المقامة العنوسية

حكالنا حنفي بن تامر وقال :
فيوم لقيت واحدة , فتمام الساعة واحدة , جاية بعد شوية , ترمي بلاها عليا , وتقول اني واد فاكس , عمال الاغى واعاكس , وانى عمال الاغيها , وانى زي اختك عيب , قولتلها : العيب ف الجيب , الفكرة دي انا لاغيها , انا اصلا من مخي !! ,ليه بتبخي وبترخي , على دماغي بلاوي , هيا ناقصة بلاوي !!
حسيت انى جرحتها , فصممت فوقتها , اني ارضي غرورها , منا لازم اراعي شعورها , من باب الاحترام , علشان انا مش رمرام !! , فبصيتلها من فوق , وقولت (بكل ذوق) , : ممكن بعد اذنك , يعني تديني ودنك , انا هاسأل سؤال بسيط , انا مجنون والا عبيط , عشان اعاكس حضرتك ؟ , انا راضي ذمتك , دي سحن تتعاكس !! , دي سحن عايزة القديمة , البعد عنها غنيمة , البعد عنها نعمة , ولا مؤاخذة فدي الكلمة , احنا بنقول الحق , ورزقنا على الحق , والحق ما يزعلش , اللى يزعل الألش !!
بصتلي باندهاش , قولتلها : ما بدهاش , انتى ال رميتي عليا , بلاكي من شوية , وعملتيلي مذعورة , بس انتى صحيح معذورة , على رأي الحجة نوسة , يخربيت العنوسة , اللى خلت بناتنا , يعاكسوا شبباباتنا , البنت من حوستها , يا عيني ومن حوجتها , لضل راجل تعمل , يا حسرة ال ما يعمل !!! , تخيلي بقا خالتكو , وصفت لنا ايه حالتكو !! .,. , دة الواحد يمشي فحاله , يلقى واحده طالعاله , تقوله : انت حبيبي , او انت شبه خطيبي , او انت فلان قريبي !! , وتقطع فيك حتت , ناقصة تلاقيح جتت !! , خليكوا كدة تزاولونا , وبكلامكو تناولونا , وبروسكو تحلفونا , دة شوية و تحدفونا ؟ , بقشر سوداني و دوم ؟؟ , ادي حالة بنت اليوم , بتشتري دباديب , علشان دايبة فدباديب , مطرب سهن ديب , عامل لي فيها حبيب,, وتروح تحضر حفلاته , كواحدة من معجباته , وتهيص بقا وتزيط , وتسورأ بقا وتعيط , وتعمل انها ذوق , علشان تطلع له فوق , تطلع له على الاستيدج , تاخد معاه ايميدج , وتديله دبدوب , وبوسة وحضن يا دوب , والتاني مسلم لها , لازم يستسلم لها , والا يبقى من طيشه , انه قطع اكل عيشه !! , أنظر حفلة عمورة , او كاظم او تمورة , أصل العنوسة زادت !! , والموانع زالت , وال اختشت ماتت !!
وكما قالت الحكمة , بالنص وبالكلمة , ( وراء كل فرح ...بنت بتصطاد عريس )
بعدين كملت زني , وقولتلها بتأني , تصدقي بالله , قالت : ونعم بالله , قولتلها ( بابتسامة ) , : فيه احلا منك يامة , وارق من يمامة , عرب وكمان اجانب , مستنين ينولوا , يا عيني او يطولوا , م الحب أي جانب !!
وبيقفوا بانتهاز , على مكتب الجواز , اللى هنا ف الحي , طوابير زحمة وطويلة , وتلاقى الواحدة جميلة , وجمالها مالهش زي , احلا من الانيميشن , وفايدها ابليكشن , و فعز الشمس واقفة , وكلها شوق ولهفة , انها تدخل المكتب , دة وكانه مكسب !! , وتلاقي بنات بدور , واقفين بالدور فطابور , بيتخانقوا مع بعض , ويزقوا بعض على بعض , ويشتكوا الانات , علشان هما بنات , يا حسرة عانسات , غلابة عابسات ,
وتلاقي بقا فراش , المكتب ف الطناش , يعمل نفسه بيتمنع , وعلى البنات يتدلع , , مستني اللى ترشيه , بحاجة وتراضيه !! , علشان يدخلها جوة , عارف مصلحته هوا !! , فعلا راجل تمام !!
قالتلي : ياسلام ؟ , دة راجل استغلالي , , لا عنده عزيز ولا غالي , دة انتهازي مالي , فرحان بذلنا , وبيستغلنا !!
اختى اديتله خمساية , وانا اديتله خمساية , وبرضة ما دخلناش , على دمه ما اختشاش , ولطعنا برضة برة , وعمل كدة كذا مرة , دة حرام عليه يعيش , انت عايز الحق؟ , دة راجل عايز الحرق !! , قولتلها : ما تشتميش !! , وبالراحة كدة يا اختى , الفراش دة ابن خالتي , يعني ما تغلطيش !!
قال حنفي بن تامر : بصيتلى بقلة ذوق , واضحة من تحت لفوق , , سألت : طب ليه كدة ؟, ليه يعمل كل ادا؟ , معانا دة حتى احنا , المفروض فمحنة , وبنقول له : ساعدنا , ساعدك حطه فساعدنا , دة بدال ما يبكي علينا, ويحط اديه فادينا , يتنك علينا؟؟ , ليه فاكر نفسه مين , يعني محمود ياسين ؟ , والا احمد عز ؟, برد مستفز , قولتلها : بتاع الحديد ؟ , لا لا دة وجه جديد , وشه فعلا سينيمائي , وجسمه بر مائي !! , دا عليه تسريحة وقصة!! , بصتلى نفس البصة , وقالت لي : دمك تقيل , زيه ماهو كان سقيل !! , وانا فكرتك روشنجي , طلعت كراكاشنجي !! , هنفد بجلدي يا عم , مش طالبة خنقة وغم !! ومشت وسابتني فعلا , فحمدت ربنا , انها من هنا , مشيت وجرت فخادها , منغير ما تحاسبني , ومنغير ما تطالبني , بالفلوس ال خدها , منها ابن خالتى , شكلها دريانة بحالتي , منا زي تاجر باين , فلسان ونهاره باين , قدام كل الزباين , والحمد لله .....والختام !!