م الآخر| البنوتة الماريونت

كل بنت مننا عاشت في حياتها تجربة البنوتة الماريونت،اللي ليها ولي من الذكور بيتحكم في تفاصيل حياتها،يمكن مش كلنا عيشنا نفس التجارب،بس اكيد كل بنت مننا هتلاقي نفسها في سطر من السطور دي،
بنوتة كبرت لقت ليها اخ ولد،اكبر منها،بيتعامل من الاسرة معاملة ولي العهد،كل طلباته مجابة،البيت كله بيتسابق عشان يرضيه،وهيا كبنت لازم تتقبل ده بل وتتسابق معاهم في ارضائه،والا ممكن يتحكم في خروجاتها وتليفوناتها ونوعية لبسها واصدقائها،حتى لو كانت اعلى منه في التعليم او مميزة عنه فكريا،بس لانه ولد وهيا بنت!!!!!!!
بنوتة تانيه ليها اخ اصغر منها،جه الدنيا بعد انتظار وبكاء ودعاء،بيتعامل من الاسرة معاملة المطر اللي نزل عالصحرا،ده بقا حاجة تانية،محدش يقدر يزعله،محدش يقدر يضايقه،لانه ولد بعد بنات،واخته بقا لازم تستحمل دلعه ده،وتشيله وتهننه وتجرب معاه ازاي تبقا ام ،ولما يكبر ويحب يعمل عليها راجل لازم تسمع كلامه،اخوكي وعاوز مصلحتك!!!!
بنوتة كمان كبرت وجسمها فار قبل اوانه،باباها قرر يلبسها حجاب رغم انها لسه طفلة عشان جسمها ملفت وكمان عشان تتعود من صغرها،مش مهم انها لسه مش مكلفة،مش مهم انها لسه بتفرح لما تلعب في المراجيح،المهم انها بنت ولازم تدفع ضريبة جسمها منذ الطفولة ولحد ماتموت!!!!!!
بنوتة نجحت في الثانوية العامة وجابت مجموع يدخلها كلية احلامها،بس للاسف كلية احلامها في محافظة تانيه،وإنتي بنت،ماعندناش بنات تسافر لوحدها!! مدينه جامعية؟؟ بيت طالبات؟؟ انتي اتجننتي!! ماعندناش بنات تبات برة،وكمان قعاد البنات مع بعضها مش حلو،اختاري كلية من اللي جنبنا هنا واقصري الشر،كده كده آخرتك الجواز!!!
بنوتة باباها مات وهيا قاصر،عمها اوخالها بقا هوا ولي امرها،لازم يوافق على كليتها عشان يديها فلوس ابوها اللي هيا حقها تصرف بيها على تعليمها،لازم يوافق عالعريس اللي بتحبه واتقدملها عشان يجهزها ويديها جزء من فلوسها اللي هيا حقها،لازم تستحمله وتمشي امورها معاه عشان مايستوليش على حقها وحق امها واخواتها الصغيرين،رغم انه حقها،بس كسر حقك،انتي بنت،هتمشي بدماغك يعني،عشان ابوكي مات فاكرة ان ملكيش رجالة يشكموكي؟؟؟
ندخل بقا في مرحلة الجواز،بنوتة اتجوزت،جوزها خدها من بيت باباها وعملها بيت لوحدها،وانقذها من كلمة لسه ما اتجوزتش،بيتحكم في كل حاجة،لازم يكون موافق على كل حاجة بتعملها،لو لبس عجبها جدا ماتقدرش تجيبه لانها عارفه انه مش هيوافق يخرجها بيه،لو عاوزة تسافر مع صحباتها مش هتقدر لانه استحالة يخليها تسافر لوحدها،مع انه بيسافر لوحده ومع اصحابه عادي!!! لازم تستحمل اعجابه بالممثلات والمغنيات والبنات الحلوة لأنه راااجل!! كل الرجاله من حقهم يبصوا!! إنما هيا تعجب بممثل او مغني او تبص على واحد؟؟ ياللهول!! إنتي اتجننتي؟؟
الست مش زي الراجل
بنوته راحت فرح او مناسبه،جوزها قام وسابها قاعده عالترابيزه بالعيال وقام عاش حياته مع اصحابه رقص وضحك،راجل بقا من حقه يعمل اي حاجة،انتي المزيكا عاجباكي ونفسك تقومي تنطلقي زيه؟؟ اكيد انتي مش في وعيك؟؟ عاوزة الناس تقول عليكي ايه؟؟ يقولوا على جوزك ايه؟؟ مش عارف يحكمك!!
بنوتة عاوزة تشرب سجاير اوشيشة او تلبس قصير او تلبس مايوه اوتعمل اي حاجة هيا حاباها، قدامك حل من اتنين،اما انك تعملي ده في السر وتعيشي بالطول والعرض وماحدش يعرف عنك حاجة وتفضللي بتمثلي دور الست الكمل،او تقولي جوزي عارف وموافق،الكلمة دي سحرية جدا،فلانه بتشرب سجاير، اه عادي ماجوزها عارف،فلانه بتشرب سجاير من ورا جوزها،دي ست مش كويسة ابعدي عنها!!! فلانه دي بتلبس مايوه وجوزها موافق،خلاص براحتها، طب فلانه دي بتلبس مايوه من ورا جوزها،لاااا دي ست مش كويسه ماتكلميهاش تاني
بنوتة انفصلت بعد حياة مرة،افتكرت انها رجعت حرة،بس لأ ،لقت انها بتدفع ضريبة انها استغنت عن راجل،كل الناس حطوها تحت الميكروسكوب،اهلها بيتحكموا في كل تصرفاتها بس عشان ماتفتكرش انها هتعيش بمزاجها،كل راجل مريض فاكر انه هيوصلها بسهولة لانها لوحدها،ويفضل المجتمع يضغط عليها لحد ماتلاقي ان الحل الوحيد انها تتجوز تاني،حتى لو كان جواز والسلام....
وتفضل تلف الدايرة، وتتكرر التجارب،وتتظلم البنات،لحد ما الظلم ده بقا حقائق مؤكده،البنت نفسها مقتنعة بيها وساعات كمان بتدافع عنها،البنت انسان،مش لازم تدفع ضريبة انها بنت،من حقها تعيش زي ماهيا حابة،من حقها تغلط وتعرف ازاي ماتكررش غلطها،
لو عاوزين البنت عروسة جميلة،مش لازم تبقا عروسة ماريونت متكتفه بخيط مربوط في صوابع راجل،خلوها عروسة جميلة بتتكلم وتضحك وتتزوق وتلبس،عشان تكون سبب للفرحة مش اداة للفرحة.