(افتح قلبك مع د. هبه يس)....أخونه ده ولا أعمل فيه ايه؟

أرسلت (هاء. م) الى افتح قلبك تقول:
اتجوزت جوزى بعد قصة حب طويلة فضل يجرى ورايا كتير، لكن من أول يوم فى جوازنا، ويمكن من قبلها كمان وهو حاطط فى دماغه فكرة واحدة، وهى إن الجواز ده شئ ممل و(خنيق)، وإنه لازم الحب يموت فى النهاية، الفكرة دى جات له من أصحابه ومن تجاربهم المتعددة فى الحب والجواز، حاولت معاه كتير، وقلت له مالناش دعوة بالناس ، وخلينا ناخد خبرتنا من تجربتنا ومن حياتنا إحنا، لكن مفيش فايدة، بدأ حياته معايا وكأنها لازم هاتنتهى فى يوم من الأيام.
والحقيقة هو ماستناش كتير عشان يبدأ فى النهاية دى، فحصل إنه ساب شغله بعد فترة قليلة من جوازنا وأصبح متفرغ لقهرى وحرق دمى وخيانتى ليل ونهار، فالكلام على النت مع البنات ده شىء أساسى فى حياته، واللى أحيانا بيتطور إلى حاجات ما ينفعش ناس محترمة تكلم فيها، طبعا أنا إللى باصرف على البيت من فترة، وعليه هو شخصيا، واللى غايظنى إنه حتى ما بيتكسفش وهو بيطلب منى فلوس، أصبح بيتعامل معايا كأنى ماكينة الفلوس إللى فى البيت، وكل ما أزهق أو أتعب من الوضع ده يتعصب ويغضب ويسب فيا وفى أهلى، وفى الآخر يغضب ويسيب البيت.
بعد فترة اكتشفت إنه ب(يتلكك) عشان يسيب البيت، لأنه بيهرب من علاقتنا كزوجين، كنوع من أنواع العقاب ليا، وللسبب الأفظع والأمر، وهو إنه وللأسف الشديد بيستمتع بالعادة السرية لوحده زى المراهقين.
أنا عندى منه طفلة، وحامل تانى، عشان كده مش قادرة غير إنى أصبر عليه وأستحمل سخافاته ونزواته التى لا تنتهى، ورده الوحيد كل أما أواجهه بخيانته ليا هو (عادى...كل الرجاله بتعمل كده)، وأحيانا يحسسنى إنى لازم (أبوس ايدى وش وضهر) لأن علاقاته بالبنات دى على النت بس ومش على أرض الواقع زى ناس تانيه كتير.بجد قرفت، من اعتماده المادى عليا، ومن عدم تحمله للمسئولية، ومن القذارة إللى هو فيها، وفوق كل ده خناقاته وسبه وعفوا يعنى (بجاحته) فى الاعتراف بكل إللى بيعمله وتبريره له بأنه عاااااااااااادى!!.
ساعات كتير باعيط من القهر، لأنى عارفة ومتأكدة إنه بيتكلم مع أى واحدة تانية (رخيصة) أحسن ما بيكلمنى، وبيعاملها بأسلوب ما أحلمش إنه يعاملنى بيه، مع إنى محترمة وشيك ومركزى مرموق جدا. ومن فترة خطرت فى بالى فكرة، وهى إنى أردله الطاق طاقين، أدوقه من نفس الكاس إللى بيشربنى منه، وأخونه أنا كمان، عشان يحس بالنار إللى بتكوينى ليل ونهار، حاسة إن هو ده الحل الوحيد مع بنى آدم زى ده...غلبت معاه وتعبت من محاولات التقرب إليه وإرضاؤه، ومش فاضل لى غير الحل ده.
وإلى (هاء) أقول:
أولا كان الله فى عونك، لأن إللى بتحكى عليه ده ابتلاء شديد، وشدته فى إن إصلاحه مش فى إيدك، يعنى جوزك ده وإللى زيه مش ممكن يتغير أو ينصلح حاله إلا إذا كان هو عايز كده، مش عشان مراته أو ولاده أو عشان خاطر أى حد، وبالتالى إنتى دلوقتى بين خيارين، إما تستحملى الوضع ده الى أن يغير الله من الأحوال، ده أن حصل وقدر الله له الصلاح، أو إنك تنفصلى بكرامة وتحتسبى كل الأيام إللى فاتت من عمرك دى.
محدش هايقدر يقولك انفصلى أو لأ، لأن ده متوقف على قدرتك إنتى على الاحتمال، وعلى قابليتك للاستمرار، وعلى رؤيتك للأمور، فهل إنتى شايفة إن تربية ولادك هاتكون أفضل فى وجود جوزك ولا لأ؟، وهل إنتى هاتقدرى تعيشى من غيره ولا لأ؟، وهل هاتقدرى تستحملى أعباء ومشاكل الطلاق ولا لأ؟، كل الأسئلة دى لازم إنتى إللى تجاوبى عليها وبأمانة، عشان تاخدى قرار ما تندميش عليه.
أما الفكرة (العبقرية) إللى جات لك دى _طبعا هى لا عبقرية ولاحاجة دى مصيبة_ فسيبك منها خاااااااالص، لأنك كده وبمنتهى البساطة بتهينى نفسك إنتى، وبتحطى من قدرك إنتى، وبتنتقمى من نفسك إنتى، وبتنزلى نفسك لمستواه إللى إنتى نفسك مش راضية عنه.
وبعدين تفتكرى حاجة زى دى _خيانة جوزك_ ما ترضيش ربنا، ممكن ربنا يبارك فيها ويجعل فيها الحل والشفا؟....مستحيل، أرجوكى شيلى الفكرة دى من دماغك خالص، صحيح الموضوع ده ممكن يوجع جوزك ويحرقه بالنار إللى إنتى حاسة بيها، لكن هايوجعك إنتى أكتر، وهايفضل وصمة عار على جبينك طول عمرك، وهايحط من قدرك أمام نفسك وأمام أهلك إللى ممكن تلجأى لهم فى يوم من الأيام لمواجهة جوزك ومشاكله، بل والأكتر من كده إن خيانتك له هاتكون ذريعة له فى المستقبل إنه يخونك أكتر، ويزودها أكتر، وأكيد أكيد هايمسكهالك ذلة طول العمر بعد كده لو قررتى الاستمرار معاه.
عشان كده باقولك يا بنت الناس، أرجوكى حافظى على كونك بنت ناس، ومحترمة ومركزك مرموق زى ما بتقولى، ولو مش قادرة على العيشة دى يبقى الانفصال أهون واكرم، والله الغنى عن دى جوازه هاتخليكى ترتكبى معاصى وبلاوى بسببها، وياريتك هاترتاحى بعدها، ده أكيد الموضوع ده هايتعبك طول الوقت وهاتزودى على همك هم.
من الصعب جدا إنى أنصح حد بالانفصال والطلاق، لكن لازم ماننساش إن ربنا شرعه وأحله لأنه أحيانا كتيرة بيكون هو الحل الوحيد، والبديل عن أهوال احنا مش هانقدر نستحملها.
للتواصل مع د.هبه وافتح قلبك:
[email protected]