حصاوي يختار الديكتاتور

“,”المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات.. مؤخرًا اختفى قبل انتخابات الرئاسة حتى وجده أحد الأصدقاء جالسًا في مقهى كالتائه“,”
الجار:أزيك يا حصاوي كنت فين المدة اللي فاتت؟
حصاوى:وهو أنا فاكر.. أهو أنا زي ما أنا.
الجار:وأنت مع مين دلوقت يا حصاوي؟
حصاوي:أنا معاك.. ولاّ عايزني أقوم من جنبك؟
الجار:قصدي مع مين يِمسِك رياسة الجمهورية.
حصاوي:هو الرئيس أتغير؟
الجار:طبعًا ولسه هيتغير تاني، أنت أكيد مش عايش في البلد دي.
حصاوي:تحب أسيبهالك وأهاجر بلد تانية؟
الجار:هاجر براحتك لكن هتهاجر فين؟
حصاوي:مش عارف بس كل البلاد العربية بعتبرها وطني الأكبر.
الجار:عظيم.. تحب تعيش فين؟
حصاوي:عندك سوريا مثلاً.. لأنها من قوى الرفض والممانعة.
الجار:فعلاً حكومتها ممانعة تسيب الحكم بقالها 40 سنة وبتحارب شعبها.
حصاوي:عادي.. ما أحنا عندنا مظاهرات وحوادث قتل وتفجيرات.
الجار:أنا شاكك فيك.. قل لي بصراحة كده “,”أنت مع العسكر“,”؟
حصاوي:أنا بحب أبقى في السليم، والعسكر أرحم من الحرامية.
الجار:ما فيش فايدة، وعيك السياسي ناقص.
حصاوي:قصدك تقول إن الحرامية بيكسبوا أكتر م العسكر؟
الجار:ما تلفش وتدور واعترف، أنت مع دولة عسكرية ولاّ مدنية ولاّ دينية؟
حصاوي:عايز الحق؟ أنا أفضل تكون مهلبية.
الجار:نعم؟ يعني إيه؟
حصاوي:يعني كلنا ناكل مهلبية.
الجار:أنت جعان يا حصاوي؟
حصاويلا إطلاقًا أنا بس اللي شكلي كده.
الجار:كلنا ممكن ناكل مهلبية.. المهم ما ننتخبش رئيس ديكتاتور زي مرسي.
حصاوي:مين مرسي دا؟
الجار:آه صحيح.. ما أنت كان مغمي عليك، نقول مش عايزين فرعون زي مبارك.
حصاوي:هو مبارك كان فرعون؟
الجار:طبعًا.
حصاوي:والله ما حد قالي، لو أعرف كده كنت رحت كل استفتاء وانتخبته.
الجار:نهارك أسود، أنت من الفلول؟
حصاوي:ولي الفخر، أنا لحم أكتافي من الفول والفلافل.
الجار:فلول يعني من زمرة الفرعون مبارك.
حصاوي:يا حلولي.. أَكِن مبارك بنى أهرام زي خوفو؟
الجار:لأ طبعًا.
حصاوي:ولاّ شق قناة زي قناة السويس.. ولاّ عمل صوامع يخزن فيها القمح.. ولاّ شجّع
العلم والطب والكيميا والفنون والموسيقى والأدب.. ولاّ نظم نهر النيل.. ولاّ ..
الجار“,”مقاطعًا“,”: حيلك.. أنت بتتكلم على مصر القديمة الفرعونية.
حصاوي:أنت اللي قلت مبارك كان فرعون.
الجار:قصدي زي الفراعنة في ديكتاتوريتهم.
حصاوي:وهي الديكتاتورية تعمل أول وأكبر وأهم حضارة في تاريخ البشر؟
الجار:إنسى تاريخنا القديم كله.. دا راح وانتهى، إحنا اولاد النهار دا.
حصاوي:ولمّا أنسى تاريخنا، أفتكر تاريخ مين؟
الجار:تاريخ الرئيس اللي نرشحه دلوقت، عندك البرادعي وعمرو موسى وأبوالفتوح وحمدين ومحمدين وعوضين، عندك حد أحسن من دول؟
حصاوي:بصراحة آه طبعًا.
الجار: مين هو؟
حصاوي:رمسيس التاني.
الجار:دا مات يا بني آدم، ثم احنا عايزين نحارب تاني؟
حصاوي:لأ.. بس أصل نفسي أغني من غير حد ما يمنعني.
“,”الجار يغشى عليه“,”