كلام علي الورق

أنا الحكومة

الأولة آآآآه.. ربنا يجعل كلامنا خفيف علي الحكومة وخصوصا أنها لسه طالعة من صيام رمضان وصلاة التراويح وصلاه التهجد.. ربنا يتقبل.. وبعدها دخلت علي كحك العيد المحشي مكسرات بندق وعين جمل أبو 120 جنيها وبسكويت فاخر أبو 75 جنيها.. المهم الناس الغلابة شافوا الحكومة بتاكل الكحك أبو 120 جنيها قالك اشمعني أنا.. انزلي يا بت اشتريلنا الكحك ده.. والحكومة شافت كده وهات يا ضحك.. علي طريقة سيبوه لما جيبه يوجعه قبل بطنه.. المهم الحكومة وهي لسه خارجه من أكل الكحك والناس وراها خارجين من إجازة العيد إلا وأصدرت فرمانا بعودة التوقيت الصيفي.. أيوه التوقيت الصيفي فاكرينه من أيام ثورة عرابي وقبل كده كمان.. بس الحكومة عداها العيب لأنها أعلنت ساعة تطبيق التوقيت الصيفي قبل رمضان والغاءه برضه قبل رمضان إنه هايرجع بعد رمضان!!.. والله عداك العيب ياحكومة.. ورغم أن الأطبة النفساويين والخبرا بتوع الاقتصاد قالوا إن تغيير التوقيت يصيب الناس بالأمراض النفسية والعصبية وأن التغيير لا بيودي ولا بيأخرفي اقتصاد الدول.. ياي إيه ده! وبرضه احنا مش ماشيين وراهم.. بس برضه الحكومة عداها العيب لأنها قالت وعادت ولتت وعجنت وقالت التوقيت الصيفي هايرجع بعد رمضان يعني مالناش حجة نقول ياه معقول.. ومن حقها برضه تزعق وتقول هههع مين هناك أنا الحكومة !! والتانية آه آه بالقوي لأن الباشمهندز المسئول عن المترو صحي من النوم بعد العيد ماخلص لقي الناس واقفه ياما علي أرصفة محطات المترو قعد يعد وصرخ يا نهار أسوخ كل دول يخشوا المترو ويتحمروا من الحر جوه المترو وكل ده بجنيه واحد ليه أنا مش عارف إيه .. وقال إيه طلب رفع بنديرة المترو أقصد تذكرة المترو كمان نص جنيه.. تعمل قد إيه دي يا وله ؟!! وزعق وقال.. ههع أنا الحكومة !!