م الآخر| رجولتك مصدر الآمان عندها.. عززها

المرة اللي فاتت اتكلمنا عن اللبس والمكان والهدايا، وإزاي نختارهم سوا.. المرة دي هنتكلم بشكل مفصل أكتر عن السؤالين اللي بيتسألوا أوقات.. بالنسبة للولد: أوصلها ولا أسيبها تروح لوحدها؟ أمسك إيدها ولا بلاش؟.. وبالنسبة للبنت: أحط ماكياج ولا لأ؟.
مبدئيًا، في نقطة التوصيل، أي ولد بيوصل البنت اللي معاه عمومًا فما بالك لو بتحبها، وده لسبب يتلخص في ضمان الأمان أكتر ووصولها لبيتها من غير ما تتعرض لأي مضايقات، وكمان لأنك من اللحظة اللي صرحت فيها بإعحابك أو حبك.. إنت المفروض عليك تاخدها من البيت أو من مكان قريب منه وتوصلها للبيت، وتتأكد إنك لما بتوصلها بتزود ثقتها فيك وإحساسها بالأمان معاك.
وأعتقد بديهيًا لو أي ولد سأل نفسه، أوصلها ولا لأ؟ مش هيلحق يجاوب وهيلاقي نفسه تلقائيًا بيوصلها (محبة، على حرص، على خوف، على رجولة)، وده ميكس حلو.
بالنسبة لمسك الإيد، لو العلاقة لسه في مرحلة ما قبل الخطوبة، من الأفضل لأ، لأن لمسة الإيد مش مجرد إيد × إيد، ولكن إنت بتوصل لكيانها ومشاعرها من خلالها، وبيكون من حقك جدًا إنك توصلهم بعد الخطوبة، لأنها وقتها بتكون من نصيبك (كشئ رسمي).
وصدقوني فعلًا بقدر ما دي مشاعر كل اللي بيحبوا نفسهم يعيشوها، لكن لما تعيشها قبل الارتباط الرسمي بتكون مختلفة في الإحساس تمامًا عن بعد الارتباط، لأنك بتحس إنك بتاخد شئ مش ليك، وبتكون قلقان إن أي حد غريب يشوفك.. وأولًا وأخيرًا عشان الحلال والحرام.
لو انتقلنا لنقطة الماكياج بتاعك.. أي بنت بتحب تحط ماكياج، عشان إرهاق اليوم وعدم السهر والشغل ميظهرش بوضوح على وشها.. حطي ماكياج ينور وشك، لكن احرصي دايمًا إنه يكون رقيق ولطيف، عشان يبين ملامح وشك الأصلية، لأن فيما بعد لما هو هيجي يزورك في البيت، أكيد مش هيكون الماكياج بنفس قوة الشارع، فهتكون ملامحك الطبيعية هي اللي ظاهرة.
خليه دايمًا يشوفك على طبيعتك، علشان عينه تحفظ ملامحك أكتر وترتاح ليها في الوضع الأصلي، وصدقيني كل ما كانت حلاوة روحتك هي اللي باينة أكتر في تعاملاتك وكلامك، هتنعكس جدًا على ملامحك حتى لو مش بتحطي كحل.. دايمًا في كل خروجه ليكوا مع بعض، البسوا روح أول خروجه، هتحسوا بمرح أكتر، وتخيلوا إنكوا في قاعدة فضفضة، واتكلموا بكل اللي جواكِ بارتياح.. بس خلوا بالكوا إن في كلام ميتقالش في أول العلاقة.
وكما ن في بعض التصرفات ف الشارع لازم نخلي بالنا منها، بالنسبة للولد:
- وإنت ماشي في الشارع ما تمشيش بخطوة سريعة أوي عنها، علشان متتعبهاش في المشى فتضطر تقولك نركب أو عايزة أروح (تعبت).. استمتع بالمشي معاها.. كلما ركزت في كلامك وكلامها ريتم المشي هيهدى أكتر.
- وإنتوا بتعدوا الشارع، احرص دايمًا إنك تكون في الجهة اللي المرور جاي منها، بحيث تكون هي في آمان أكتر.
- لو وقفتوا اشتريتوا حاجه متوقفهاش جنبك، وقفها على مساحة، بحيث تكون قدام عينك، ومش لازم تشوفك وإنت بتحاسب.
- وإنتوا ماشيين على رجلكوا، خللي السؤال ده في بالك تحبي تشربي؟، لأن المشي بيعطش.
بالنسبة للبنت:
- دايمًا وإنتي بتكلميه بصيله.
- وإنتوا في الشارع متعليش صوتك أوي، خليه على قد سمعه هو.
- وهو بيتكلم عن نفسه أو عن أفعاله، خللي الكلام ده باستمرار على لسانك (حلو أوي.. هايل.. تمام.. فعلًا!)، اظهريله مدى أهمية الكلام اللي بيقوله عندك.