قولوا .. يا رب

بقلم : هدي الخولي

أنا مبطلبش كتير.. أنا عاوزة مرتبي يعيشني عيشة محترمة.. عاوزة ولادي يتعلموا تعليم يفيدهم في حياتهم من غير حشو في المناهج من غير دروس خصوصية اللي بدفع فيها كل مرتبي.. نفسي يعيشوا طفولتهم.. أنا فاكرة وأنا في سنة أولي ابتدائي كلها اتعلمت عادل وسعاد وشوية كلمات قليلة.. بس عشقت القراءة و»أبلة منيرة« أنا وكل جيلي كان عندنا فرصة نقرأ ونذاكر ونتفوق ونمارس رياضة ونلعب كمان لكن ابني اللي في رابعة ابتدائي بيصعب عليّ حاسة إنه (مطحون) لأنه حب الرياضة ميعرفش ياعيني أن التعليم وتطويره هيحرمه من أي هواية.
عاوزه ابني اللي في الجامعة يتخرج ويلاقي شغل ومرتبه يكفيه ويقدر يدخل جمعية »زينا زمان« علشان يحوش فلوس لجوازه ويكون أسرة وأفرح بيه وأشيل أحفادي بس يا خسارة.. أنا شايفة زمايلي حواليه اللي ولادهم اتخرجوا تعبوا في تعليمهم وتعبوا أكثر من البحث معاهم علي شغل.. أي شغل.
عاوزة لما أتعب أقدر أدفع كشف الدكتور وأجيب علاج مصري بس يجيب نتيجة يعني مش مضروب.
عاوزة شارع نضيف عاوزه جو نضيف.
أنا لما بخرج الشارع وأرجع أغسل إيدي أحس إني كنت شغالة في محجر.
عاوزة أنا وأولادي نزور كل سنة مكان سياحي في بلدي نستمتع فيه ونعرف بلدنا مش عن طرق القراءة والصور في كتب المدرسة وبس عاوزة أحس بالأمان في الشارع وفي البيت عايزة أحسه جوايا.
أنا عارفه إن طلباتي كتيرة.. لكن لسه عندي أمل فتحقيقها ياتري ممكن.. قولوا معايا يارب.. يارب.