اللهم اني صايم ياقطة!!!!!!

هل هلال رمضان،شهر العبادة والخير والأخلاق،بس حتى قدسية رمضان ماقدرتش تقمع نظرة المجتمع للبنت،بدال ما الشباب يراجعوا نفسهم انهم المفروض يحموا البنات مش يضايقوهم،بدال ما الولد يشوف البنت اللي ماشية دي انه المفروض يحميها مش يخوفها،بنلاقي الأخلاق هيا هيا والمعاكسات زي ماهيا، بس ممكن يضيفوا عليها تعبيرات بنكهة رمضان"اللهم اني صايم ياقطة" "كنافه بالمانجا ياناس" "ياريتني شوفتك بعد الفطار" وده طبعا النموذج الخفيف،ده غير بقا مضايقات كلامية من نوعية"اقعدوا في بيوتكوا بقا ركبتونا ذنوب" "اهمدوا بقا الناس صايمين" ،وطبعا مش محتاجة اقولكم يابنات قد إيه كل واحدة فينا مع دخول رمضان بيجيلها رعب من فكرة انها تمشي في الشارع خصوصا في نهار رمضان،كلنا بندور عاللبس اللي شكله حشمة،واللي بشعرها تفكر تغطي شعرها،واللي بتبين قصة من الطرحة لازم تدخلها،واللي بتحط ماكياج تبطل او تحطه باللون الطبيعي عشان مايبانش،واللي بتلبس ضيق او قصير تخللي اللبس ده لبعد الفطار،قبل بقا ماحد يقوللي وإيه المشكلة إن البنات تلتزم في نهار رمضان عشان ماتشيلش ذنب اللي بيبصولها،احب اقولكم ان البنات بتعمل ده خوفا من الانتقاد،لأنهم بيعيشوا حياتهم الطبيعيه وبيلبسوا لبسهم الطبيعي بعد الفطار،المشكلة في المجتمع والتفكير الظلامي وكلام المتشددين اللي خلا البنات محور كل المشاكل،وفرض على البنت بصفتها الطرف الأضعف انها تحل كل المشاكل المتعلقة بصفتها كأنثى حتى لو كان الرجل عديم الأخلاق،البنت بقت تحس إنها كائن غير مرغوب فيه غير في منزلها وأمام زوجها وأقاربها،غير كده بتتعامل كمتهمة بإثارة الفتن وتحريض الشباب على التحرش رغم انها ممكن تكون نازله شغلها او رايحة السوق او خارجة مع اولادها.
والسؤال هنا،لحد إمتا هتحاكموا البنات،امتا هتنتقلوا من مرحلة الطمع في الجمال لمرحلة الاستئناس بالجمال،امتا هتشوف البنت اللي في الشارع كائن جميل يستحق الحماية،امتا هتدور جواك على احترام البنت حتى لو مكنتش اتربيت على ده؟؟؟ الراجل اللي يسمح لنفسه يخوف بنت اويضايقها سواء،في رمضان اوغيره،هو واحد نفسه يعمل راجل بس مش عارف!!!!!!
رمضان يابنات مش معناه انكم تبالغوا في مظاهر التدين وتعملوا نفسكم بقيتوا اكثر احتشاما وأقل لفتا للانظار،وتوهموا نفسكم إنكم كده بترضوا ربنا،اللي بيعاكس البنت بيعاكسها لأنه فارغ العقل مش لأنك إنتي اللي غويتيه،اللي بيبصلك بصة مش حلوة هوا اللي عنده مشكلة،مش إنتي اللي عاملة حاجة ملفتة،اللي استنكر خروجك بشعرك في نهار رمضان هوا اللي شايف شعرك ده وسيلة فتنة مش جزء منك لأنه اتعود يبصلك ويفكر فيكي على انك سلعة مش على انك شريك في المجتمع.
كل اللي عاوزه اوصله يابنات،انكم تخرجوا من قالب إنكم سبب الفتنة ورمز الإغراء لأن ده مش صحيح،انتوا أجمل مافي الحياة باعتراف الرجال أنفسهم،لو فنان رسم صحرا جافه بس واقفه فيها بنوتة رقيقة وجميلة،هتكون اجمل من لوحة فيها جنينة مليانه ورد بس تفتقر لجمال الأنثى.