كيف تصبحين مزة في 10 خطوات؟!

«آه يا ريت البنات يعرفوا إزاى يبقوا مزز بدل التلوث البصرى اللي بنشوفه».. كلمة أجمع عليها كل البنات اللى قابلناهم طبعا محدش فينا يقدر ينكر إن الجمال نسبى ودى فى الأول وفى الآخر خلقة ربنا بس كمان ماينفعش ننكر إن مافيش بنت وحشة ولازم كل بنت تكون حلوة بأية طريقة، وشطارة البنت أنها تبين جمالها بس للأسف فى بنات كتير أوى مش بيعرفوا يعملوا ده وإحنا جينا النهارده عشان ندى tips صغيرة كده للبنات المحتاسة إزاى ممكن تكونى مزة بجد، وإزاى تبينى جمالك وتلفتى الأنظار.
قابلنا مجموعة بنات وساعدونا نحط الخطوات دى شاهندة حسام، منة زاهر، سارة شريف، ريم محمد، بسمة بدر، نيفين حسن، وضحى أشرف ادونا الخطوات وقالولنا إن البنت لو مهتمة فعلا تكون مزة لازم تمشى عالخطوات دي ماتلخبطهاش وماتجودش من عندها.
■ انزلي اشتري لبس لايق عليكي مش تشترى لبس عالموضة وخلاص عشان مش بتليق عالكل اللبس الحلو اللى لايق عليكى هيخليكي مزة أكتر من أية موضة.
■ لو إنتي مليانة ده مش عيب، العيب إنك تفكري إن اللبس الضيق بيبينك أرفع ده حضرتك بيخلى شكلك مقزز وبالذات لو انتي محجبة احترمي حجابك.
■ بمناسبة الحجاب بقا الخصلة اللي مضروبة أكسجين دي ومحروقة من السشوار عمرها ما هتثبتلنا إنك blonde ولا إن شعر حضرتك حرير خبيها تحت الحجاب إذا بليتم فاستتروا.
■ وانتي بتشتري ماكياج افتكري إن هدف الماكياج إنك تخفى الديفوهات وتبروزي جمال ملامحك يعني ده مش وسيلة عشان تحولي نفسك من بنت لأنثي خرتيت.
■ خلي بالك وانت بتحطي كريم الأساس ماينفعش يكون وشك إيمان العاصي وإيديك شيكابالا.
■ وشك مش دفتر تلوين، الألوان الكتير دي متعمليهاش فى وشك مراعاة لعيوننا.
■ خلي بالك إن في فرق بين ماكياج الليل وماكياج النهار وكل ما كنتي بسيطة كل ما كنتي مزة أكتر.
■ بيقولك لكل مقام مقال ماينفعش تروحي الجامعة بكعب عالٍ جدا أو بهدوم سهرة.
■ اهتمامك بضوافرك شيء أساسي يا تقصيهم خالص يا تحافظي على نضافتها.
■ ختاما أهم حاجة اهتمامك بنضافتك الشخصية عشان ماتبوظيش كل اللي فوق ده.