أخااااااه تحجب...فأنت لي مصدر فتنة..!!

الشباب بيلبسوا بينك واورانج واصفر وكت وحمالات ،والبنات بيلبسوا الوان قميئة وعبايات سودا وجلاليب مهلهلة وجيبات مجرجرة بتلم كل تراب الشارع.
الشباب بيحطوا بارفانات تدوخ ،والبنات لسة بيسألوا عن حرمانية مزيل العرق!!! ومنهم بيرضوا يمشوا في الشارع ريحتهم مؤذية حتى لأولادهم.
الشباب بيلبسوا باديهات بتبرز عضلاتهم وبنطلونات بتبين أجسامهم وتفاصيل رجولتهم ،والبنات بيلفوا المحلات عشان يلاقوا لبس يغطي أنوثتهم وبيلبسوا مقاسات كبيرة عن مقاساتهم الحقيقية عشان جسمهم مايبانش جماله.
الشاب لما يحلق شعره تماماً يبقا روش..ولمايطول شعره يبقا مز..ولما يخللي شعره عادي يبقاراجل، والبنت لماتقلع الحجاب تبقى مش محترمة..ولماتعمل شعرها كيرلي تبقى صايعة..ولماتعمل شعرها في الكوافير تبقى عاوزة تتعاكس..ولماتلم شعرها تبقا دكر.
في المصيف الراجل يلبس كل اللي نفسه فيه ،والست لازم تلبس نفس لبسها العادي حتى وهيا نازله الميه،والراجل يلبس اي مايوه يبقا تمام،والست حتى المايوه الشرعي يقولوا ده لازق على جسمها،ولو لبست مايوه عادي لاسمح الله تبقا بنت شمال ومش متربية وعاوزة قطم رقبتها.
وفي الآخر احنا اللي هنخش النار ...!!!!!!!!!!!!!!
الفكرة كلها ان البنت لازم تفصح عن انها انسان طبيعي ..عنده رغبة وميل للجنس الآخر..لان معلومة ان الرجال لايستطيعون السيطرة على شهواتهم اكذوبة كبرى..ومعلومة ان النساء اكثر تحكماً في الغرائز واكثر عفة هي عملية نصب ممنهجة،لان اللي عمل كده فينا إن الرجل بيعترف بغريزته ولاينكرها بل ويفتخر بها،لكن البنات تم غرز ثقافة العفة المزيفة في عقولهن لحد ما البنات نفسهم صدقوا الأكذوبة الكبرى واعتقدوا إنهم كائنات بلا مشاعر ولا غرائز .
هذا العنوان هو عنوان حدث أطلقه أحد أصدقائي على الفيس بوك والذي كان ضحية التطرف في يوم من الأيام،ولكنه استخدم عقله ورأى أن المرأة كائن حر يستحق الحياة بحرية وسلام،ولأننا نعاني من فرض القيود المجتمعيه على المرأة ووضعها دائماً في موضع اللوم ،فقررنا أن خير وسيلة للدفاع هي الهجوم،فانطلق الحدث ليحصد ردود الأفعال المختلفه والتي شهدت تبايناً جميلاً وحماساً رائعاً :
"الشاب اللي بيقول اه انا عايز البنات تتحرش بيا وتغتصبني وهكون مبسوط بكدا
طب هتحب التحرش لو مجموعه من البنات الصوماليات الافارقه مسكوك وربطوك وانهالوا عليك اغتصاب وتحرش ؟!
مهو مش شرط يا حبيبي اللي هتتحرش بيك تكون شبه هيفاء وهبي ونرمين الفقي"
"تفتكرو الحجاب هينفع مع بناطيل ضيقة الي بيلبسها شباب يومين دول"
"خليكى أنثي بجد وحجبي رجالتك بدل مانتى سايبهم للي رايح واللي جاي يتحرش بيهم"
"دوسي لايك لو بيعجبك الولد بالشكل دا وللولاد الي بتلبس خليع وفيها ايه اما تلبس كدا شيك وحشمه وساتر نفسك دوسي لايك لو شيفاهم احلي باللبس دا وشير يااختاه عشان ننصحهم بارك الله فيكي"
"هو ليه بقا البنات تفكيرها بنصها الى تحت ماباقش فى بنات خلاص. المفروض حتى لو الولد لابس ايه تغضى بصرك وماتتحرشيش بيه احنا مش حيوانات وانتى المفروض الى تحافظى عليه مش تتحرشى بيه وتحسسى بالخوف فى بلده وبعدين عشان تتأكدو انها مش باللبس فى ولاد بتبقى لابسه اللبس الشرعى وبنات بتتحرش بيهم انا زهقت" .
"علي فكرة معليش يعني .. انك تحط برفيوم ريحته حلوة قوي في وسط الشارع دي مش حرية شخصية .. دا استهبال يا اخوانا" ..
"لو هي حرية شخصية انك تحط برفيوم كتير .. هي باردوا حرية شخصية اننا اما نشم ريحتك في الشارع نتحرش بيك" ..
"احترم نفسك عشان ترجع بيتك سليم بدل متعد تعيط كل مرة بعد مبيتحرشوا بيك"
"#قصف_جبهة.. ازاي يعني تطلبوا مننا نتحجب.. دي حرية شخصية.. كفاية بقى مجتمع أنثوي بغيض عايز كل حاجة تعملها الست وبس.. وتيجوا عند الراجل وتسلبوا حريته.. عايزينا نختفي حلف الحجاب عشان إنتوا تعيشوا براحتكم وتعملوا اللي إنتوا عايزينه.. كفاية اضطهاد بقى ..
الراجل مننا بيبقى عايز يعيش حياته ويحلق شعره عند الحلاق .. مرة كابوريا ومرة الاجارسوه ومرة على جنب ومرة على ورا ومرة كاريه.. وبيبقى مبسوط من نظرات البنات ليه.. مش ذنبي ان فيه بنات خارجة من بيتها عشان تتحرش بالشباب وتقول ده حلو وده أمور وده شعره جميل وده عيونه حلوة.. ربوا بناتكم يغضوا بصرهم .. ربوا بناتكم ان الشاب ده ممكن يكون أخوكي .. انا عايز امشي في الشارع بأمان من غير ما ألاقي الف عين بتبص لي
بجد حرام عليكم يا بنات
وانا بدعو كل الشباب لمقاومة هذا المد الأنثوي اللي عايز يقمع حريتنا وبيتعامل معانا على اننا مصاصة وحتة لحمة وكل التشبيهات القميئة اللي بنسمعها وبنقراها على صفحاتهم
لا لتحجيب الرجل
غضُوا ابصاركن
انا هلبس براحتي"
اللي لفت انتباهي في معظم التعليقات ان البنات حبوا يخللوا الشباب يحسوا بنفس احساسهم لما بيتقالهم الكلام اللي من النوعية دي،لان البنات اتخنقت من ثقافة اللوم المستمر ده،الشباب كمان اللي تعدوا مرحلة قهر المرأة وأصبح عندهم وعي بحقوقها ابتدوا يحسوا بمعنى تقييد الحرية وإحساس أنك دائماً مراقب وتحت الميكروسكوب،وده مؤشر كويس جداً إن التغيير قادم وأن الثورة القادمة ستكون أخلاقية.
وفي النهاية أحب أوجه رسالة لكل رجل يعطي لنفسه الحق في كل شيئ ويحرم المرأة التي في حياته من كل شيئ ولايجعلها تستمتع بحياتها إلا من خلاله وهو يعطي لنفسه الحق في كل متعة بعيداً عنها:
أخي المز العايق..ماعنديش مشكلة خالص انك تكون مز وزي القمر وتخليني أعجب بيك وبوسامتك وشياكتك..لكن تيجي عندي وتنقح عليك الفضيلة وتقوللي اصل انا راااااجل..!!
ارد عليك بالفم المليان واقولك وأصل أنا ستتتتتتتت!!!!!!!!!!
قبل ماتعمل عنتر وتقوللي إيه ينفع وإيه ماينفعش،طبق قراراتك على نفسك ،وحس بالكبت والقهر اللي أنا بحس بيه من قراراتك الأنانية،أنا ما اتخلقتش عشان تتحكم فيا ،أنا اتخلقت عشان تخللي حياتك جميلة بوجودي، ولما تحاول تفرض عليا شيئ بالغصب إعرف إنك ضعيف ومهزوز ،ولما تعمل حاجة عشان خاطر تسعدني وتخليني مرتاحة إعرف إنك متسق مع نفسك وراقي.
حط نفسك مكاني في كل المواقف وحس بإحساسي عشان تقدّر معاناتي وتعرف إن الكبت يولد الإنفجار،فياريت ماتزعلش لما الإنفجار ده يحصل في وشك.....!!!!!!!