حب من طرف خايف.. أحمد نبيل العريني

الحب يعني آمان، لو خوفت يبقى ده مش حُب، ده عبارة عن وقت بتضيّعه في علاقة فاشلة
ناس كتير جدًا فاهمة الحب كلمة حلوة مع خروجة جميلة، و ناسين تمامًا إنه عشان نحس بالحب لازم نرضي الله، رضا الله يعني آمان، و الآمان أساس الحب.. مؤخرًا بقيت بشوف شباب و بنات واخدين الحب عبارة عن مرحلة في حياتهم لازم يعدّوا عليها، يتسلوا شوية و يتكلموا شويتين، وطعبًا يخرجوا و يتقابلوا، و عشان أكون صريح شوية، بيخافوا يتقابلوا قدام الناس.. فيه رهبة بتصيب قلوبهم فبتخليهم يخافوا من الناس و ينسوا أو يتناوسوا يخافوا من ربنا
الحب سكة لطريق الجنّة، الحب أصلًا جنّة، إني أثبت لحبيبتي إني هوصل معاها للجنّة، و سكة الجنّة مش سهلة، إطلاقًا يعني.. عشان نمشي في طريق الجنّة لازم نعلّم قلوبنا ترضي الله عشان نحس بلذة الحب.. الحب الصادق النقي، الحب اللي يغيّرنا للأحسن، مش مجرد وقت بنقضيه و بعد كدة هنلوم بعض و يمكن نكره بعض.. الحب بيعلمنا إزاي نتسامح و نتصافى، بيعلمنا إزاي مانكرهش، بيعلمنا نكون ناجحين، الحب إني أكون طيب عشان ربنا يرزقني بزوجة طيبة
هتخسر كتير لو علّقت قلبك ع الشماعة كل اللي بيعدي يلبسه شوية، هتخسر إحساس إنّك تحافظ على قلبك، إنّك تكون نقي، شباب كتير معلّقة قلوبهم ع الشماعات، أي بنت جميلة تقابلهم يعلقوا قلوبهم بيها، الجمال مش مهم، النقاء هوّ بس اللي مهم، فرق كبير بين حد بيختار قلبك عشان يحافظ عليه و إنه يختار قلبك عشان يعيش إحساس ما، فرق كبير جدًا
الحب إنّك تكون ملك عشان تقابل الملكة اللي توصل معاها للجنّة، تكون إنت مش شخص مُصطنع بيغيّر وشه كل يوم عشان يتسلى ببنات الناس، بنات الناس مش لعبة و إنت كمان مش أداة الشيطان يتحكم فيك زي ما هو عاوز، إنت لو سلمت قلبك و نفسك للشيطان هتكون عبد قصاد الحاجة الجميلة اللي من برّة، لكن لو حافظت على قلبك هتقابل إنسانة جميلة جوهريًا و كليًا تحبك بجد
مش تستخبى في أوضتك و توشوش نفسك عشان صوتك مايبانش، ولا تدارى من عيون الناس عشان تقابل حبيبتك، الحب مابيذلش
*نصيحة من القلب
حاول ماتبقاش ضعيف قصاد كلمة "بحبك" هتسمعها كتير لكن مش هتحسها غير مرّة واحدة بس، إحساس كلمة "بحبك" أجمل إحساس هتحسه، لكن عشان تحسه و تعيشه لازم ترضي الله، الحب إنّك تكون طيب عشان ربنا يرزقك بزوجة طيبة شبهك