م الآخر| مديرك "البصباص": يا تسكتي ..يا تترفدي!

كلنا ضد التحرش، وللأسف كل البنات بتعاني منه سواء في الشارع او في المواصلات أو في الطوابير سواء بقا طوابير العيش واو طوابير الحكومة اللى مابتخلصش! و ساعات في السوبر ماركت، وفي مننا اللى بتعدي وتسكت، وفي مننا اللى دمها حر ونلاقي "جزمتها إترفعت على اللى اتحرش بيها ، علشان تعلمه الأدب ، بس يا ترى لو البنت الجدعة الحرة دى اتعرضت لمعاكسة مديرها في الشغل هاتعمل إيه؟.
لما تروحي شغل جديد ومبسوطة وبتقولى يا هادي وبعد شوية تحسي بحاجة غريبة بتحصل لك، مش من زمايلك الشباب اللى قدك في السن ومالهومش اي سلطة عليكي، لا ، من مديرك ، اللي في إيده يرفدك ، لو غضبان عليكي أو يرضى عنك ويكبرك ويرقيكي كمان!.
هو طبعا الموضوع مش هايوصل للتحرش "الجسدي" مش علشان هو محترم لا طبعا، علشان هايخاف على بريستيجه قدام زمايلك وهايخاف من الفضيحة ، فيعمل ايه بقا وهو هايموت عليكي ، هايتحرش بيكي برضه ، بس تحر ش "لفظي" و"مرئي" !
إزاي ده؟ هو في حاجة إسمها تحرش "لفظي ومرئي"؟؟ ااه طبعا فيه، لما تكوني قاعدة وعينه مش بتتشال من عليكي ، ويا سلام بقا لما تقومي تمشي وتلاقي بيبص علي كل حتة فيكي ، وكإنه " حيوان جعان عمره ما شاف الاكل قبل كده وعايز ياكل لما يشبع بس للاسف اللي زيه عمره ماهايشبع".. المهم ومش بس بقا بيكتفي بالنظرات لالا ، ده يبدأ في المعاكسة ، إيه الحلاوة دي، إيه الجمال ده وطبعا دي المعاكسة المؤدبة ، اللي في الحدود لكن اللي بيتقال بيبقى كلام تاني خالص برا نطاق الأدب والأخلاق والحدود والآدمية كمان.
لا وساعات الامور مش بتوصل لكده وبس، لا، دي ساعات بتدخل في مساومات، من البيه اللي فاكر نفسه يقدر يشتري أي حاجه عجباه بفلوسه، مساومات أخرها يا تنفذي اللي انا عايزه وتسكتي ..يا هاتترفدي.
هنا بقا البنت تعمل إيه؟ طبعا مع احترامي لكل البنات بس كتير بيتبسطوا اوى وعادي جدا وبيكملوا ودول مش موضوعي ، أنا اهتمامي بالبنت المحترمة اللي بترفض حد يخدش حياءها بنظرة أو بكلمة مش من حقه يقولها، البنت الحرة الجدعة المتربية اللي تعرف تحمي نفسها لو في وسط ميت راجل، هاتحمي نفسها من مديرها البصباص المتحرش احيانا وخاصة لو كانت فعلا محتاجة للشغل وماتقدرش تسيبه ؟، ماهي لو عملت له فضيحة، هاتخلص برفدها ومش بس كده، لا، ده هايلفق لها أي تهمة ويكدبها ويطلعها بفضيحة ، وطبعا الناس اللي فوق منه مش هايستغنوا عن المدير اللي شايلهم وعارف بلاويهم واللى بيسهروا بعد الشغل مع بعض كل يوم وعارفين بلاوي بعض، هايستغنوا عن البنت المحترمة الغلبانة اللى رفضت الاهانة ويقولوا لها برا، من غير مطرود!.
هنا رد الفعل بيتوقف علي شخصية البنت نفسها، البنت الضعيفة اللي رافضة بس ماعندهاش القدرة للتعبير عن رفضها له، مش هاتعرف تاخد حقها ، وهايتفسر ضعفها على إنه سكوت وقبول بالأمر الواقع، وساعاتها هاتقعي في مشاكل أكبر ، مش هاتعرفي تخرجي منها ، وهاتبقى شبهتي نفسك..
أما البنت القوية فهاترفض نظرات "البصباص" ليها وهاترفض كلامه ، وهاتوقفه عند حده ، ولو وصل الأمر لرفدها فمش هايهمها، لان الأرزاق على الله ، بس هاتبقى كسبت نفسها وكرامتها وخرجت وراسها مرفوعة وعينه مكسورة مهما كان جبروته.
لكل بنت محترمة، ودمها حر وبتعاني من معاكسات "مديرها البصباص"، ماتسكتيش لان سكاتك هايتفهم غلط، ولو تعدى حدوده معاكي بكلمة خارجة أو مساومة سافلة ، هزقيه ، ومرمطي بكرامته الارض، وافضحيه في شغله علشان يبقى عبرة لكل واحد بيستغل نفوذه وفلوسه علشان يرضي رغباته الدنيئة، وفي الاخر هاتمشي ، بس هاتمشي وانتي فخورة بنفسك ورضيتي ربك، حتى لو رزقك اتقطع في المكان ده فعلشان رضيتي ربنا هتلاقيه بيراضيكي وبشكل ماكنتيش تتخيليه وهايعوضك بمكان أحسن وأكبر مليون مرة من اللى كنتى فيه، آه والله "إسأليني أنا".
ولكل مدير عينه ذايغه ، عايزة أقولك كلمتين ، تحطهم حلقة في ودنك ، أن كنت فاكر نفسك كبير فربنا أكبر منك ، ولو فاكر نفسك قوى فربنا أقوى منك ولو فاكر نفسك غني فربنا أغني منك ولو فاكر نفسك واصل فربنا يعز من يشاء ويذل من يشاء.
واعرف ان اللي بتعمله في بنات الناس هايتعمل في مراتك وفي بنتك وفي اختك ، فاتقي الله شوية وخلي عندك دم وإياك تستغل بنت ظروفها صعبة علشان ترضي رغباتك الدنئية على حساب شرفها وحياءها.