وبعدين النتيجة برضه هى هى الزبالة فى الشوارع
صفوت الجبالى: ما انا هقول لحضرتك بقى الجمع السكنى بقى بيتم من داخل البيوت وبيتم فى توقيتات معينة المفروض انه بيعدى الصبح فى توقيت معين يلاقى الكيس موجود بياخدوا يحطوا فى عربيته ويتحرك بيه الى الموقع اللى بيروح فيه اللى بيحصل ودى يعنى مش فى كل الاماكن ان بعض من المواطنين بيبتدى يخرج الكيس بتاعه بعد ما الولد يمشى هيوديه فين ؟ بيضطر يتخلص منه طبعا احنا بنشيله فى الفترة التانيه يعنى احنا بنشتغل على 3 فترات فى المنطقة الغربيه والشماليه
امين خيال: المشكلة مش فى جمع القمامة المشكلة فى العلاقة بين جامعى القمامة والشركة الشركة تعاقدت مع الهيئة العامة للنظافة والتجميل سواء فى القاهرة او اى مكان اخر
لميس الحديدى: انا مش عارفة بصراحة ايه لزمة الهيئة دى انا لا شايفة لا نظافة ولا تجميل وعلى فكرة احنا اتصلنا بالهيئة العامة للنظافة والتجميل فى محافظة القاهرة ومحافظة الجيزة ومحدش رضى كلهم عندهم اجتماعات معرفش بيجتمعوا ليه اذا كان لا نظافة ولا تجميل فى البلد كمل
امين خيال: فهى متعاقدة مع متعهدى جامعى القمامة مع الشركات الشركة اللى سيادة اللوا بيمثلها بتدفع للناس دى 400 الف جنيه شهريا علشان يجى البيت لحضرتك ياخد الكيس والمفروض حضرتك متدفعيش
لميس الحديدى: هو بقى بيدفع للزبال وانا بقى بدفع للاتنين بدفع للحكومة وبدفع للزبال
صفوت الجبالى: يا استاذة هقول لحضرتك بس المكان فين ؟
لميس الحديدى: مالكش دعوة المكان فين
صفوت الجبالى: اصل انا برضه بتكلم عن اماكن معينة انا ما بتكلمش على القاهرة كلها
لميس الحديدى: لا يعنى انا معنديش مشكلة شخصية انا بكلمك عن مشكلة الناس كلها
صفوت الجبالى: انا فاهم يا فندم بس انا بتكلم عن منطقة معينة انا بمثلها فيه مناطق اخرى
لميس الحديدى: فى المناطق المحددة اللى حضرتك بتمثلها الناس دى معندهاش اى مشكلة؟ ارجوكم انا عايزة اسمع ناس من شبرا من الساحل
صفوت الجبالى: ما هودا شىء طبيعى لازم يكون فيه شكوى وعندنا تليفونات شكاوى
لميس الحديدى: ليه نص زبالة مصر فى الشوارع ؟
امين خيال :انا عايزة اجوبك على السؤال ده نص زبالة مصر فى الشوارع او اكثر من النص فى الشوارع ليه ؟لان العقد بيشمل خدمات جمع المخلفات مرة واحدة يوميا فالعربية بتعدى شالت مرة لا هى لازم تعدى لان بتتعمل عليه غرامة فبتعدى شالت الصندوق موجود شالته ومشيت بعد ما بتعدى لو عدت الساعة 7 الصبح 9 الصبح وكنس الشارع مرة واحدة
لميس الحديدى: اه دا كنس لشارع ده مش هحكيلك عليه انتوا معاكم ايضا كنش الشارع ؟انا هحكيلك على كنس الشارع هما بيقفوا لا بسين اليونفورم شكله لطيف
صفوت الجبالى: لونه ايه يا فندم ؟
لميس الحديدى: اورانج اصفرحاجة كده
صفوت الجبالى:مش تبع القاهرة حتى يعنى ؟
لميس الحديدى: ايوه فا وانت معدى جنب العربية يلاقى ده قاعد على الرصيف اول ما تعدى فى الاشارة او كده فالزميل المواطن الصديق بيقوم بيبتدى بقى يسكن كده جنب ويحط هو الزبالة ويكومها جنبه كده وبعدين يوقف على اساس يعنى ممكن تديلوا حاجة مش عارفة ايه طبعا انا عارفة دولة غلابة وناس تعبانة وناس بياخدوا كام دول ما بياخدوا قليل جدا لكن فى النهاية موضوع كنس الشارع ده غير موجود انسى مفيش كنس شارع
صفوت الجبالى: انا بتكلم في امثله
لميس الحديدى: وانا بقى عايزة الاخ اللى من شبرا بقى طب اتفضلى يا دكتورة
سيادة جريس: انا بعترض احنا على سلوكياتنا احنا كمواطنين يعنى دى المشكلة الاساسية ان احنا معندناش وعى خالص بالنسبة لموضوع الزبالة ده اى واحد بيتهياله انه يرمى اى حاجة بره وفى وحد وراه مفيش الاحساس ان هناك اى مسئولية عن هذا المكان وسلوكياتى هى لازم تنعكس على المجتمع اللى انا عايشة فيه لاكل واحد فى بيته وتتطلعى بره البيت تلاقى ...
لميس الحديدى: يا سيادة النايبة معلش انا عايزة اقول لحضرتك حاجة لا توجد صناديق قمامة فى الشوارع انا ممكن لو ماشية فى وسط البلد وابنى ماشى معايا ارمى دى فين يا مامى؟ اقوله خليها فى جيبك يا ابنى لحد ما نلاقى صندوق زبالة نفضل ندور على صندوق زبالة عذاب بقى مفيش صنوق زبالة ويفضل الشىء منديل ولا حاجة فى جيبه لحد ما نلاقى صندوق زبالة او نرميها فى العربية بتاعتنا لا توجد صناديق زبالة موضوع بقى الحاجات العضويه والغير عضوية دا انسى مش موجود خالص الشوارع وسخة واكيد الناس تقولك ما الشوارع وسخة يعنى هو المنديل اللى انا هرميه هو دا اللى هيوسخ الشارع هاتولى شفيق من شبرا شفيق يا استاذ شفيق مساء الخير
شفيق: مساء النور يا فندم
لميس الحديدى: شبرا نضيفة ولا ايه ؟
شفيق: انا ساكن فى شارع ذو الفقار فى الساحل روض الفرج ختى بال سيادتك الكلام اللى سياد اللوا بيقولوا مشكورا يعنى اللى بياخدوا الزبالة من البيوت مفيش حد بياخد حاجة من الزبالة لدرجة رحت اشتكيت للسيد رئيس الحى وحولنى على شارع الورشه اللى هما فى الشركة اللى هى منفذه واخد بال سيادتك انا بجيب واحدة تشيلى الزبالة من البيت كله وكل شقة بتديها 10 جنيه زائد بندفع 5 جنيه على الفاتورة
لميس الحديدى: يعنى انتى بتجيب مساعدة زبال خصوصى ؟
شفيق: اه خصوى دا بيشيل للبيت خاتى بال سيادتك هما اتنين فى المنطقه ماسكين مربع فى حوالى اكتر من 2000 ولا 3000 شقة
لميس الحديدى: فى المنطقة اللى حضرتك مسئول عليها ممكن تاخد عنوانه بس علشان
شفيق: ما احترامى لسيادتك لو لقينا صندوق القمامة نحط فيه الزبالة ممكن لكن للاسف الشارع كله والحوارى كلها دكاكين منقدرش نرمى اى كيس فى الشارع علشان ممكن اى دكانه تتخانق معانا
لميس الحديدى: دا احسن كويس انك ما بتعرفش ترمى حاجة فى الشارع اشكرك يا شفيق انا قبل بس ما اتكلم عن موضوع ثروة الزبالة معايا الدكتورة سعاد الخولى مديرادارة الطب البيطرى بمحافظة القاهرة مساء الخير يا دكتورة
سعاد الخولى: مساء الخير يا استاذة
لميس الحديدى: اتفضلى
سعاد الخولى: انا معرفش والله انتوا طالبين المداخلة يعنى
لميس الحديدى: لا احنا طالبين سياد المحافظ الحقيقة بس يعنى
سعاد الخولى : انا برضه مدير مديرية الطب البيطرى فى محافظة القاهرة فانا امثل السيد المحافظ فى الوضع التنفيذى اللى انا بشغله وحضرتك انا كنت بس بتكلم على موضوع دبح الخنازير واللى بيتم فى مجزر البساتين فانا عايزة اسمع وجهة نظر سيادتك علشان ارد
لميس الحديدى: لا هى وجهة نظرى ان احنا لايمكن ان نقتل الخنازير وهى حيه يعنى لا يمكن ان ندفنها وهى حيه
سعاد الخولى: احنا بنقتل الخنازير ولكن التخلص منها وهى حيه دا امر غير مقبول و لايتم على الاطلاق
لميس الحديدى: مبتعملوش دا فى محافظة القاهرة؟
سعاد الخولى: بعد اذن حضرتك انا سؤالك وصلنى وهرد عليه انت حضرتك بتقولى ان احنا بنموت او مش بنموت او بندفن الخنازير وهى حيه حضرتك تقصدى ان احنا بنعدمها وهى حيه او بندفنها او بنحرقها وهى حيه
لميس الحديدى: لا لا لا بندفنها ونلقى عليها مواد كيماويه وهى حيه واكيد حضرتك قريت الموضوع ده
سعاد الخولى الكلام ده قريتوا فى احد الجرائد
لميس الحديدى: فى المصرى اليوم
سعاد الخولى: بعد اذن حضرتك ادينى وقت ارد انا قريت الكلام ده بيحصل فى احد المحافظات ولم اقرا عنه او اسمع عنه انه يتم داخل محافظة القاهرة ولكن انا مش هرد على بقيت المحافظات انا هحكى لسيادتك اللى بيتم فى محافظة القاهرة احنا عندنا فى محافظة القاهرة مجزر له طاقة وله مساحة واسعة وكفاءة عالية وعنده جميع الامكانيات والالات الذى يستطيع ان يحقق بها الاعدام والموت الرحيم لهذا الحيوان
لميس الحديدى: سؤال يا دكتورة انتى بتابعى عمليات الدبح بنفسك ؟
سعاد الخولى: انا بكلم حضرتك وانا موجودة داخل المجزر حتى هذه الساعة
لميس الحديدى: يعنى دكتور سماحة قاللى ان احنا بنصدر الاوامر وملناش دعوة الموضوع ما بيخصناش بقى
سعاد الخولى: لا هو الموضوع يخص الدكتورة سماحة طبعا لان هو رئيس الهيئة العامة للخدمات البيطريه وانا اعتقد ان الدكتور سماحة كان يقصد ان القائم على العمل داخل القوى المسئولة عن تنفيذ التعليمات وهو احنا احنا قائمين على العمل
لميس الحديدى: يعنى محافظة القاهرة معندكوش ده عندكم موضوع الدبح الرحيم
سعاد الخولى :استاذتى الفاضلة احنا مجزر البساتين الالى اكبر مجزر على مستوى الجمهورية وبه مساحة خصصة لدبح الخنازير ويتم فيه تنفيذ قوانين المجازر بالدبح او الاعدام وعندنا محرقتين كبار جدا فى بيتم الاعدام فيهم بعد القتل الرحيم وهو مش ذبح الخنزير ولكن خلينى اوضح نقطة معينة ان حيوان الخنزير لا يتم نحره مثل باقى الحيوانات التى مخصصة للذبح ولكن يتم توجيه غزة فى قلبه ودى الطريقة المتبع بيها فى الدبح العادى جدا فى الامورالعادية وهذه الغزة قد يعتقد بعض الاشخاص انه قتل غير رحيم ولكن هذا المتبع فى ذبح حيوان الخنزير انه لا يتم نحره شان باقى الحيوانات
لميس الحديد: لكن على الاقل موضوع الدفن وهم احياء ده ..
سعاد الخولى: محافظة القاهرة بتتبع قوانين المجازر داخل المجزر ويتم قتل الحيوان عن طريق الوغز فى القلب ثم حرقه بعد ذلك وهو نافق ومسلم الروح زى ما بيقولوا داخل المحارق او دفنه داخل المدافن الصحية الامنه بمعرفة الهيئة العامة للنضافة
لميس الحديدى: اشكرك دكتورة سعاد كده محافظة القاهرة بريئة واتمنى انكم تتابعوا برضه لان اخطاء البعض ممكن يعنى تقع فاتمنى انكم برضه تتابعوا
سيادة جريس: اسمحيلى برضه اكد ان فعلا الدكتورة سعاد الخولى كانت متعاونة جدا مع كل حتى التجار اللى هما مش لاقيين مجازر يدبحوا فيها فتم الاتفاق امبارح معاها على اساس ان هما يقدروا يجيبوا الخنازير مع السيد محافظ القاهرة فالسلوك بصراحة المعاملة على مستوى محافظة القاهرة تختلف تماما فلازم الواحد يقول الحقيقه
لميس الحديدى: ارجع تانى للقمامة
صفوت الجبالى انا عايز بس اقول التليفونات لاى مواطن يقدر يبلغنا اى شكوى التليفون الاول 2575
لميس الحديدى: يا ريت بس نحط التليفونات دى على الشاشة
صفوت الجبالى: 25759054 رقم تانى 25742016احنا بنتعامل مع 800 الف وحدة سكنية كون ان يبقى فيه شكوى دا شىء طبيعى
لميس الحديدى: انا ماقلتش ان فيه شكوى بس انا قلت دى الشكوى العامة انا دخلت مواطن بس انا لو فتحت التليفونات هيخشلى جيش من المواطنين
صفوت الجبالى: ما احنا عايزين نسمع الشكى علشان نتعامل معاها ال800 الف وحدة سكنية
لميس الحديدى: الشىء المثير بالنسبة لى اللى انا قريته ان هذه القمامة هى ثروة حقيقية انها بتتدر عائد لماذا لا نستخدم هذه الثروة على شكل اعادة التدوير ومصانع السماد العضوى وما الى ذلك؟
سياد جريس: اسمحيلى اقولك ان فى منشية ناصر فى نشاط لتدوير القمامة قائم وفيه نجاح كبير جدا فى هذا المجال وتم بالمجهودات عديدة جدا من ناحية الحكومة على مرحلتين انما الجزئية اللى هى ما تمتش اللى هى نقل الحظائر خارج الكتل السكنيه لكن هذا النسق قائم وفيه ناس بيتاجروا وعندهم مصانع لتدوير
لميس الحديدى: مش كفاية
سياد جريس: ما هو لازم نعمم ده فى اماكن اخرى لكن دا نموذج ناجح جدا
امين خيال:كلام حضرتك جميل جدا دا مقولة موجودة ومتداوله بس ثروة ازاى؟ لو انا صرفت عليها القمامة ليها تكلفة ادارة القمامة ليها تكلفة اادارة المتكاملة ليها تكلفة مش ان اجمع وارمى تحت البيت زى ما بيحصل لا ادارة القمامة بتشمل انى انا اجمع من الوحدة السكنية اشيل فى العربية ابدا ادور اخد الحاجات اللى انا عايزاها يتبقى عندى المرفوضات اوديها لمدافن الصحية الخليه 5 افدنة فى المدفن الصحى تتكلف 10 مليون جنيه علشان تعرفى اد ايه تكلفة ادارة المخلفات
لميس الحديدى: فيه مصانع صغيرة ممكن وجودها يسبب مشاكل ؟
امين خيال: المخلفات البلديه تدويرها لا يسبب اى مشاكل المخلفات البلديه اللى حضرتك بتقصديها غير مخلفات المستشفيات ودى مشاكلها كتيرة ودى المفروض يتم استيعابها يا اما بالحرق يا اما بالتعقيم ثم بعد ذلك تدفن حتى الرماد بتاع المحارق بيدفن فى حاجة اسمها ..
سياده جريس: هى مش لازم تتطلع اصلا من المستشفى
صفوت الجبالى : فى مصنع الشركه عندنا فى القطامية 980طن يوميا
لميس الحديدى بقالكم قد ايه؟
صفوت الجبالى:فى المنطقة الشمالية من 2003
لميس الحديدى: ماديت عقدكم قد ايه ؟
صفوت الجبالى: 15 سنة
لميس الحديدى: فى عقد 15 سنة فى عقد فى الدنيا 15 سنة ؟
صفوت الجبالى : استثمار
لميس الحديدى: استثمار ايه حضرتك احنا مش شايفين اى حاجة
صفوت الجبالى دا فيه اصول ومعدات وعربية
لميس الحديدى: معدة ايه يا فندم
صفوت الجبالى: يا فندم الحاويات والعربيات والناس اسطول كبير جدا احنا بنرفع 2300 طن يوميا
لميس الحديدى: محمد من الزتون اتفضل يا محمد
محمد: سلامو عليكم
لميس الحديدى: وعليكم السلام سريعا
محمد: اولا برحب بكل السادة المحترمين وعندى سؤال يعنى الناس دى موجودة فى مصر ولا فى بلد تانيه؟
لميس الحديدى: غالبا فى بلد تانيه ؟ شكرا يا محمد انجى اتفضلى يا انجى
انجى: مساء الخير
لميس الحديدى: مساء النور
انجى: مش هطول عليكم هتكلم علطول فى مشكلة دلوقتى هو بيتكلم على القطامية اللى هو بتاع القمامة المقلب العمومى اكبر مقلب تقريبا انا بروح كل يوم شغلى شغالة فى القطامية وساكنة فى المهندسين اوكيه بروح كل يوم انا عايزة اقول لحضرتك ان مفيش اى عربيه تبع البلديه او تبع القمامة او تبع اى حته فى المحافظة بتراعى معايير الامان وهى ماشيه انا ببقى واقفه على الطريق العربيه عريانة كل القمامة الحاوية بتفضى لغاية العربية ما بتوصل لحد المقلب
لميس الحديدى: انا حصلى كده انا كنت ماشيه برضه لقيت الزبالة كلها اترمت عليا من العربيه ميرسى يا انجى شكرا حسين اتفضل يا استاذ حسين حسن حسن سريع بقى
حسن :انا من مدينة التحرير سيادتك وجانبى 5 مدارس كل يوم الفراشين بالليل يطلعوا الزبالة ويولعوا فيها العربيه ما بتجيش سيادتك واقوله العربيه علشان السواق يجى لازم ياخد فلوس
لميس الحديدى: عادى شكرا يا حسن
امين الخيال: طبعا القانون بيمنع تمام حرق القمامة
لميس الحديدى: القانون والدكتورسماحة بيقولى الشروط طيب انا لازم انهى هذه الحلقة
سيادة جريس انا عندى بس مداخلة صغيرة
لميس الحديدى: سريعا
سيادة جريس: عايزين مشروع فصل القمامة من المنبع لان دا هو الحل لمشكلة التراكمات
لميس الحديدى:في امل فى بلد نظيفة ؟
سيادة جريس: اه طبعا بس هو ده اللى المفروض فعلا يتعمل
لميس الحديدى :انا مش عايزة ادفع فلوس على فاتورة الكهربا بصراحة
صفوت الجبالى: الاخت اللى اتصلت الحاوية اللى بتنقل القمامة دى حاوية مغلقة
لميس الحديدى : لا لا دا مغلقه دا عندكم لكن فى الشوارع الحاوية مكشوفة
صفوت الجبالى: دى عربيه مغلقة
لميس الحديدى: لا يا سياد اللوا انا هعمل حلقة تانية على موضوع القمامة دا
صفوت الجبالى: ودى الصور حضرتك للعربية ولكل حاجة
لميس الحديدى: والصور بس انا عايزة صور حقيقية اشكركم شكرا جزيلا واشكر ضيوفى هل فى امل ان احنا نبقى بلد نظيفة ؟نتمنى هنعمل حلقة تانية عن القمامة اشكركم وهذه لميس الحديدى تحييكم وتصبحوا على خير