حصاوى فى العباسية

«حصاوى على المقهى مع جاره»
الجار: عن أذنك بقى يا حصاوى.
حصاوى: على فين؟
الجار: رايح العباسية، عندى اجتماع مهم وخطير.
حصاوى: أنهى حتة فى العباسية؟
الجار: وزارة الدفاع طبعا.
حصاوى: وإيه الشنطة اللى معاك دى؟
الجار: دى كمامة لزوم المعركة، عشان لما يرموا علينا الغاز المسيل للدموع.
حصاوى: يا خبر أبيض، إحنا هندخل الحرب؟
الجار: إنت مش عايش فى البلد دى يا حصاوى ؟
حصاوى: أعذرنى، بطلت أقرا جرايد أو أشوف تليفزيون، المهم إحنا جاهزين للمعركة من دلوقت؟
الجار: إحنا نسالم من يسالمنا ونعادى من يعادينا.
حصاوى: أكن إسرائيل بتتحرش بينا؟
الجار: هى بدأت فعلا، بتبنى جدار عازل بينا وبينهم وبتحشد كذا كتيبة على حدودنا.
حصاوى: أنا شايف معاك طوب كمان، هو إحنا هنحارب بالطوب؟
الجار: إحنا مع السلم، لكن لما يرمونا بالطوب مش هنقف ساكتين هنرمى عليهم طوب وحجارة ويمكن مولوتوف كمان.
حصاوى: وأنت سجلت اسمك فى كشف الفدائيين؟
الجار: افهم، أنا جت لى رسالة ع الفيس بوك نتجمع النهار ده.
حصاوى: طب ما فيش معاك سلاح غير الطوب؟
الجار: إرادة الشعب أقوى من أى سلاح.
حصاوى: أتارى بسمع أغانى وأناشيد فى الراديو، لكن قوللى هى وزارة الدفاع فيها معسكرات للفدائيين؟
الجار: افهم يا بنى آدم، إحنا رايحين نحتشد قدام الوزارة عشان نجبرهم يرحلوا.
حصاوى: هى إسرائيل احتلت وزارة الدفاع؟
الجار: لا، رايحين نجبر العسكر بتوع جيشنا يسيبوا السلطة.
حصاوى: بس البلد تمشى إزاى من غير سلطة؟
الجار: السلطة للشعب يا حصاوى.
حصاوى: الشعب كله هيمسك السلطة ويحكم؟
الجار: لا طبعا، لكن العسكر لازم يسلموا الحكم لسلطة مدنية.
حصاوى: قصدك الجنزورى رئيس الوزارة؟
الجار: لا طبعا.
حصاوى: فهمت يبقى رئيس المحكمة الدستورية العليا.
الجار: لا طبعا، إلا ده كمان.
حصاوى: أمال مين؟
الجار: أى حد، المهم يكون مدنى، إحنا فى ثورة يا حصاوى .
حصاوى: طب ما جمال عبدالناصر كان من العسكر وقام بثورة.
الجار: بس بعد كده قلع البدلة الميرى ولبس بدلة عادية هو وزمايله، وعشان كده الناصريين كلهم معانا.
حصاوى: طب وانتخابات رئاسة الجمهورية؟
الجار: لازم نحل اللجنة اللى أشرفت على الانتخابات.
حصاوى: بس دول قضاة مش عسكر.
الجار: بس العسكر هما اللى جابوهم.
حصاوى: على كده بقى نحل مجلس الشعب ومجلس الشورى.
الجار: إلا دى.
حصاوى: ليه بقى؟
الجار: لأن الانتخابات جابت الإخوان والسلفيين، ولو اتعادت الانتخابات تانى ممكن ما ينجحوش المرة دى.
حصاوى: طب وبقية التيارات السياسية مش هتزعل؟
الجار: بالعكس، أغلب التيارات دى معانا، حتى الليبراليين.
حصاوى: بس مش دول قلتوا عليهم كفرة؟
الجار: معلش، الضرورات تبيح المحظورات.
حصاوى: طب واتفقتوا مين المدنى اللى يستلم السلطة؟
الجار: لسه، لكن ممكن رئيس مجلس الشعب.
حصاوى: طب أفرض إسرائيل دخلت تحتل سينا؟
الجار: وقتها الرئيس المدنى يجبر المجلس العسكرى يحاربهم، ما حاربوش نحاصر وزارة الدفاع تانى.
حصاوى: رئيس مدنى زى مين؟
الجار: عندنا كتير، أولهم حازم أبوإسماعيل اللى استبعدوه من الترشيح، ولو أن الظواهرى نزل معانا ضد وزارة الدفاع.
حصاوى : مش الظواهرى ده رئيس تنظيم القاعدة اللى مستخبى؟
الجار: لأ اللى عندنا أخوه اللى خرج من السجن.
حصاوى: كده طمنتنى، أهو ده أحسن واحد يمسك البلد ويرهب الأعداء.
الجار: ليه؟
حصاوى: لأنه صاحب أكبر دقن فيهم.
«الجار يغشى عليه»