م الآخر| طعم الطبطبة

دايمًا في حاجات بتخلينا نتعب ونزعل ونحس بالإحباط، حاجات كتير بتغيّر كيفية الاستفادة من اللحظات السعيدة.. أكتر حاجة بتوجعنا هيّ أكتر حاجة بنحبها، حلم جميل نفسك تحققه وفجأة يضيع منك بسبب القدر والنصيب، القدر دايمًا بياخد منِنّا الحاجة اللي احنا بنحبها علشان يدينا الحاجة اللي "ربنا" كاتبها لينا، وطبعًا الحاجة اللي تيجي من "الكريم" هيّ الحاجة اللي هتخلينا مبسوطين وفرحانين (مِش من أول مرة).
هنحاول نتقبلها بصعوبة علشان احنا مضطرين، لكن أول لما نعيش جواها ونصبّر نفسنا بيها هنحس قد إيه إن دي هيّ الحاجة اللي هتسعدنا، الله دايمًا كاتب لنا الحاجة اللي "هتطبطب" على قلوبنا، ولكن لو نصبر ومنستعجلش الطبطبة (اللي هي سر من أسرار السعادة)، حاجة بتخلينا نعيش إحساس الراحة والاطمئنان، بس طبطبة عن طبطبة تفرق، في حد بيطبطب عليك علشان هدف معين، وفي حد بيطبطب عليك علشانك، علشان يريّحك ربنا كريم أوي، وقت ماتحس إن كل الناس واقفة ضدك قول "يا رب" من قلبك هيسمعك، وهيحس بصوت دقات قلبك وصوت وجعك؛ لأنه قريب أوي أوي منك متخافش من ردود الناس، ولا من كلامهم.
الناس بتتغيّر كل يوم وكل ثانية عارف ليه؟؛ لأنهم ناس قلوبهم بتتلّون بأكتر من لون، بيضحكوا ساعات ويزعلوا ساعات، بيظلموا ويوجعوا.. بيكذبوا وبيخافوا، الناس "وشوش" علشان تفهمهم متبصش في وشوشهم، بص دايمًا في قلوبهم.. القلب بيوضّح الصورة أكتر، بيخلينا نشوف الشخصية اللي قدامنا على أكمل صورة.. تعرف تعمل كدة؟!.
ربنا كمان هينظر لقلوبنا علشان كده اهتم بقلبك ومتلوثهوش، خليه جميل وطيب.. متتعودش إنك تظلم فلان ولا توجع فلان، خلّي قلبك نقي نضيف من جوّا، خليك صادق طعم الطبطبة بتفرق من إيد وإيد، من قلب وقلب.. في قلوب كتير بتطبطب على قلوبنا، لكن في قلوب قليلة أوي اللي بتحس بقلوبنا، الطبطبة يعني "إحساس"، إنك تحس بقلبي فتطبطب عليّا بقلبك، تحس بوجعي من قبل حتى ما يبان، تفهم إيه اللي تاعبني وتحضّر اسلوب كويس تكلمني بيه، الأسلوب بيفرق يا صديقي.
في ناس بتطبطب عليك وجواهم حقد دفين وكمية غِل ماتتوصفش (هما كتير بصراحة)، ولكن في ناس تانية بتطبطب عليك بصدق وإخلاص، موجودين لكن قليلين، بس عشان تدوق طعم الطبطبة مفيش أجمل من طبطبة ربك عليك، هو عز وجل اللي حاسس بتعبك وخنقتك، حاسس باللي واجعك وعارف إزاي يريّحك، قلوب كتير تعبانة وقلوب كتير حزينة، الله قادر يريّح قلوبكم فمتبخلوش على قلوبكم بطعم الطبطبة الربانية.
نصحية من اخوك، متقولش لحد "أنا محتاجلك" إلاّ إذا كان هيحس بيك، مش كل اللي حواليك حاسين بوجعك ولا حزنك، في ناس بتقرّب منك عشان تمسح وجع حد قبلك سببهولهم، في ناس بتقرّب منك عشان تملى فراغهم وتحسسهم بالاهتمام.
أقولك سر متهتمش بحد مش مهتم بيك، متحكيش لحد حاجة وهوّ أصلًا مش فاضي يسمعك، زي ما قولتلك يا صديقي.. الله فقط اللي عنده علاج لحزنك وتعبك، الله قادر يطبطب على قلبك وتحس بطعم الطبطبة اللي هتريّحك، أول لما تحس إنَّك محتاج حد يطبطب عليك قول من قلبك "يارب".