حصاوى ينتخب بشار

«حصاوى على المقهى مع جاره»
الجار.. رحت مظاهرات الجمعة فى التحرير يا حصاوى؟
حصاوى.. لا.. شفتها فيديو.
الجار.. قصدك شفتها فى التليفزيون.
حصاوى.. لا، فيديو.. أصل واحد أعرفه مسجلها عنده من زمان.
الجار.. أنا بتكلم عن مظاهرات أول إمبارح يا بنى آدم.
حصاوى.. أنا افتكرتهم بيعيدوا إذاعتها.. ومين اللى عملها المرة دى؟
الجار.. الإخوان والسلفيين.
حصاوى.. هما مش كانوا بطلوا مظاهرات بعد ما دخلوا مجلس الشعب؟
الجار.. أيوه.. بس لقوا نفسهم مظلومين.
حصاوى.. ياحول الله.إزاى؟
الجار.. أولا.. منعوهم يحطوا الدستور مع إن الأغلبية فى المجلس معاهم. ثانيا.. لما جم يرشحوا ناس منهم لرئاسة الجمهورية، منعوا اتنين منهم.
حصاوى.. مين اللى منعهم؟
الجار.. القضاة يا سيدى. وبحجج فارغة.. آل إيه واحد كان مسجون فى قضية وعفوا عنه.. والتانى قالوا والدته خدت جنسية أمريكية، مع إن المرشحين دول بالذات من المؤمنين.
حصاوى.. هو القضاة خرجوا عن الملة؟ دا تانى رئيس لجماعة الإخوان كان قاضى.
الجار.. أيوه لأنه مسلم. لكن المرة دى المجلس العسكرى هو اللى أثر على القضاة.
حصاوى.. هو مين اللى إدى العفو عن مرشح الإخوان؟
الجار.. المجلس العسكرى، بس آل إيه، خد عفو فى قضية واحدة.. شفت الظلم؟ عشان كده المرة دى المظاهرات كانت بتهتف ضد العسكر.
حصاوى.. الحمد الله. أنا خفت الإخوان يقتلوا حد من القضاة زى ما عملوا زمان وقتلوا قاضى حكم عليهم.
الجار.. القاضى دا كان يستاهل، لأنه ما كنش من الأخوان.
حصاوى.. كويس إنك نورتنى.. أكنهم لما قتلوا النقراشى رئيس الوزارة زمان برضه عشان ما كنش من الإخوان.
الجار.. طبعا.. ولو ما كانش ربنا سبحانه وتعالى معاهم، كان نجّاه.
حصاوى.. بس ربنا سبحانه وتعالى نجّا عبدالناصر لما حاولوا يقتلوه فى المنشية مع إنه إنضرب 8 رصاصات.
الجار.. بس عبدالناصر أساسا من الإخوان، ومع ذلك ربنا خلاه ينهزم فى 67.
حصاوى.. الحمد لله. لكن مش الإخوان كانوا بيهتفوا قبل كده الجيش والشعب إيد واحدة؟
الجار.. دول كانوا بيجاملوا الشبان اللى عاملين ثوريين وليبراليين والعياذ بالله.
حصاوى.. والشبان دول موقفهم إيه دلوقت؟
الجار.. المرة دى هما اللى مشيوا ورا الإخوان والسلفيين يهتفوا يسقط حكم العسكر.. يعنى عرفوا ربنا أخيرا.
حصاوى.. يعنى الشبان دول عايزين يرجّعوا مرشحين الإخوان والسلفيين؟
الجار.. أكيد.. لأن مالهمش مرشح ممكن يكسب الانتخابات.
حصاوى.. والإخوان يرتاحوا لما يرجّعوا المرشحين بتوعهم اللى القضاة استبعدوهم؟
الجار.. طبعا، بس دا مش كفاية.. لازم يستبعدوا أحمد شفيق وعمرو موسى لأنهم فلول.
حصاوى.. طب ما دام الإخوان والسلفيين بتوع ربنا، يبقى كفاية يرجعوا المرشحين بتوعهم وبدل الانتخابات يعملوا بينهم قرعة.
الجار.. والله فكرة، وربنا يجيب لنا اللى أحسن فيهم. ولو إنى بحب الشيخ حازم أبوإسماعيل.
حصاوى.. وأنا كمان لأن دقنه أطول كتير من دقن الشاطر.
الجار.. يعنى إنت تنتخبه ؟
حصاوى.. بص.. أنا أنتخب أى واحد مؤمن، بس ما يكونش ليبرالى ولا عسكرى. بشار الأسد مثلا.
الجار.. بس دا سورى مش مصرى.
حصاوى.. إحنا جمهوريتنا اسمها جمهورية مصر العربية.. يبقى أى واحد عربى ينفع يحكمها، وأهو بشار يمكن يبقى خالى شغل قريب. وما تنساش إننا لما كنا الجمهورية العربية المتحدة، رئيسنا عبدالناصر حكم مصر وسوريا واليمن سوا.
الجار.. أنت بتتكلم جد ولا سكران؟
حصاوى.. أعوذ بالله. أنا عمرى ما شربت إلا المخدرات.
«الجار يغشى عليه»